Related Articles
Kawl ralkap nih ralthuam phuntling hmangin Mindat khuapi cu din loin an kah lengmang tikah Mindat mipi kilvengtu hna nih cun kahlet hna dingah a ttha lai lo tiah mipi ca ruat in hnung an pil rih. Cungin siseh tangin siseh Mindat khuapi a kap tu ralkap kahve an sile mipi an temtuar tuk lai ti an phan caah a si. Asinain, kan rak kir tthan zau lai tiah an ti.
Mindat mipi kilvengtu chungin hruaitu pakhat nih “KNU le KIA tibantuk hmanh nikhat chungah hitluk ralkap tam le ralthuam ttha in an doh bal hna lo. Khuapi pakhat kilven i lai meithal lawng hmang kan nih hitluk in an kan doh cu a mak ngaingai. Ralkap le ralthuam cu vanlawng in voi 30 renglo in an thiar hna i cung le tang in Mindat khuapi cu an kah. Zinglei suimilam 7 in zaanlei 3 pm tiang din loin Mindat khuapi cu ralthuam ngan in an kah. Bomb puahnak aa mih sual mi zong van tuamhlawmnak ding caah a har ngai. Khuachungah an luh khawh cang caah an duh paoh an tlaih hna
an hrem hna ngakchia nunnak zong ruat loin meithal cu an puah camcin ko.
“Kannih mipi kilvengtu nih mipi kan ruah tuk ruangah le mipi ngeihmi thilri kan ruah ruangah ralkap cu doh ve loin hnung kan kir rih. Pukpi le ralthuam picang phunphun hmangin an kan doh nain, lai meithal hmangmi an tei ti lo caah vanlawng an hmang i miphun cihmih thlu an timh. Mindat hi rak kan bawm cio hram uh, hmundang cio in ralkap cu rak do ve uh, lungrual tein kan doh lawngah teinak cu kan co lai. A tuhi cu hnung kan kir nain, a rau lai lo kan rak kir tthan colh lai teinak zong kan hmuh hrimhrim ding a si,” tiah a ti.
Ralkap nih an tei khawh lomi Mindat peng cu May 13 zaan in Martial Law an rak chuah i ralthuam le ralkap thazaang cahnak hmangin uk dingah ralkap bawi nawl an rak pek. Tanglei ikahdohnak ahcun ralkap lei an sungh lengmang caah vanlawng an hman cang i phurh 30 renglo an phurhmi ralkap le ralthuam cu Mindat khuapi chungah an i tthum. Cu ti cun Mindat khuapi chungah ralkap pawl an khat thlu cang.
Tu ahcun mipi lei kilvengtu lei cu hnung an kir rih i kahdohnak cu a dih rih nain, ralkap pawl cu khuapi chungah duh paoh in an i chawk an vai. Pa an hmuhmi paohpaoh an tlaih i biahalnak an ngeih lengmang hna. Tthenkhat mipi cu ramlak ah humhimnak kawl in a zaam mi zong tam ngai te an um.
Ralkap nih cun ralkap mawtaw 6, lamhla kahnak meithal ngan in hmun 2, vanlawng 5 le ralkap in minung 1000 hrawngin tuni May 15 ah Mindat mipi kilvengtu pawl a domi an si i cubantuk bu ko zongah Mindat khuapi chung an lut kho hlei lo tikah Helicopter in ralkap le ralthuam cu a tu le tu aphurh hna i Mindat khuapi chungah cun an khawmh len hna. Cu ti a si tikah, Mindat khuapi ah ralkap an khat i mipi kilvengtu lei cu mipi ruah ruangah hnung lei an kir chungnak hi a si. Credit: Vapualauaw
RELCHAP: SAC Ralkap nih Mindat Mipi Ralkhamnak ah an Hman hna caah CDF-Mindat nih an Hrial Chung Hna Nihin zinglei sml. 7:00 hrawng in zaanlei sml. sml. 3:00 tiang SAC ralkap helicopter nih voi 30 hrawng Mindat khuachung ah ralkap le ralhriam pawl a rak chiah hna.
Khuachung i SAC ralkap hmunkhuarnak in Mindat khuami hna inn pawl cu 60mm mortar bomb in pehzul in an kah peng hna.
Kyaukhtuh in motor lam in SAC ralkap pawl an rat khawh ti lo caah helicopter hmang in ralhriam le ralkap pawl an chap thluahmah hi a si.
“Khuachung i mino 15 an tlaih hna. An tlaihmi hna cu SAC ralkap nih ralkhamnak bantuk in hmai ah an kalter hna i khuachung ah an i chok. CDM a tuahmi zong pa paohpaoh cu an tlaih dih hna,” tiah Mindat mipi uktu bu nih thawngthanhnak ah an langhter. Khuachung inn pawl ah miakpi in an kah peng caah nu le ngakchia tampi zong ramlak ah an zaam hna.
“An tlaihmi minung pawl ralkhamnak ah an hman hna caah kan kah hna ahcun kanmah minung pawl kan khen hna lai ti kan phan caah CDF-Mindat nih kan hrial chung hna. Kan rak kir tthan lai i kan doh tthan hna lai,” tiah thawngthanhnak ah an langhter. Credit: The Chin Journal
