Related Articles
Mizoram pumpi ah Myanmar ralzaam minung 5,000 hrawng an phan cang
===================================
Myanmar ram buainak ruang ah Mizo ram ah a zaam mi hna chung ah min laak khawh mi dihlak minung 5,000 hrawng an si cang tiah ralzaam bawmchantu hna sin in kan theih.
โMyanmar ram ralzaam chung in min aa pe mi hi 2021 May 7 tiang ah minung 5,000 hrawng an si. Min pe lo in a um mi zong tampi an um,โ tiah Aizawl um Myanmar CDM Supporting Committee (MCDMSC) Secretary Evan. Tlirlianthang nih The Hakha Post ah a chim. Theih khawh mi chung in Myanmar ralzaam hna cu: Aizawl ah minung 1,200 hrawng; Lunglei District ah minung 400 hrawng; Lawngtlai District ah minung 1,000 hrawng; Saiha District ah minung 800 hrawng; Champhai District ah minung 1,300 hrawng; hmun dangdang ah minung 200 hrawng an um. An dihlak minung 5,000 hrawng an um lai tiah zumh a si.
Mizoram a phan ko nain min a pe lo mi an um bantuk in ramri hrawng ah a lutchuak mi ni fatin in an um ca ah cazin a fek mi a um kho rih lo tiah kan theih.
By: B.H.Van@Lenfu
Credit: The Hakha Post
RELCHAP: Hakhathar ah SAC Ralkap nih Minung 6 an Tlaih hna, Tangka 250,000 MMK an i Kalpi Than
โโโ
Nihin zaanlei sml 5:30 hrawng ah SAC ralkap nih Hakhathar ah minung 6 an tlaih hna i, inn pakhat ah tangka 250,000 zong an lak, tiah thawng kan theih. Tlaih a tongmi hna cu: (1) Pu Ca Kung (2) Pi Ram Iang (3) Pu Bawi Hram (4) Pu Ram Ceu (5) Nu Ni Tin Thluai (6) Pa Thang Thang hna an si. Hakhathar Baptist Church zong SAC ralkap pawl nih an luh hnawh. Thilri an hrawhmi le an lakmi a um le um lo theih a si lo.
Minung 6 an tlaih hna lio ah inn pakhat ah tangka ting 250,000 zong an lak, tiah Hakhathar khuami pakhat nih a chim. Nizan zong ah Hakhathar ah minung 12 an tlaih hna i minung 10 an thlah tthan hna. Nizan Hniarlawnthar ah Ngun Hup te tangka ting 10 le a dangdang thilri tampi zong SAC ralkap nih an lakpiak hna.
Credit: The Chin Journal
ThawngDang Relnolh: Thantlang Upa Pawl le Ralkap Pawl Ton Biaruahnak an Ngei
โโโ
Nizan May 6 ah Thantlang khua upa 4 le Thantlang hrambunh SAC ralbawi (Major) le uknak lei zung upa cheukhat ton biaruahnak an ngei, tiah ttuanvo ngeitu sin in thawng kan theih. Anmah SAC ralkap lei nih tonnak ngeih ding in Thantlang upa an sawmmi hna i, Thantlang mino pawl cawnpaik ding in le atulio Thantlang humhimnak kong pawl ralkap nih a kan hal, tiah tonnak ah aa telmi upa pakhat nih The Chin Journal ah a chim.
โThantlang mino pawl khoika dah an kal dih tiah a kan hal i, mino pawl hi rak kan cawnpiak u a kan ti. Mino pawl an kalnak kan thei ve lo tiah kanmah lei nih fianghlang tein kan leh ve hna,โ tiah a cunglei upa nih a chim. Cun, Thantlang humhimnak kong he pehtlai in zei bantuk in rian kan ttuan ah dah a tthat lai tiah ralkap lei nih an hal hna i Thantlang upa lei nih minung tlaihkhihnak nan tuahmi pawl hi ngol u law, tlaihmi pawl zong hi vuak len loin thlah colh hna u law a ttha lai, tiah an leh hna.
โThantlang khuachung humhimnak ca ah zeitin rian kan ttuan ah a tthat lai tiah a kan hal i, CDM a tuahmi pawl tlaih loin um le nan tlaihmi minung pawl vuak len loin nan um ah a ttha lai kan ti hna. Aruang cu Laimi cu meithal tampi a ngeimi kan si i, sa zong a kap lengmangmi kan si. Meithal konglam a theimi kan si. Cucaah, nanmah lei nan daih lo ahcun Mindat ah a chuakmi thil bantuk hika zong ah a cang lai lo ti khawh a si lo tiin kan leh hna i an lau ngai ve,โ tiah a cunglei upa nih a chim chap.
Nizan tonnak ah Thantlang le Hakha karlak i ralkap motor bomb puah hnawh a tonmi kong zong an hal hna. Thantlang mino an si lai tiah SAC ralkap nih an zumh. โNizaan Hakha-Thantlang karlak ralkap motor bomb puah hnawh a tonmi kong ah Thantlang mino an si lai tiah a kan ti. Kannih nih cun online zong ah an ttial ko kha, CDF-Hakha nih pei kanmah nih kan tuahmi a si an ti ko kha tiah kan leh hna,โ tiah a cunglei upa nih a chim chap.
Thantlang mino Roro le Amang an tlaihmi hna zong thlah colh ding in an hal hna i Roro le Amang cu nizaan zaanlei ah SAC ralkap nih an thlah colh ve hna.
The Chin Journal
Note: Thawngpang a kenkip kan khawmhsuat tawn i Careltu zong nih a tam tuk tiโn vuivai lo tein rak kan rel piak ulaw, Laimi nih cun zei tluk in dah ca kan rel tam a herh timi kha biatak tein kan i tleih chih ahau ngaingai mi a si. Ca na kan rel piak mi cungah le Angei tu hna cung zongah lawmhnak tampi kan ngei. Share zong in rak kan bawm tthan rih.
