Related Articles
Hakhathar ah SAC Ralkap nih Minung 6 an Tlaih hna, Tangka 250,000 MMK an i Kalpi Than
——–
Nihin zaanlei sml. 5:30 hrawng ah SAC ralkap nih Hakhathar ah minung 6 an tlaih hna i, inn pakhat ah tangka 250,000 zong an lak, tiah thawng kan theih. Tlaih a tongmi hna cu: (1) Pu Ca Kung (2) Pi Ram Iang (3) Pu Bawi Hram (4) Pu Ram Ceu (5) Nu Ni Tin Thluai (6) Pa Thang Thang hna an si.
Hakhathar Baptist Church zong SAC ralkap pawl nih an luh hnawh. Thilri an hrawhmi le an lakmi a um le um lo theih a si lo. Minung 6 an tlaih hna lio ah inn pakhat ah tangka ting 250,000 zong an lak, tiah Hakhathar khuami pakhat nih a chim. Nizan zong ah Hakhathar ah minung 12 an tlaih hna i minung 10 an thlah tthan hna.
Nizan mi an tlaih lio ah Hniarlawnthar ah Pu Ngun Hup te inn SAC ralkap nih an bauh i tangka ting 10 le a dangdang thilri tampi zong an lakpiak hna.
Credit: The Chin Journal
RelChap: NGO (Non-Government Organisation) 200 Leng Nih Myanmar Ralkap Hrem Dingin UN AN Nawl
Amnesty International le NGO(Non-government Organisation) 200 leng nih Myanmar ram i Ralhrang nih zohchia ngai in an cawlcangh mi cungah le daih itim lo in nikhat hnu nikhat an zual chin lengmang caah Myanmar Ralkap nih hriamnam zei hmanh an laak luh khawh lo nak dingah United Nations sinah nawlnak an tuah.
” UN Security Council nih hin nawlngeihnak hmangin, Myanmar ralkap nih Civil mi an thah lengmang hna caah biatak tein an daihkhawhnak dingah rianttuan caan a cu cang,” ti’n Amnesty International i UN advocate Lawrence Moss nih cun a chim. Moss nih cun ramdang dang hna nih aw kaa lawng i Myanmar ralkap heh tiah mawhchiat lawng cun zei hmanh santlaihnak a ngei lo, ti’n a peh tthan.
Myanmar ralkap hremnak nak dingah hin ramdang dang hna nih meithal kuan pakhat zong cawk ter lo hna dingin an duhnak zong an langhter ” Ralthuam le hriamnam an laakluh khawh lo nak dingah le thisen a chuahti nak hnga lo dingah Security Council nih hin biatak tein a ramkip ah rian a ttuan i a leh hna a hau cang.” an ti.
February nikhat i ralkap nih uknak an laak hnu, duhlonak langhter in civil mipi hna minung 770 leng cu Ralkap kut in an thi cang i, minung 4,500 lengluang hi tlaihkhih an si. Hi lio caan zong i Myanmar ralkap nih cun mipi hna cu buainak a siamtu an si tiin a thi zat hmanh tthittha in an langhter duh lo.
Ralkap nih nawlngeihnak an laak hnu, February 24 khan NGO 100 leng nih UNSC sinah Kawlram ralkap ralthuam le hriamnam kuat tawn mi cu ngol ter dingin an rak nawl cang hna hi a si. Security Council zong nih hin Myanmar ram kongah hin cathanh cu a rak chuah cang ve, ralkap hna cu Democracy phunglam zulh ding tibantuk le hramhram in le tharum in mipi lehrulh hna lo ding ti mi kha si i, hmanhsehlaw cu cathanh nih cun zeihmanh an hna ah alut loh ti cu hmuh cio a si.
NGO hna nih cun cathanh chuah lawng bak cun a caan a si ti loh tiin, UNSC nih hin lamdang kawl in a tak in a cawlcangh a hau cang, tiah an ti.
Credit: Vanglaini
ThawngDang Reltthan: Thantlang Upa Pawl le Ralkap Pawl Ton Biaruahnak an Ngei
——–
Nizan May 6 ah Thantlang khua upa 4 le Thantlang hrambunh SAC ralbawi (Major) le uknak lei zung upa cheukhat ton biaruahnak an ngei, tiah ttuanvo ngeitu sin in thawng kan theih. Anmah SAC ralkap lei nih tonnak ngeih ding in Thantlang upa an sawmmi hna i, Thantlang mino pawl cawnpaik ding in le atulio Thantlang humhimnak kong pawl ralkap nih a kan hal, tiah tonnak ah aa telmi upa pakhat nih The Chin Journal ah a chim.
“Thantlang mino pawl khoika dah an kal dih tiah a kan hal i, mino pawl hi rak kan cawnpiak u a kan ti. Mino pawl an kalnak kan thei ve lo tiah kanmah lei nih fianghlang tein kan leh ve hna,” tiah a cunglei upa nih a chim. Cun, Thantlang humhimnak kong he pehtlai in zei bantuk in rian kan ttuan ah dah a tthat lai tiah ralkap lei nih an hal hna i Thantlang upa lei nih minung tlaihkhihnak nan tuahmi pawl hi ngol u law, tlaihmi pawl zong hi vuak len loin thlah colh hna u law a ttha lai, tiah an leh hna.
“Thantlang khuachung humhimnak ca ah zeitin rian kan ttuan ah a tthat lai tiah a kan hal i, CDM a tuahmi pawl tlaih loin um le nan tlaihmi minung pawl vuak len loin nan um ah a ttha lai kan ti hna. Aruang cu Laimi cu meithal tampi a ngeimi kan si i, sa zong a kap lengmangmi kan si. Meithal konglam a theimi kan si. Cucaah, nanmah lei nan daih lo ahcun Mindat ah a chuakmi thil bantuk hika zong ah a cang lai lo ti khawh a si lo tiin kan leh hna i an lau ngai ve,” tiah a cunglei upa nih a chim chap.
Nizan tonnak ah Thantlang le Hakha karlak i ralkap motor bomb puah hnawh a tonmi kong zong an hal hna. Thantlang mino an si lai tiah SAC ralkap nih an zumh. “Nizaan Hakha-Thantlang karlak ralkap motor bomb puah hnawh a tonmi kong ah Thantlang mino an si lai tiah a kan ti. Kannih nih cun online zong ah an ttial ko kha, CDF-Hakha nih pei kanmah nih kan tuahmi a si an ti ko kha tiah kan leh hna,” tiah a cunglei upa nih a chim chap.
Thantlang mino Roro le Amang an tlaihmi hna zong thlah colh ding in an hal hna i Roro le Amang cu nizaan zaanlei ah SAC ralkap nih an thlah colh ve hna.
The Chin Journal
Note: Thawngpang a kenkip kan khawmhsuat tawn i Careltu zong nih a tam tuk ti’n vuivai lo tein rak kan rel piak ulaw, Laimi nih cun zei tluk in dah ca kan rel tam a herh timi kha biatak tein kan i tleih chih ahau ngaingai mi a si. Ca na kan rel piak mi cungah le Angei tu hna cung zongah lawmhnak tampi kan ngei. Share zong in rak kan bawm tthan rih.
