Related Articles
Hlanchan tein ngeih mi Pupa Ro Lai Meithal chuh cu ka ngaithiam kho lai lo: Laipa Chinram ah Chin miphun nih hlan kan pupa chan in rak ngeih mi rosung, Lai Meithal chuh le laakpiak cu zeitihmanh in ka ngaithiam kho lai lo, tiah Chinram le Mizoram ramri khuasa Laipa pakhat nih a chim. SAC phu nih nawlngeihnak an laak hnu Chin Ramkulh khuapi le khuate ah meithal le hriamnaam dangdang chuh le laak a um ca ah atu bantuk in upa pakhat nih a chim hi a si.
“Kan hngalh cio bang, kannih Chin miphun cu midang kha an thinhunter le i sikvelh tik ah hriamnaam, chai, fei le naam, meithal tibantuk a baan (la) mi kan si lo. Ramvaihnak ah kan hman mi a si. Cun, hlanchan ah Chinram tuupi chung hna ah sahraang an rak tam i mah pum i vennak zong ah hriamnaam hman a si. Midang harnak pek nakding ah hman mi a si lo. Ro a si ca ah felfai tein kan kenkawi mi a si. Cucaah, kan khuaram tiang ra in an hung kan chuh ahcun ka ngaithiam kho hna lai lo,” tiah upa pakhat nih The Hakha Times ah a chim.
Hlanchan zong ah meithal chuh hi a rak um lo i cheukhat cu license zong tuahpiak a rak si. 2021 May 25 zong ah Falam Peng Lumbang khuami meithal zuun 20 tluk cu SAC ralkap nih an inn luhhnawh in an laakpiak hna, tiah kan theih. Credit: The Hakha Times
A Dang Reltthan: Kawlram ralkap nih February 1 in rampi nawlngeihnak an laak hnuah kum tling lo ngakchia 73 hi an thah cang hna timi kongah minlanghternak felfai te he NUG nih cun mipi sinah theihternak an ngeih hna. Ralkap thahmi ngakchia 73 chungah nu 9 an i tel i pa 63 an i tel. Mipi an thahmi dilak/zate hi 850 tluk an phan cang.
Kum tling lo ti a si ruangah kum 18 in a tanglei paohpaoh a huap dih. Cazin an laakmi hi February 15 in May 15 tiang ta a si. Tthenkaht cu duhlonak langhter in zamlawhnak ah kah thah mi zong an um i tthenkhat cu inn chung ah um sawhsawh cuahmah ko lio i thah mi zong an um. Tthenkhat hna cu inn pawngkam hrawng i aa chokvaak lio mi hna an kah hna tibantuk a si. NUG nih hin ralkap nih thahmi ngakchia 73 an um cang tiah an langhter mi ah Ralkap nih khuapi ning pi nih a dohmi Demoso le Khani khua i ngakchia thimi cazin an telh manh rih lo nak kong zong an tarlangh chih.
Ralkap nih ngakchia 73 an thahnak hmunhma pawl cu Myintkyina ah 1, Kale ah 2, Shwebo ah 1, Mungzua ah 2, Tilin ah 1, Mindat ah 3, Yaysakyo ah 1, Magway ah 1, Taungdwin ah 1, Pathein ah 5, Yangon ah 13, Daawei ah 2, Launglon ah 1, Kawthaung ah 2, Myeik ah 2, Mawlamyine ah 1, Hpa-an ah 2, Bago ah 4, Hpapun ah 1, Myeiktila ah 1, Windwin ah 1, Myingyan ah 6, Mandalay ah 17, Madaya ah 1 le Muse ah 1 ti’n NUG nih cun an rak tarlangh mi cu a si. Credit: Vapualauaw
