Related Articles
Nai hrawng cu Pu No Than Kap UEC meeting i kai nak kongah Laimi lungthin a khehkhuai ngaingai. Zeicatiah hibantuk ralhrang nih an kan thah le an kan hrem lio caan i ralkap uknak tang i tuahmi meeting hna ah a va kai timi theih tikah ngaihthiam awk a ttha lo.
Hmanhsehlaw meeting a kainak he pehtlaiin a mah zong nih official tein thanhnak zong a tuah cang pin ah tutan zong CCN nih interview an tuah. Cathanh a chuahmi zongah keimah pumpak in ka kai mi a si tiah a langhter i, interview zongah observer in a kalmi ka si i zeihmanh kei nih chimnak nawl le ceihhmainak nawl pakhat hmanh ka ngei lo kei ka rian cu an biaceihmi ngaih sawh lawng kha si ko tiah a chim.
A chimmi tampi a um mi, nan mah pumpak cio zongin CCN ah ngaih khawh cio rak i zuam te ulaw. CNLD in a chuahnak kong zong a chim, pumpak a ruahmi le ralkap hi ka dirpi hna lo timi kong zong tampi a chim mi a um i cu chung ahcun meeting ka kaimi kongah sualphawt le ceihhmai ka tong te lai ti hi pakhat hmanh ka ruat lo a timi tu hi langhter kan duh.
CCN nih cun, hi ti UEC meeting na kainak kongah sualphawt le ceihhmai ka tong te lai tiah na ruat maw tiah an hal “Ka ruat nem mam loh, aruat in ka ruat lo, zeicatiah hihi keimah No Than Kap nih ka thiam ruang ah si lo i ka tthat ruang zong ah a si lo, hi meeting ka kai nak thawng hin zei dah ka caah hlawknak a um. Miphun ca le abik in Chin ram caah kum 30 tiang te mitthli tla le thisen chuak in ram tangah rian a ttuanmi zong ka si i phunglam tangah kum 10 leng zong ka ttuan fawn. Cu tikah hibantukin chance ttha taktak a um mi hi tlawttlai dingah ka duh lo, huatnak pakhat ruangah va tel hlah timi hi cu taktak te ti ko lo cu an ruahnak zong hi a phunphun in um kho hmanhsehlaw kei ka hmuhning ahcun mipi ca i bia chuak thei kho dingin le zeitluk in dah kan miphun caah tthahnem a si lai timi le tinhi zong tampi ngeiin observer min in Dr Van Maung bawmhnak ka hmuh khawhmi hi thil ttha tuk ah ka ruah. Mipi nih sual an ka phawt lai timi hi a ruat in ka ruat lo, I’m sorry.” tiah a chim.
CCN biaruahnak ah a dang a chimmi zong tampi a um mi chungin hi vial hi kan rak langhter mi cu a si, ngaih a duhmi caah CCN ah lut law tlamtling tein ngaih khawh a si. Hi kan rak langhter mi ah Tlamtlin lonak tampi a um lai theihthiamnak he.
