Related Articles
Tubantuk dirhmun Kawlram buainak ah ralkap pawl theihtawk chuahin a do pengtu KIA le KNU cu kawlram mipi nih uar bik mi an si i an thawngpang hna zong siseh a karh cak ngaingai. Cu tikah fimkhur ngai ahau ve i, anmah uar tuk ruangah a dik lo mi lei hoihin thawngzamh tete zong a um ve len.
Cu chung cun Model Khun Phone cu KIA ralbawi muidawh tiah thawngzamh a tam ngaingai i, amah hrang le a chungle pawl hrangah KIA min putin lar cu a him lo ngai ruangah KIA rawlbawi bantukin hmanthlak tar i thawngzamh pawl kha cu rak tarlangh ti lo dingin nawlnak a tuah. Kha caan lio ah khan cu amah cu KIA siloin KIA fawm(uniform) aa hruk i hla fungkhat ah model a rak ttuannak a si tiah theihternak zong a tuah.
Model Khun Phone nih cun “KIA fawm in hman kai thlak tan kha cu ram a tthat lio i Music Video ka ttuan lio a si. Tubantuk dirhmun ah keimah cu KIA ralbawi bangin tarlangh kha cu ngol cang hram uh tiah kan nawl hna. Hi bantuk i tarlangh hi cu keimah hrangah a him lo timi rak ka theih piak hram uh. KIA ralbawi bangin lar cu ka caah a him lo ngaingai nak a si.” tiah a ti.
Model Khun Phone cu 2020 Mister TCU Myanmar ah Bhamo khuapi aiawh in arak i zuam mi le pakhatnak laksawng zong a rak ngahtu a si. Tutan i nawlnak a tuahmi cu Media kip atheihter hna hnuah amah pumpak FB zongah a tarlangh.Credit: vapualauaw
RELCHAP: Mindat ah “Ralkap Uknak Phung” (Martial Law) an Chuah Nihin May 13 thawk in Mindat peng chung ah ralkap uknak phung (Martial Law) hman ding in SAC nih nawlpeknak ca a chuah, tiah tu zaan sml. 8:00 ah MRTV nih a chim.
May 12 zanlei in CDF-Mindat le SAC ralkap karlak biaruahnak a rawk i cu caan thawk cu atu tiang kap hnih karlak pehzul in kahdohnak a um. CDF-Mindat lei in kum 18 tlang Than Hung Thang a nunnak a liam. SAC ralkap lei zong in a thimi an um an ti nain fiang in theih a si rih lo. Credit: The Chin Journal
Thawngdang Reltthan: Dalaan Nih CDF-Mindat Umnak Hmun An Chimh Hna Caah Mipi Kilvengtu An Temtuarnak A Si Chin ramkulh Mindat khuapi pawngte ah Mindat mipi kilvengtu le ralkap ikahdohnak faak ngaingai in ralkap nih Mindat khuapi cu laak an timh cuahmah lio a si tiah theih a si. A hlan hmasa deuh i an rak i do ah khan cun ralkap leiin minung 30 bakte an thi i Mindat mipi kilvengtu lei cun a thi mi an um hraw lo.
Tutan an idohnak ahcun ralkap lei nih thazaang tam ngai an chuah i lamhla kahnak meithal ngan hmangin Mindat mipi kilvengtu umnak lei cu an kah thluahmah ko ti a si. Cu bantuk meithal ngan an hmanmi cu hmanthlak i kan rak langhter mi bantuk kha a si. Ralkap pawl cu Magwe ramtthen Kyauk Htoo khuapi vanlawng ttumnak ah hmunkhuar mi an si i umhmun an khuarnak hmun in meng 18 tluk hla Mindat mipi kilvengtu pawl umnak cu an kah. Hi kongah Mindat CDF pawl umnak biathli chimtu(Dalaan) an um tiah theih a si.
Culawng si loin ralkap mawtaw 3 cu Kyauk Htoo ah cun an phaan i mawtaw 2 tu cu Mindat lei ah a lan colh. Matupi lam lei zongin ralkap mawtaw 6 cu Mindat mipi kilvengtu pawl do dingah an i thawh colh ve. Mindat dirhmun cu a ttha lo ngaingai tiah mipi kilvengtu chungin hruaitu pakhat nih cun a chim i pawngkam Myone pawl zong dai tein um lo i ralkap pawl rak doh ve dingah a sawm hna.
Mindat mipi kilvengtu hruaitu pakhat nih cun “Tu dirhmun Mindat boruak cu a ttha lo tuk khi a si. Matupi lam lein ralkap mawtaw 6 cu Mindat lei panhin an kal thluahmah hna i pakhat hnu pakhat in doh kan tong. Kanmah mipi kilvengtu leiin mi pakhat a thi cang i minung 4 hi hliamhma an tuar.” tiah a ti.
Hmasa an idohnak tanah ralkap an sungh cu, mipi kilvengtu hna cu remnak an tuahpi hna i tlaihmi pawl kan rak in thlah piak hna lai tiah an rak ti hna. Asinain, nikhiahmi an ngeihmi May 12 tiang tlaihmi pawl cu thlah an si lo tikah an iremnak cu chah tthan a si i May 12 zaan in ralkap le Mindat mipi kilvengtu cu idoh hram an thok tthan nak cu a si. Credit: Vapualauaw
