Related Articles
Chin ramkulh Tedim khuapi i mipi kilvengtu hna cu India le Chin ramri ah raldohnak cawngin(training) umhmun an khuar i May 22 zingah Zomi Army tiah kan theihmi hna Zomi Revolution Army(ZRA) pawl nih cun an kah hna nak kong cu anmah lila nih Myanmar Now ah an chim.
A zaammi lak i mipi kilvengtu pakhat nih cun “Zinglei kan thawh ka hrawng a si. Lam hla nawn khin an van aukhuang i “ZRA kan si” nan himnak ding caah zaam uh tiah an kan auhkhuan hnawh. Cu lila cun meithal a vun puah thluahmah. Minute 20 an kan kah hnu hrawng khin Zomi holh in an i chawnhbiak len kan theih. Kan thilri zei hmanh kan la manh lo i phone, Camera pinah meithal zun 5 le ting 30 man hrawng thilri an kan lak piak. An lak thlu lomi kan thilri dang zong an hrawh dih cikcek hna.” tiah a ti.
Zomi Army hi India ram Manipur hrambunh ralthuam keng an si i zeiruangah dah an miphunpi Tedim zomi an doh hna i an kah hna timi theih a si rih lo. Anmah lei zong nih ca an chuah rih lo i cachuahmi zong an let rih hna lo. Tthenkhat nih cun Zomi Army cu metei ralthuam tlai an si bangin Myanmar ralkap nih remnak a tuahpi i anmah miphunpi an doh hna hi a si ko lai tiah an ti ve. Credit: Vapualauaw
A Dang Reltthan: Thantlang SAC Ralbawi nih Voi 2 na Kan Kah Cang tiah TBC Mino Sin ah Chim Nihin (May 23) Zarhpi zing pumh dih ah Thantlang Baptist Church (TBC) mino le SAC lei biaruahnak an ngei i, Thantlang mipi lei in voi 2 bak na kan kah cang tiah SAC ralbawi nih a chim.
Nihin tonnak ah aa telmi pastor pakhat nih, “Pumh pah biaruah kan in duh hna kan ti. Asinain, pumh lio ah cun a si kho lo kan ti i, pumh dih tu ah mino Choir Bu he biaruahnak kan ngeih hna,” tiah The Chin Journal ah a chim. “Ralkap bawi nih nizaan he cun voi 2 bak na kan kah cang tiah a chim. Asinain, aho nih a kan kah timi cu a chim lo. Laipawnglung lei in an ra i kan sakhaan ciacia ah a kan kah tiah a ti. Kannih cun daihnak kan duh, i kap hlah u sih, kan tlaihmi hna zong kan in thlahpiak hna tiah a chim,” tiah a cunglei pastor nih a chim chap.
Aluancia May 5 ah khan Thantlang-Hakha karlak ah SAC ralhrang pawl kah an rak tong. May 5 ah Thantlang ralkap nih Thantlang upate tonnak an ngeih hna i Thantlang mino pawl kan cawnpiak hna u tiah an rak chimh hna. CDF-Hakha nih “Kanmah nih Thantlang-Hakha karlak ah SAC ralhrang kan kah hna,” tiah cathanh an rak chuah.
Nizan (May 22) zong ah Thantlang ah bomb puah thawng le meithal kah thawng pawl a thang len. Asinain, nizan bomb puah thawng le meithal puah thawng kong ah ahohmanh nih kanmah tuahmi a si, tiah an chim rih lo. Nihin tonnak ah TBC mino lei zong nih SAC pawl sin ah biachimnak an ngei: “Meithal na kan puah hnawh lengmangmi hi mipi nan lauter hna. A herh lo ah meithal kan puah hnawh ti hlah u,” tiah an chimh hna.
Nihin tonnak ah Thantlang SAC ralbawi, palik bawi le uknak lei zung (GAD) in penguk zong aa tel. May 5 tonnak lio ah Thantlang upate nih, “CDM a tuahmi pawl tlaih loin um le nan tlaihmi minung pawl vuak len loin nan um ah a ttha lai. Aruang cu Laimi cu meithal tampi a ngeimi kan si i, sa zong a kap lengmangmi kan si. Meithal konglam a theimi kan si.
Cucaah, nanmah lei nan daih lo ahcun Mindat ah a chuakmi thil bantuk hika zong ah a cang lai lo ti khawh a si lo,” tiah Thantlang SAC cu an rak chimh hna. Credit: The Chin Journal
