Related Articles
SAC ralkap nih Rev. Dr. Peter Za Hlun Thang te sianginn an luhhnawh, faak ngai in an velh hna. May 26, 11:00 pm Yangon Hmawbi um Rev. Dr. Peter Za Hlun Thang sianginn cu SAC ralkap nih an luhhnawh hna i a fapa, saya Pa Sui le midang pa thum zong faak ngai in an velh hna, tiah kan theih.
“An phone an check hna i, a fa pa nih Miss Myanmar a rak share mi post pakhat ruang ah fak taktak in an velh. Rev. Dr. Peter Za Hlun Thang zong khukbil ding in voi hnih an ti nain, a duhlo pin ah, nan lung si tiang in rak kan check uh, sualnak kan tuah mi pakhat hmanh a um lo a ti hna.
Rev. Dr. Peter Za Hlun Thang te chungkhar hi atulio kan ram a har lio ah misifak le miharsa hna sin ah an si khawhtawk in bawmhchanhnak petu an si pin ah Chinmi ralzam hna zong a zuanhnawh mi an si i, hi bantuk in sualnak ngeilo an luthnawh hna i an naule tiang an velh (kutthlak) mi hi cu lung a fak taktak,” Rev. NC Thawng Tha Thang nih a facebook cahmai ah a tial.
Tutan an luthnawh hna hi Hmawbi ah sianginn kai kho lo ding in a cawlcang mi hna lak ah Chinmi an um tiin report tu an um ruang ah ruahdamh in an luhhnawh hna hi a si, tiah kan theih. Credit: The Hakha Times
A Dang Reltthan: Ralzaam hrangah ei le din khuachungah a la tawntu mino pahnih cu nihin May 27 ah an kah thah hna. Kaya ramkulh Demawso khuapi pawngkap i ummi ralzaam pawl hrangah khuapi chungah kal in ei le din a la tawntu mino pahnih cu ralkap nih May 27 ah an kah thah hna.
Demawso mipi kilvengtu le ralkap cu nifatin deuh ti ngawtin ikahdohnak a um tikah ralkap lei a thi mi zong an tam. Culawng siloin ralkap le palik dam lio mi 4 zong Demawso mipi kilvengtu nih an tlaih/hren hna. Nikhat lawngah ralkap 20 te bak an thah khawh hna i ralkap lei zong nih an zenh ngai cang hna.
Cubantuk a si ruangah ralkap nih cun Demawso mipi kilvengtu pawl cu vanlawng le tank(raltuknak mawtaw) hmangin an doh phah hna nain, mipi kilvengtu lei an thazaang a zor hlei lo. Nifatin deuh in an idoh ruangah mipi tthenkhat cu khua ah um ngam loin ramlak ah an zaam hna i ralzaam hi 10000 hrawng an um cang.
Ralzaam mipi ei le din lak in khuachung i a kalmi mino pahnih Alfred Ludo le Patrick cu nihin May 27 ah ralkap nih lam ah an rak hmuh hna i zei bia hmanh hal loin an kah thah colh hna. Cu hnu zongah an ruak cu zeihmanh ah rel loin an kal tak hna menmen tikah mipi lei zong an thinhun a zual hringhran. Credit: Vapualauaw
