Related Articles
Tu ni 2021 May 21 Naypyidaw i an tuah mi thimnak i aa tal mi le party pawl i tonnak ah CNLD lutlai pakhat kal lo ding in a ti ko nain lutlai pakhat si ve mi Pu No Than Kap cu a mah pakhat lung tlin nak in a kal tiah party lutlai si ve mi Pu Ngai Sak nih a chim.
Kan dih lak kan theih bantukin CNLD party aa tal ve mi Pu No Than Kap cu tu ni meeting tuahnak ah a va kai tiah theih a si. Meeting kai lo ding zong in kan chimh ko, caa zong in kan kuat ko nain zei ruangah dah a va kai ti hi kan thei bak lo. Kan nih zong a tu kan hlat lio a si. Cun kan theih mi thawng a um ah cun CNLD lei in thawng kan rak thanh than lai tiah party lutlai Pu Ngai Sak nih a chim.
Tuni meeting kai nak kong he pehtlai in thawng hal kan timh zong ah phone chawnh kawh si lo. A phone switch off in aa chiah i chawnh kawh si lo. Tuni meeting an tuah mi ah party 59 an kai i a ra lai ding mi thimnak ding kong le aiawk tu PR hman le hman lo ding pawl an ceih tiah theih a si. Credit: Chin World
RELTTHAN: May 18 zaanlei thawk in Rungtlang 266 SAC ralhrang nih Loklung pawng ah mortar bomb in an kah hna caah khuami 850 hrawng hi atu ah ralzaam dirhmun in khua chingchang ah an um hna, tiah thawng kan theih.
A zaammi hna lak ah aa telmi pastor pakhat nih, “Kan khuapi ning in kan zaam. A zaam kho lomi thluaktlamtlinglo minung pahnih innchung ah kutka kan hrenhkenh hna i kan kaltak hna. Cun, meng 7 zawn ah a ummi chungkhar pakhat an zaam lo,” tiah The Chin Journal ah a chim.
A zaammi hna lak ah micheukhat tirawl aa kenmi an um bang in tirawl zeihmanh aa ken lomi zong an um hna. “Ramtang ah a zaammi cu kan um lo. Pawngkam khua pawl ah kan zaam hna. Micheu tirawl aa kenmi nih anmah tirawl an ei i, aa ken lomi pawl cu khuami hna nih ttha tein a kan zohkhenh ko,” tiah a chim chap.
Loklung khua ah SAC ralhrang nih inn an khanghmi a um lo, motorcycle an khanghmi pawl tu an um tiah a chim. “Inn an khanghmi cu a um lo. Motorcycle an khanghmi pawl tu an um. A lang in meikhu a hmumi hna nih inn an khanghmi ah an ruah caah a si,” tiah a cunglei pastor nih a chim.
SAC ralhrang nih CDF-Hakha chungtel pawl i motorcycle 30 leng an khanghpiak dih hna. Loklung ralzaam hna lak ah hin kum 5 tang ngakchia tete 50 leng an i tel, tiah CDF chungtel pakhat nih Myanmar Now ah a chim. The Chin Journal nih bia kan ruahmi pastor nih cun, “Ngakchia, tar le naupawi lio ralzaam cazin hi kan lak cuahmah lio a si i, fiang in kan thei kho rih lo,” tiah a chim.
May 18 zaanlei le May 19 zinglei ah SAC ralhrang nih mortar bomb in Loklung khua pawng ah CDF-Hakha an kah hna caah khuami pawl an zaam dih hi a si. May 19 zinglei ah hin CDF-Hakha le SAC ralhrang 70 hrawng Loklung khua pawng ah an i kap i, SAC ralhrang lei in minung 3 an thi, tiah CDF nih thawng an rak thanh.
A zaammi hna nih Loklung khua ah vung kal in thil sining an zoh ngam rih lo caah atulio Loklung khuachung thil sining fiang in theih a si lo. Credit: The Chin Journal
