Related Articles
Hi kong he pehtlai in tuzaan cu mipi an kan lauhter dih a bikin Pu No Than Kap. Zeicatiah hitluk buai lio caan i ralhrang nih sawmmi meeting ahcun a va kal hnga tiah ruah cio a si. Hmanhsehlaw a mah nih fianternak zong a tuah cang i cucu keimah pumpak in a kal mi ka si i CNLD party zong hin chuahnak ca ka tuahnak zong a sau cang tiah a ti i, nain meeting a kaimi min cazin ah CNLD min hmuh khawh a si.
Cu CNLD an min a langhnak le Pu No Than Kap chuahnak kongah tubantukin CNLD nih theihternak zong an rak chuah colh ve nak a si. Kawl ca in a si caah kan sikhawh tawkin kan rak leh. Ti hin a si:-
“UEC nih 2021 May 21 i an tuah mi meeting le party pawl tonnak a kal mi hna cazin ah CNLD aa tel cu media pawl nih an hmuh.
CNLD sining in tu lio kan ram chung chuakmi buainak he pehtlaiin UEC sawmmi meeting ah kan kal lai lo tiah cung lei sin zongah 2021 May 17 ah ca kan pek cang hna. Mah ruang ahcun 2021 May 21 i tuahmi tonnak ahhin CNLD lei in a ho hmanh kai ding in thim mi zong an um lo.
Mah lengah Pu No Than Kap hi 2021 March 31 ah CNLD in chuahnak ca cu tu ni 2021 May 21 zaan suimilam 9 ah messanger in a kuat hna caah Pu No Than Kap i chuahnak ca he pehtlai in cunglei uupa pawl auh in meeting a ran nak bik in kan tuah lai tiah theih asi.” Source: CNLD
A Dang Reltthan: Tu ni 2021 May 21 Naypyidaw i an tuah mi thimnak i aa tal mi le party pawl i tonnak ah CNLD lutlai pakhat kal lo ding in a ti ko nain lutlai pakhat si ve mi Pu No Than Kap cu a mah pakhat lung tlin nak in a kal tiah party lutlai si ve mi Pu Ngai Sak nih a chim.
Kan dih lak kan theih bantukin CNLD party aa tel ve mi Pu No Than Kap cu tu ni meeting tuahnak ah a va kai tiah theih a si. Meeting kai lo ding zong in kan chimh ko, caa zong in kan kuat ko nain zei ruangah dah a va kai ti hi kan thei bak lo. Kan nih zong a tu kan hlat lio a si. Cun kan theih mi thawng a um ah cun CNLD lei in thawng kan rak thanh than lai tiah party lutlai Pu Ngai Sak nih a chim.
Tuni meeting kai nak kong he pehtlai in thawng hal kan timh zong ah phone chawnh kawh si lo. A phone switch off in aa chiah i chawnh kawh si lo. Tuni meeting an tuah mi ah party 59 an kai i a ra lai ding mi thimnak ding kong le aiawk tu PR hman le hman lo ding pawl an ceih tiah theih a si. Credit: Chin World
