Related Articles
Ka kawhhran ( Ka Khrihfabu) Ka dirh lai. I will build My Church Mt. 16:18 A kum cu kai cinken ti lo nain, voi khat cu Khamhnâk Thawngțha bia chim i ka vah lio ah Hakha Lung Biaknâk inn ah HBA Baibal Conference an tuahmi he kai tong ngelcel i a hramthawk in a dongh tiang ka rak ngai.
Cu tan i cawnpiaktu cu Laimi kan pa Rev. Dr. Hre Kio a si i a chimmi tampi chungin ka philh khawh ti lomi cu Grik nih ekklesia tiah an ti i Mirâng nih church tiah an rak timi, Mizo nih ‘kohhran’ tiah an rak timi nih hin a tinhmi le a sullam a khen bik,. tiah a rak timi hi a si.
Cucaah Rev. Dr. Hre Kio nih Falam Baibal a leh tikah ‘Kawhhran’ timi biafang hi a hman i keizong nih ka hman ve.
Rev.Dr. He Kio le Rualuk nih Mizo holh kan uar tuk ruangah si loin church timi biafang a sullam tak tak le a sawhduh bikmi a khen tuk caah kan hmanmi a si. Pathian nih Abraham kha a kawh i cu kawhnâk cu Abraham nih a leh tikah Abraham tefa hna cu vawlei cung miphun vialte chungin a kotu Pathian nih a hran tein nihin tiang a thleidan hna i Pathian thimmi miphun tiah hngalh an si. Hihi vawlei dongh tiangin si dawh zong a si. Cucu Kawhhran timi sullam hngalhnâk ah akan bawmtu hmânthlak țha bik a si.
Pathian nih a Fapa Jesuh thisen in misual a kan kawh i cu kawhnâk a thei i a cohlângtu cu a kotu Pathian nih vawlei mi sinâk chungin a hran tein a thleidan i cucu ‘Kawhhran’ timi mirâng nih Church an timi sullam tak tak cu a si. Cucaah Grik nih Ekklesia tiah an timi Mirâng nih Church tiah an timi ah hin biafang pa hnih ‘Kawh’ timi le ‘Thleidan’ timi hi pakhat khat a um lo pauh ah cun a sullam le tinhmi kha kheng loin a nganh dih tinâk a si. Cuticun Laimi nih ‘Khrifabu’ tiah kan hmanmi biafang nih hin Church timi sullam le tinhmi cu nganh tak tein a nganh i samfang tia hmanh hi khênmi a ngei lo.
Kawhhran a Kotu cu vânah a ummi Pathian a si bangin Fapa Jesuh thisen in misual a kawhnâk aw a thei i a cohlângtu cu a Kotu Pathian nih vawlei mi sinâk in a thleidan i a hran tein a chiah or a pumh hna caah ‘Kawhhran’ timi cu a si. Cucaah Kawhhran cu vawlei ah an um nain vawlei mi an si lo. Jesuh nih ‘ Vawlei mi ka si lo bangin annih zong vawlei mi an si lo’ tiah a rak ti, Jn. 17:16.
Paul nih ‘ Zeitintiah kan nih cu vancung rammi kan si (For our citizenship is in heaven) tiah a rak ti. Filipi 3:20. Lai Baibal Thiang lehmi TEV nih cun ‘We, however, are citizens of heaven’ tiah a ti. Cuticun Mirâng nih Church an timi biafang hi minung kut in sakmi biaknâk inn lenglei vampang ah kan țial i Baptist Church, Methodist Church, cu church e kha church e kan ti tik ah Church timi nih a tinhmi le a sullam hngalhnâk chungin tlau pumpaluk in a kan tlau ter.
Kan Kawhhran or kan Khrifabu timi biafang hna kan hun hman chinchap i pastor cheu khat nih ‘Ka Kawhhran or Ka Khrihfabu timi biafang tiang tiangin kan hun hman chinchap ahcun Kawhhran (Church) timi sullam le tinhmi hngalhnãk chungin tlau tak tein, a tângmi um bak loin kan tlau. A Kotu le a hran tein a Thleidangtu cu Pathian a si bangin Kawhhran cu Pathian ta a si caah ‘Kan kawhhran (Kan Khrihfabu) timi biafang hi samzai ngaw hmanh hmannâk nawl kan ngei lo. Zeicatiah kan Kawhhran or kan Khrihfabu a si hrim hrim lo.
Ka kawhhran( Ka Khrihfabu) tiah an timi chin chin cu sûm a țing tak takmi biafang a sinain a hmangtu pastor hmanh nih sûm a țing tak takmi biafang ka hman ti hmanh an i hngal lo. Zeicatiah anmah kha a kotu le a hran tein a thleidangtu Pathian dirhmun ah an i chia cang ti kha an i hngal kho ti lo.
Kan or Ka Kawhhran (Khrihfabu) tiah kan hman tawnmi biafang aiawh ah ‘A Kawhhran’ or ‘A Khrihfabu’ tiah kan hman hrim hrim ding a si. Zeicatiah ‘A’ timi cangfang or biafang nih a sawhmi tak tak cu a Kotu le a hran tein a Thleidangtu Pathian khi a si.
Cân rem ah ka peh țhân laimi cu:- Kawhhran (Church) sullam le tinhmi hngalhnâk chungin kan tlau ruangah Kawhran nih a tuah awk a simi tu tuah lo in Kawhhran nih a tuah ding a si lomi tu a tuah lengmang mi hna kha langhter a si țhân te lai. Credit: Evan Rualuk (FB)
