Related Articles
India rampi ah cawn ni 5 ah khan zawtnak thar an hmuh mi zat cu 4,14,554 an si i, ni hnih chung cu a peh in zawtnak thar hi nuai 4 leng cu hmuh an si.
Ni 10 liam cang mi chungah khan India rampi ah Covid-19 ruang i a thi mi hi 36,110 an um manh i, suimilam pakhat chungah mi 150 tluk hi an thi lai tiah ruahdamh a si. Ni 10 chungah khan zawtnak ruang i a thi mi hi 3,000 leng cu an um peng ti a si. Cawn ni 5 ni ah khan rampi chungah zawtnak ruang i a thi mi hi 3,927 an si cang tiah theih a si.
India rampi nih hin ni 10 chungah Covid-19 ruang i a thi mi zat a tam bik phan in cazin thar cu an siam hi a si. Tuan ah khan cun US nih hin a tambik Cazin dirhmun an phanh lio ah khan ni 10 chungah mi 34,798 bak te an rak thi i, ni 10 chung tho ah khan Brazil rampi ah mi 32,692 an rak thi ve cang tiah World Health Organisation(WHO) nih cun an chim.
Ram chungah zawtnak a ngei mi zat hi minung 36,45,164(ngei cuahmah lio mi) an um cang i, hi zawtnak angei lio mi ah hin arak ngei cang mi chung thawk in 16.96% cu an tling cang i, zawtnak in a dam mi hi 81.95% ah a van tla deuh ve ciammam. Hi zawtnak ai thihpi mi zat hi 1.09% cu an tling ve. India ram chungah Covid-19 zawtnak a kai mi hi kum 2020 August 7 ah khan nuai 20, August 23 ah khan nuai 30, September 5 ah khan nuai 40, September 16 ah khan nuai 50, September 28 ah khan nuai 60, October 11 ah khan nuai 70, October 29 ah khan nuai 80, November 20 ah khan nuai 90 bak phan in December 19 ah khan cun million cu an luan ve. A tu a voihnihnak(second wave) ah hin cun a kai thluahmah i tukum May 4 ah khan zawtnak a ngei mi zat cu 2 million nak tam an phanh hi a si.
ICMR nih cun May 6 tiang Covid-19 test nak hi voi 29,86,01,699 tiang a ngeih cang hna i, cawn ni 5 ni ah khan voi 18,26,490 tiang test nak an tuah tthan hi a si. Union Health Ministry nih an langhter ning ah cun State 10, Andra Pradesh, Maharastra, Uttar Pradesh, Delhi, Karnataka, Kerala, Haryana, West Bengal, Tamil Naduh le Rajasthan ah hin ram chung i zawtnak hi zakat chungah 70% hi cu hmuhchuah thar an si.
RELCHAP: CDF-Kanpetlet nih SAC Ralkap le Palik Pawl Ralrin Peknak Ca Chuah
———-
May 8 ah CDF-Kanpetlet nih SAC ralkap le palik pawl ralrin peknak ca an chuah i SAC nih an zulh lo ahcun kan kah hna lai, tiah ralrin peknak an ttial.
(1) Mipi thinphang le thalau in umter ding in khuachung ah ralhriam he i chawhvah lo ding. (2) Zaan ah lamkham le minung zalennak hnahnawh i checknak tuah lo ding. (3) CDM ah aa telmi zung rianttuan pawl hnahnawh, tlerhkhawn le tlaihkhihnak tuah lo ding, tiah CDF-Kanpetlet nih an langhter.
Credit: The Chin Journal
Thawng Dang Reltthan: Mizoram Phaisa Harsatnak Kongah Bia Dik Chim Dingin ZLP Nih CM Zoramthanga An Phut
ZPM Legislature Party(ZLP) hna nih, Chief Minister le Finance Minister Zoramthanga cu Mizoram Cozah phaisa i a dirhmun cu dik tein chim dingah an phut i, Serchip chung by-election i thimnak ah a tling mi Lalduhoma cu hmaizarh chung hrimhrim ah laak dingin Assembly speaker Lalrinliana Sailo cu an hal.
Nizan ah khan ZLP nih cun cathanh chuahin, MLA hrang i Lalduhoma laak ding i Assembly Speaker nih zei hmanh biafianh um lo in a tthulh mi cungah an lungtlin lonak an langhter i, ” Hmaizarh ah hin, fimkhur tein, MLA hrangah an laak hrimhrim nak hnga kan nawl ko hna,” an ti.
ZLP nih cun, Mizoram cung i a lu bik a si mi Zoramthanga i acozah phaisa dirhmun hi mipi sinah fiang tein a chim bal loh tiah chim in, ” a duhnak lei ahcun phaisa hmang kho ngai ttung i Cozah rianttuantu hna sinah phaisa khawlh cu ram hruaitu sining a si lo ti kan ruah caah dai te i kan um khawh lo nak a si,” an ti i, ttanrualnak a tthat deuh nak hnga le CM Relief Fund i phaisa a pe duh mi hna caah thinlung zaang tein an pek khawh nak hnga mipi sinah biachim in Cozah aharsatnak hna cu chimfiang dingin Chief Minister cu an phut hi a si.
Kum 2021-22 budget ah SEDP hrang i nuai 40,000 chiahmi cu Covid-19 ruang i ei le din ah aharsa mi le ral zaam pawl ca i VTF/LTF pawl ttanpi nak ding caah hman dingin ZLP nih cun an phut hna, Mizoram State Health Care Scheme phaisa kuang i nuai 20,000 leng a um mi cu Covid-19 zawtnak angei mi hna nih alak tein izohkhenhnak ca i an tinco cio nak hnga hman dingin an hal tthan hna.
ZLP nih cun, ” Kan mah i kan duhsak mi hna sin lawng i rian kawl piak hi ngol cang sehlaw, mipi hrang ca cio ah hin luang cang sehlaw ti hi kan CM nih kan theih piak cang seh tiah kan phut bak mi a si,” Tu lio Covid-19 hrang caah acozah nih hmalak dingin ai tinhmi cu kan dirpi i, ttanpi aherhnak ah timhcia kan si ti’n ZLP nih cun, ” Covid-19 ruangah harsatnak tete tampi kan tong rih lai ti theih ko buin MLA fund chungin a phaisa fangin LTF/VTF hna le mipi harsat a tongmi ttanpi khawhnak dingah khua zong nan kan khaan pi lai tiah cozah zong kan in nawl hna” tiah an ti.
ZLP cathanh ahcun, kum 2012-22 budget cu hman a si hlanah hi hrirai ruangah ruahfel tthan ahauh lai caah, a si nak te i hman a si khawh nak dingah Assembly session auh i, budget appropriation (siamtthatnak) ngeih sisehlaw tiah an duhnak cu an chim tthan.
Note: Thawngpang a kenkip kan khawmhsuat tawn i Careltu zong nih a tam tuk ti’n vuivai lo tein rak kan rel piak ulaw, Laimi nih cun zei tluk in dah ca kan rel tam a herh timi kha biatak tein kan i tleih chih ahau ngaingai mi a si. Ca na kan rel piak mi cungah le Angei tu hna cung zongah lawmhnak tampi kan ngei. Share zong in rak kan bawm tthan rih.
