Related Articles
India ram chung i tapung tamcemnak pakhat Manipur hrambunh Valley-based Insurgent groups(VBIG) timi tapung pawlkawmh mi hna cu Myanmar ralkap he iremnak an ngei i Myanmar ram le India ramri ah sakhan ngei an si i Myanmar ram an um man zong thla chiar te cu Myanmar ralkap sinah an pek tawn hna.
Manipur hrambunh tapung lakin pawlkawmhnak ah mithar bik cu Pabei United National Liberation Front(UNLF) an si i ipawlkawmhnak ah a hlun bik mi hi VBIG an si. Anmah hi meitei miphun le zo miphun an si pinah kuki lei deuh an si hna. VBIG chungah UNLF(Pambei), UNLF(Koirang), People’s Liberation Army, People’s Revolutionary Party of Kangleipak, PREPAK(Progressive), Kanglei Yawol Kanna Lup le Kangleipak Communist Party ti’n ipawlkawmhnak 7 an um.
VBIG chungah tapung 700 in 800 karlak an um i Manipur chungah tangka khawl in mipi zong hnahnawhnak a pe ngai mi an si. Anmah hi Myanmar ramchung ramri ah Myanmar ralkap hnatlaknak in sakhan ngei in um mi an si. An um man cu US dollar in Myanmar ralkap sinah an pek tawn hna. May 24 ah khan Myanmar ralkap le VBIG hruaitu 14 hna cu ramri ah an i tong i Myanmar ralkap nih cun VBIG pawlkomhnak 7 chungin pawlkawmhnak pakhat ah minung 30 cio cu Myanmar ralkap hrangah rianttuan ding in le mipi kilvengtu CDF pawl do ding in an phut hna.
Mah cu an duh lo ahcun VBIG le Myanmar ralkap karlak remnak cu a ngol lai i Myanmar ramchung ah um kho ti lo ding dirhmun an si lai. Cu ti a si ruangah Myanmar ralkap i sawmnak cu VBIG lei in an pompi hna hnuah Myanmar ralkap fawm(uniform) hruk in ralkap an bawmh hna. Asinain, VBIG chungtel 4 nih cun Myanmar ralkap i sawmnak an cohlan lo ruangah Myanmar ramchung i an sakhan cu an chuah tak ve.
Cu ti rualrual cun Kuki hriamtlai pawl nih cun mipi lei ttang in Tamu mipi kilvengtu pawl sin ahcun ralkap cu an doh ve hna. Kan hnung i Tamu pengah mipi kilvengtu nih ralkap 15 an kah that timi kong zongah Kuki hriamtlai hna mipi lei ttang in a rak i tel ve mi an si. Ralkap 15 a thi mi lakah meitei 4 an i tel i cu lak ahcun Manipur tapung VBIG chungtel an si tiah Aizawl Post nih cun an tarlangh. Credit: Vapualauaw
