Related Articles
Kan theih cio bangin Israel ram cu May 7 in buai hram ai thok i May 10 ah Palestine tapung Hamas pawl nih cun rocket in Israel cu an kah lengmang hna. Cu ruangah Israel zong an thinhung nak a linh chin lengmang ve caah Palestine tapung Hamas pawl umnak Gaza cu vanlawng in an kah ve hna.
Gaza i Hamas pawl umnak innpi cu Israel nih puak lakin a kah i a pawngkap inn dang vialte zong an rawk dih ruangah Palestine mipi 48 an thi cang i cu hna lakah ngakchia 10 an i tel. Hamas pawl nih rocket in kahmi cu Israel ralkap nih Drone in an rak kham lengmang hna nain voikhat cu Jerusalem khuapi chungah a tla tthiamtthiam i Israel nu pahnih an thi ve.
Hliamhma tuar mi khat lei khat in an tam ngai cang caah ikahdohnak cu tuni May 12 tiang a dai kho rih lo. Hi ruangah UN zong nih an lungdong ngai cang caah biakhahnak zong an ngei cang. Palestine lei in Israel cu sual an phawt hna i Israel lei nih Palestine cu thiam lo an can ter ve hna. A hohmanh hnukir an i tim lo i thiam an i can ter veve.
Hi bantuk dirhmun ah Israel rak dirkamh zungzaltu US president hlun/tthing Donald Trump cu dai tein a rak um kho ve ti lo i US president a ttuan cuahmah mi Biden cungah mawphurhnak kong cu a chim. Trump nih cun ” Biden hruaining cang thiam lo tuk ruangah vawlei cung cu a buai deuhdeuh hi a si ko. Tutan i Israel ram buainak zong hi Biden laktlak lo tuk ruangah a si. American cu zeitik caan paoh ah Israel a dirpi peng ding a si i cathanh ttha tein a chuah ding a si. Palestine nih rocket hmangin Israel an kah mi hi ngolter cang ding a si i US nih cun ngamh taktak in Israel hi a dirpi peng dingmi a si,” tiah an ti.
Biden le a kuttang pawl cu tutan Israel le Palestine buainak ah cathanh felfai zei hmanh an chuah kho rih lo i Israel tu Palestine lehrulh ve lo dingah an kham hna. Palestine lei cu zei hmanh chim hna loin Israel lawng cu ti an khammi hna cu Israel leiin an rak duh ve nem mam lo hi a si. Credit: Vapualauaw
RELCHAP | | No Than Kap: Midang Nih Karkhat An Kar A Si Cun Kan Nih Tlangmi Hna Nih Cun Karhnih Thum Kan Kar Ahau
CNF hruaitu hlun a rak simi Pu No Than Kap nih cun kum 70 renglo ram buainak lakin Chinmi kan chuahkhawhnak ding a timi ah mipi zawnruahnak le dawtnak zong a ngei i ca ttha tein nan rel hnu lawngah pumpak ruahning cio cu nan rak langhter ve lai tiah a ti chih.
Pu No Than Kap nih cun “Independence kan ngah hnuah Ralkap nih Rampi uknak voi 4 (1958, 1962, 1988, 2021) an laak ruangah, Kawl miphun hrangah, zaanttim bangin Nika a liam nain Van ah thlapa le arfi ceu an rak lang tthan lai. Ei le din nun khuasakning ah rethei lakin an um ko nain phunglam, nunphung, caa, biaknak le ram a karh in a kau chinchin i “Rampi uktu” sinak an co rih. Sihmanhseh, tlang mi caah, an boot kedanh in an kan pal maw, sawngkoh phanat le kedilsang phanat in an kan pal maw, ai dannak pakhat hmanh um lo. Kan hrangah khuazing bantuk in kan zohthla mi Ninu chim lo Thlapa vang hmanh hmuh ding a um lo. Kan nunphung, ca, pupa ram kan ngeih ning, mahte nawlngeihnak le zalennak cu an tlau thluahmah.
“A faakbik cu kan pupa chanah kan lu thlungah samfang lawng a rak um nain, a tu ahcun kan lu cungah lungzi fenh, hni fenh, liang i a tleu in tleu mi bo tibantuk lawngah khan an rak i buaipi. Kan hrangah an boot kedanh aw cu, ‘Kiosa huk dumdo le Utawng thla’ khawn awn thawng tibantuk khi an lo. ‘Pualva thla’ khawn awn thawng tibantuk in ngaih nuam pakhat hmanh an um lo.
“Cu ruangah, phairawnmi hna nih kar khat an kar a si ahcun kan nih Tlangmi( a hleice in Chin) nih cun kar hnih thum kan kar ahau, an mitkuh a thawt lio caan ah zaanvar mitchinh loin khua kan ruah a hau, anmah le anmah an buai i thisen a chuah ko zongah ‘zawng lak i ngau kong’ bantukin an lakah tel ve loin ‘uipi ti lian zoh’ in rak cuanhthiam caan a hau. Zeicatiah Tlangmi chungah siseh, Chin lakah siseh, an kan sikter a tamtuk, an kan tthenter lengmang i anmah innpi Insein ral kut in kan thi phah. Thong i thlak menmen dingah kan rak dirpi hna khi a si.
“Sihmanhseh an kan remtthen lengmang i remawk caan a phak tikah an kan philh, an kan chiah ta tthiamtthiam timi philh lo ah a ttha. Culawngah, kum 70 renglo an thilrit phurh ding i hngawngkual an kan bunh mi le lam hla phan kho lo dingin kan kerek ah cikcin an kan khihmi kan phoih khawh lai. Cutin chuah man ngei “Mizalen” kan si kho tthan lai, kan miphun a dam lai, Chinram fing le tlang kipah ttihphanmi ngeih lo hnangam le nuam cen in Pualva a lengtthan kho lai” tiah a ti.
