Related Articles
Tutan Kawlram mipi nih kan tonmi cu theih cio dih a sibantukin a kenkip le a ramkip in rak dohkalh cio a rak si. Kan mifim ngeih mi hna le pa can ah kan i ruahmi hna zong nih heh tiah a ramkip sinah chim cio a si i Tlangcung hriamtlai zong nih hriamnam he doh a hun si cang.
Cu tikah kan nih Chinmi hna nih ralkap ah kan i ngeihmi hna CNF/A cu kan uhttanh ngaingai hna. Kan uhttanh mi hna zong hi khat lei kam cun kan/an mawh lo zeicatiah tthenkhat Tlangcung hriamtlai hna cu a tu lio uico ralhrang hna cu an doh cio cang hna i CNA/F chungah hin zeibantuk rianttuannak le zeitin dah an cawlcangh ning tibantuk hi mipi hna sinah chimphuannak fiangin an langhter rih lo caah CNF/A nih an doh cang hna timi theih khawh a si rih lo.
Hi ikahdohnak kong he pehtlaiin Israel R Thang nih a facebook cahmai ah a rak tarlangh mi cu ti hin a si “AA an țhawnnak a ruang pakhat cu an Pu le pawl nih Ramthumnak in an hruai hna lo caah asi. Naih niam tein an tlumh hna” ti hi a si. Israel R Thang hi Laimi tam deuh nih cun kan theih cio ko lai dah, Cattialthiam le Bible lei zong a thei ngaimi pakhat a si caah hi ca a rak ttialmi hi kan rak langhternak zong a si.
Hi ca a ttialmi hi kan i fiang dih cio ko lai dah, a fawinak cun CNA/F a ti duhhnawhmi hna a si ko. Zeicatiah CNA/F hi cu a tlangpi in ramthumnak ummi nih hruai deuhmi a si ti sihlaw kan palh theng lai lo. AA hriamtlai bantukin naihniamnak teah tlumh ve hna sehlaw hi tluk in CNA/F chungah hin chanbaunak a um hnga maw tiah thil tampi a ka ruah ter ve. Hruaitu le nih naihniam tein an umhnawh hna tikah tulio hriamtlai ahcun a tthawng ngaingai mi dirhmun ah an hun um nak zong a si.
Note: Israel R Thang nih hi kong a facebook cahmai ah a rak ttial mi kong he pehtlaiin keimah cattialtu nih ka lungum mi le zeitluk in dah kan ralkap kan duhfahnak hna ka rak langhter chin mi a si. CNF/A soiselnak zong pakhat hmanh aa tel in ka hmu lo cun CNF/A cu kan nih Laimi hna nih cun dirkamh peng ding hna hi kan rian a si.
A Dang Reltthan: Chin ramkulh Tedim khuapi i mipi kilvengtu hna cu India le Chin ramri ah raldohnak cawngin(training) umhmun an khuar i May 22 zingah Zomi Army tiah kan theihmi hna Zomi Revolution Army(ZRA) pawl nih cun an kah hna nak kong cu anmah lila nih Myanmar Now ah an chim.
A zaammi lak i mipi kilvengtu pakhat nih cun “Zinglei kan thawh ka hrawng a si. Lam hla nawn khin an van aukhuang i “ZRA kan si” nan himnak ding caah zaam uh tiah an kan auhkhuan hnawh. Cu lila cun meithal a vun puah thluahmah. Minute 20 an kan kah hnu hrawng khin Zomi holh in an i chawnhbiak len kan theih. Kan thilri zei hmanh kan la manh lo i phone, Camera pinah meithal zun 5 le ting 30 man hrawng thilri an kan lak piak. An lak thlu lomi kan thilri dang zong an hrawh dih cikcek hna.” tiah a ti.
Zomi Army hi India ram Manipur hrambunh ralthuam keng an si i zeiruangah dah an miphunpi Tedim zomi an doh hna i an kah hna timi theih a si rih lo. Anmah lei zong nih ca an chuah rih lo i cachuahmi zong an let rih hna lo. Tthenkhat nih cun Zomi Army cu metei ralthuam tlai an si bangin Myanmar ralkap nih remnak a tuahpi i anmah miphunpi an doh hna hi a si ko lai tiah an ti ve. Credit: Vapualauaw
