Related Articles
Sopum khua umhmunkhuar mi SAC ralkap an zaamnak sau, Lungler le Vawngtu bel anmah keel.
==============================
Thantlang Peng Lungler le Vawngtu (Vuangtu) SAC ralkap sakhaan um ralkap cu anmah keel an si nain Sopum khua ah umhmun a khuar mi ralkap tu cu an zaamnak a sau cang, tiah kan theih.
“Sopum ah umhmunkhuar mi SAC ralkap hna hi CDF-Hakha nih May 3 zaan Hakhathar an kah hna (SAC ralkap a tlawm bik 4 an thi i 10 leng an i hliam lio) hnu khan Hakha lei ah an zaam dih cang. Khua pawng an um lio ahcun zeipipa buainak an chuahpi lo nain thinphang in kan um peng. CDF-Hakha nih an kah hna khan an tih i si ko lai, an mui kan hmu ti hna lo,” tiah min langhter lo mi pakhat nih The Hakha Times ah a chim.
“Lungler um SAC ralkap tu hi an sakhaan ah Palek he an i fon cang. Palek hi 7 hrawng le ralkap hi 9/10 hrawng an si. Nihin tiang cu zeipipa buainak ngaingai an chuahpi lem lo. Anmah um in an um ko,” tiah min langhter lo mi pakhat nih The Hakha Times ah a chim. Thantlang Peng thiamthiam in minung pakhat nih, “Vawngtu sakhaan ah hin SAC ralkap 10 hrawng lawng an um. A zat hi adik cun kan thei kho lo. An tam deuh chel, an tlawm deuh chel a si. Nihin tiang cu buainak ngaingai an chuahpi lo. Khuami cheukhat tu hi thinphang in an um i hmun dang ah aa thialkaam mi zong an um,” tiah The Hakha Times ah a chim.
CDF-Hakha nih SAC ralkap an hun kah hna hnu i Sopum um ralkap 15 in 20 kar hrawng cu an i thial cang. Surkhua Palek sakhaan zong May 8 lio ah an rak laak/khanghpiak cang hna. Credit: The Hakha Times
RELCHAP: CDF-Mindat in Salai Thang Hung Thang a Nunnak a Liam Nizaan in aa thawkmi Mindat-CDF le SAC ralkap kahdohnak ah Mindat-CDF lei in Salai Thang Hung Thang a nunnak a liam, tiah kan theih.
SAC ralkap nih Mindat he meng 18 hrawng a hlatnak Kyaukhtuh khua in 155 MM miakpi in an kah hna caah Salai Thang Hung Thang hi a nunnak a liam i a dang minung 4 hliamhma an pu hna. Hliamhma a pumi minung 4 hi a zualhma cu an si lo i thinphan awk a um lo. Mindat ah SAC ralkap he hmaitonh ngaingai in an i kap lo i, a lang tu in SAC ralkap nih miakpi in pehzul in an rak kah hna.
SAC ralkap nih an tlaihmi Mindat khuami minung 5 an thlah hna lo caah Mindat-CDF le SAC ralkap karlak biaruahnak cu May 12 ah a rawk i, cu caan thawk cun kahdohnak a hun i thawk tthan hi a si. Credit: The Chin Journal
Note: Thawngpang a kenkip kan khawmhsuat tawn i Careltu zong nih a tam tuk ti’n vuivai lo tein rak kan rel piak ulaw, Laimi nih cun zei tluk in dah ca kan rel tam a herh timi kha biatak tein kan i tleih chih ahau ngaingai mi a si. Ca na kan rel piak mi cungah le Angei tu hna cung zongah lawmhnak tampi kan ngei. Share zong in rak kan bawm tthan rih.
