Related Articles
Zei tin dah Nungak Fim Nih Pasal Ca Dingah Tlangval pawl hi an ngiat hna, a tang lei bantukin kan rak langhter mi ah hin rak rel veh.
1. Nu le pa nih ngeihmi ro thilri aa hngatchan mi duh paoh in a um mi tlangval khi cu nungak nih hin an uar lem hna lo. Zeicatiah minung nih ngeihmi hlawthilri hna hi cu nikhat khat ahcun an ziam kho ve ti hi an i fiang ngaingai ve i, mahnak in nu le pa rothil ah i hngat loin mah tein kut le ke in a dir kho mi tlangval khi nungak fim nih cun pasal dingah an ngiatthlai ngai mi a si.
2. “Kei, santlailo vaal, kei sifak fa” tibantuk velhle thiam ngaimi tlangval khi nungak fim nih cun an uar lem hna lo. ‘Sifak, Nuhmei fa ka si’ ti tung i zeihmanh cu sifahnak in nun khawh kai zuam lai timi lungput ngei ttung lo mi tlangval khi nungak fim nih cun an rak neek ngai hna. Cunak cun ‘kan sifak tuk, rian ka ttuan a hau’ ti’n zei paoh nih tlunh seh a pah chih ngammi tlangval ralttha khi nungak fim nih cun a cuh bak in an i cuh.
3. Rian ah mah deuh hi ka ttuan zuam mi a si i mah bantuk deuh hi cu ka zuam phun a si lo, tibantuk lungput a ngei mi tlangval khi nungak fim nih cun zoh ding hmanh ah an rel/ruat hna lo. Zei bantuk rian paoh a zenh lo mi, ruahsur ah siseh nilinh caan ah siseh a lucilh ngamhmi tlangval tu khi nungak fim nih cun an thlah siang bak hna lo, co thai ding bak in an duh colh hna.
4. Tu lio chan ahcun mah tein kutke a ngei mi, thiammi pakhat khat a ngeimi tlangval, si lo ah sam meh nak dawr tal a ong ve mi, work shop tthenkhat ah rian a ttuan mi si loah chawlehnak hmete pakhat tal a ngei mi tlangval khi nungak fim nih cun an uar ngai hna. Zei hmanh timhmi ngei lo vah lawng a cakmi tlangval nak cun a let in an duh deuh hna.
5. Tlangval thianghlim ngaingai mi, ttamh zong a uar ngai mi pawl khi nungak fim nih cun an zohsang lem hna lo. Zeicatiah mi lee(lerh) phun an si caah i neih hnuah nupi fa le an cawm kho lai lo ti an i fiang.
6. Tlangval khualak len le mi lak i duh paoh in ai nuam kho mi le duh paoh in a ni kho mi pawl khi nungak fim nih cun an duh phun a si lo. Zeicatiah siaherhmi siseh duh khunmi ngei loin boruak kipah ai nuam kho pengmi an si ruangah an zum ngam hna lo. Duh tik paoh i tthen, mi siaherh le zawnruahnak an chuahpi lo ti an fiang.
7. Nungak fim nih cun tlangval aa manh tuk mi, nungak sin paoh i caan a pe kho zungzalmi, kawh(auh) caan paoh i thlarau bantukin a phaan kho mi tlangval khi biapi ah an ruat lo i khurkhua a raut huaha lo hi teh ti phun in an zoh hna. Cunak cun zei maw caan i len chuah sawm zongah ai manh tawn lo mi, tlangval busy kho ngai mi khi an zohsang taktak hna.
8. Nu(nungak) a si mi paoh nih hin cun dawt le domhtlaih a duh mi lawngte an si dih. An fahnak zawnah tuamhlawmtu, an tonmi thil kip ah rak cawisangtu tlangval/pasal ding khi nungak hrutmi nak in nungak fimmi nih cun an theihthiam deuh hna.
9. Nungak fim nih cun amah lawng si loin chungkhar sahlawh rualchan nu le pa zah a thiammi, thil zei maw te zongah a ing thiammi tlangval “mopa ttha le bochantlak pasal” ti’n kawh/auh awk a tlakmi pasal khi an mit sir tein an rak zoh ziar hna.
10. Pathian a ttihmi, biakinn a panh zungzalmi tlangval khi nungak fim nih cun an zoh sang hna i khua le tlang ca i ai hmang kho mi zong khi an neek lem hna lo. Asinain inn lei i zeihmanh fial khawh le si ttung lo, biaknak leiin siseh khua le tlang lawng i aa pe/hmang kho mi tlangval hna khi nungak fim nih cun faak piin ruah le duh ding tlak ah an ruat hna lo.
