Related Articles
Chin ramkulh Mindat khuapi pawngte ah Mindat mipi kilvengtu le ralkap ikahdohnak faak ngaingai in ralkap nih Mindat khuapi cu laak an timh cuahmah lio a si tiah theih a si. A hlan hmasa deuh i an rak i do ah khan cun ralkap leiin minung 30 bakte an thi i Mindat mipi kilvengtu lei cun a thi mi an um hraw lo.
Tutan an idohnak ahcun ralkap lei nih thazaang tam ngai an chuah i lamhla kahnak meithal ngan hmangin Mindat mipi kilvengtu umnak lei cu an kah thluahmah ko ti a si. Cu bantuk meithal ngan an hmanmi cu hmanthlak i kan rak langhter mi bantuk kha a si. Ralkap pawl cu Magwe ramtthen Kyauk Htoo khuapi vanlawng ttumnak ah hmunkhuar mi an si i umhmun an khuarnak hmun in meng 18 tluk hla Mindat mipi kilvengtu pawl umnak cu an kah. Hi kongah Mindat CDF pawl umnak biathli chimtu(Dalaan) an um tiah theih a si.
Culawng si loin ralkap mawtaw 3 cu Kyauk Htoo ah cun an phaan i mawtaw 2 tu cu Mindat lei ah a lan colh. Matupi lam lei zongin ralkap mawtaw 6 cu Mindat mipi kilvengtu pawl do dingah an i thawh colh ve. Mindat dirhmun cu a ttha lo ngaingai tiah mipi kilvengtu chungin hruaitu pakhat nih cun a chim i pawngkam Myone pawl zong dai tein um lo i ralkap pawl rak doh ve dingah a sawm hna.
Mindat mipi kilvengtu hruaitu pakhat nih cun “Tu dirhmun Mindat boruak cu a ttha lo tuk khi a si. Matupi lam lein ralkap mawtaw 6 cu Mindat lei panhin an kal thluahmah hna i pakhat hnu pakhat in doh kan tong. Kanmah mipi kilvengtu leiin mi pakhat a thi cang i minung 4 hi hliamhma an tuar.” tiah a ti.
Hmasa an idohnak tanah ralkap an sungh cu, mipi kilvengtu hna cu remnak an tuahpi hna i tlaihmi pawl kan rak in thlah piak hna lai tiah an rak ti hna. Asinain, nikhiahmi an ngeihmi May 12 tiang tlaihmi pawl cu thlah an si lo tikah an iremnak cu chah tthan a si i May 12 zaan in ralkap le Mindat mipi kilvengtu cu idoh hram an thok tthan nak cu a si. Credit: Vapualauaw
RELCHAP: CDF-Mindat in Salai Thang Hung Thang a Nunnak a Liam
————
Nizaan in aa thawkmi Mindat-CDF le SAC ralkap kahdohnak ah Mindat-CDF lei in Salai Thang Hung Thang a nunnak a liam, tiah kan theih.
SAC ralkap nih Mindat he meng 18 hrawng a hlatnak Kyaukhtuh khua in 155 MM miakpi in an kah hna caah Salai Thang Hung Thang hi a nunnak a liam i a dang minung 4 hliamhma an pu hna. Hliamhma a pumi minung 4 hi a zualhma cu an si lo i thinphan awk a um lo. Mindat ah SAC ralkap he hmaitonh ngaingai in an i kap lo i, a lang tu in SAC ralkap nih miakpi in pehzul in an rak kah hna.
SAC ralkap nih an tlaihmi Mindat khuami minung 5 an thlah hna lo caah Mindat-CDF le SAC ralkap karlak biaruahnak cu May 12 ah a rawk i, cu caan thawk cun kahdohnak a hun i thawk tthan hi a si. Credit: The Chin Journal
Thawngdang Reltthan: Kan Pu Donald Trump Nih Biden Cu Israel Kongah A Mualphoh Cikcek
Kan theih cio bangin Israel ram cu May 7 in buai hram ai thok i May 10 ah Palestine tapung Hamas pawl nih cun rocket in Israel cu an kah lengmang hna. Cu ruangah Israel zong an thinhung nak a linh chin lengmang ve caah Palestine tapung Hamas pawl umnak Gaza cu vanlawng in an kah ve hna.
Gaza i Hamas pawl umnak innpi cu Israel nih puak lakin a kah i a pawngkap inn dang vialte zong an rawk dih ruangah Palestine mipi 48 an thi cang i cu hna lakah ngakchia 10 an i tel. Hamas pawl nih rocket in kahmi cu Israel ralkap nih Drone in an rak kham lengmang hna nain voikhat cu Jerusalem khuapi chungah a tla tthiamtthiam i Israel nu pahnih an thi ve.
Hliamhma tuar mi khat lei khat in an tam ngai cang caah ikahdohnak cu tuni May 12 tiang a dai kho rih lo. Hi ruangah UN zong nih an lungdong ngai cang caah biakhahnak zong an ngei cang. Palestine lei in Israel cu sual an phawt hna i Israel lei nih Palestine cu thiam lo an can ter ve hna. A hohmanh hnukir an i tim lo i thiam an i can ter veve.
Hi bantuk dirhmun ah Israel rak dirkamh zungzaltu US president hlun/tthing Donald Trump cu dai tein a rak um kho ve ti lo i US president a ttuan cuahmah mi Biden cungah mawphurhnak kong cu a chim. Trump nih cun ” Biden hruaining cang thiam lo tuk ruangah vawlei cung cu a buai deuhdeuh hi a si ko. Tutan i Israel ram buainak zong hi Biden laktlak lo tuk ruangah a si. American cu zeitik caan paoh ah Israel a dirpi peng ding a si i cathanh ttha tein a chuah ding a si. Palestine nih rocket hmangin Israel an kah mi hi ngolter cang ding a si i US nih cun ngamh taktak in Israel hi a dirpi peng dingmi a si,” tiah an ti.
Biden le a kuttang pawl cu tutan Israel le Palestine buainak ah cathanh felfai zei hmanh an chuah kho rih lo i Israel tu Palestine lehrulh ve lo dingah an kham hna. Palestine lei cu zei hmanh chim hna loin Israel lawng cu ti an khammi hna cu Israel leiin an rak duh ve nem mam lo hi a si. Credit: Vapualauaw
Note: Thawngpang a kenkip kan khawmhsuat tawn i Careltu zong nih a tam tuk ti’n vuivai lo tein rak kan rel piak ulaw, Laimi nih cun zei tluk in dah ca kan rel tam a herh timi kha biatak tein kan i tleih chih ahau ngaingai mi a si. Ca na kan rel piak mi cungah le Angei tu hna cung zongah lawmhnak tampi kan ngei. Share zong in rak kan bawm tthan rih.
