Related Articles
CDF nih SAC lei Tang Cachimtu Saya/Sayamate Ralrin an Pek Hna
———–
“SAC nih on a timhmi sal fimcawnnak thazaang a petu saya/sayamate le CDM ah aa tel lomi zung rianttuan vialte, SAC lei ttang in nan um peng rih a si ahcun CDF nih a herh ning in fak piin dantatnak kan tuah lai,” tiah ralrin peknak cathanh ah CDF nih an ttial.
Credit: The Chin Journal
Relchap: Lai Tlangval Pahnih Htilin Khua Pawng ah Thah an Tong
————
Gangaw peng, Oh-hlah khua ah a ummi Lai tlangval pahnih Cung Zung Thang (kum 24) le Jonathan (kum 17) cu May 4 ah Gangaw peng, Htilin khua lonh ah thah an tong, tiah Oh-hlah khua Laimi pastor saya Van Uk Thang nih The Chin Journal ah a chim.
Cung Zung Thang, Jonathan, Tha Nge le a dang an hawipa pakhat hi Haa ser thiam an si i, Magwe ramtthen chung khua kip ah i chok in haa a sermi an si. Htilin hrawng ah SAC ralkap le mipi kahdohnak a um tik ah an umnak Oh-hlah ah rak tlun ding in May 4 ah an rak i thawh.
“Htilin khua lonh i SAC ralkap le mipi an i kah lio he an i tong i an pali ning in an tlaih hna. Cung Zung Thang le Jonathan cu an thah hna i mei in an khangh hna,” tiah saya Uk nih a chim. “Tha Nge hi a zaam kho i nihin zinglei ah Oh-hlah khua ah a takpum hliamhma khat he a phan. Cun, an hawipa pakhat hi a thi cang rua tiah an kaltak. A rak thi lo i pawngkam khuami nih an bawmh i khua lei phone an kan chawnh hnu ah nihin chun ah khan kan vung lak,” tiah min phuan duh lo Oh-hlah khua upa pakhat nih The Chin Journal ah a chim ve.
Atulio Htilin hrawnghrang kahdohnak ruang ah buai tuk in a um lio a si i, mithattu hna i SAC ralkap maw an si, mipi lei dah an si timi zong fiang in an thei hna lo. A rak zaam khomi Tha Nge le a hawipa zong hi hliamhma fak ngaiin an tuar caah biahal awk zong an ttha lo, tiah saya Uk nih a chim.
Thah a tongmi tlangval pahnih lak ah Cung Zung Thang hi Lungraang khuami a si i, a nulepa hi Oh-hlah khua ah hlanlio piin a rak pemmi an si. Ngaihchiatnak a tongmi Cung Zung Thang le Jonathan te chungkhar tthutpinak zong tu zaan ah kan tuah, tiah saya Uk nih a chim chap.
Credit: The Chin Journal
ThawngDang Relrih: Hakha University ah Siangngakchia a Kaimi an Um Lo
———–
Nihin May 5 hi Myanmar ramchung University on dih ding in SAC nih nawl a chuah nain Hakha University ah cun sianginn a rak kaimi siangngakchia ahohmanh an um lo, tiah Hakha University sayakyi Dr. Lian Za Khup nih The Chin Journal ah a chim.
“Nihin sianginn a rak kaimi siangngakchia an um lo. Saya/sayamate cheukhat cu an um ko i cacawng kho ding dirhmun cu kan si ko. Kai a duhmi an um ahcun rak kai khawh a si,” tiah a chim. Hakha University Students Union i an Chairman a simi Salai Shing Mang zong nih “Nihin Hakha University ah siangngakchia ahohmanh an kai lo,” tiah a chim ve.
SAC nih nihin thawk in University pawl on a timh nain Myanmar ramchung University kip ah ralkap kut tang sal fimcawnnak doh in University kai loin an um hna. Aralaimi May 24 zong ah khin Myanmar ramchung sianginn apnak tuah a si lai, tiah SAC nih thawng a thanh.
Credit: The Chin Journal
Donghnak Ah Pakhat Reltthan: Thla Khat Fai ah KNU nih SAC Ralkap 200 Dengmang an Thah Hna
——
March 27 in aa thawkmi Karen hraimtlai KNU le SAC ralkap karlak kahdohnak ah KNU nih SAC ralkap 194 an thah hna, tiah KNU Brigade (5) nih an chim.
March 27 in atu May thlathawh tiang ah KNU le SAC ralkap karlak kahdohnak voi 407 a chuak i cu kahdohnak pawl ah cun SAC ralbawi 5 telh in a dang ralkap 194 an thih hi a si. KNU lei zong nih ralkap 9 an nunnak a liam i a dang ralkap 10 hliamhma an pu hna.
SAC ralkap nih vanlawng in miakpi in khuami an kah hnanak ah sualnak ngei lo khuami 14 an nunnak a liam i, a dang khuami 28 hliamhma an pu hna. KNU Brigade (5) nih an chim ning ah SAC ralkap nih vanlawng in KNU cu voi 27 an kah hna. Cun, lamhlat in miakpi in voi 47 an kah hna. Khuami umnak inn le lo tibantuk pawl SAC ralkap nih ningcang loin maikpi in voi 575 an kah, tiah an langhter.
Kayin le Thai ramri ah a ummi SAC ralkap sakhaan KNU nih an lak i Thailand lei in SAC ralkap sin eidin tirawl phorhnak lampi zong an kham. Cucaah, SAC ralkap pawl cu khuate ah an lut i khuami pawl tangka, facang le innzuat sattil pawl hramhram in an chuh hna, tiah KNU nih an chim chap.
SAC nih Myanmar ram uknak an chuh hnu Kayin ramkulh chung kahdohnak ruang ah Kayin khuami tampi zong Thailand lei ah ralzaam dirhmun in an zaam hna.
Credit: The Chin Journal
Note: Thawngpang a kenkip kan khuamhsuat tawn i Careltu zong nih a tam tuk ti’n vuivai lo tein rak kan rel piak ulaw, Laimi nih cun zei tluk in dah ca kan rel tam a herh timi kha biatak tein kan i tleih chih ahau ngaingai mi a si. Ca na kan rel piak mi cungah le Angei tu hna cung zongah lawmhnak tampi kan ngei. Share zong in rak kan bawm tthan rih.
