Related Articles
Kawlram Mipi Zakhat Chungah 85% Nih Cun Teinak Kan Hmuh Hrim Lai Tiah An Chim
Myanmar Researcher pawlkomhnak nih tutan Myanmar ram buainak ah mipi lei in teinak kan hmu kho lai maw tiah ramchung, ramtthen le ramkulh 14 chungah biahalnak an tuah hna i an dihlak an hal mi hna chungin 85% nih cun teinak kan hmu ko lai tiah an rak leh hna.
Zakhat chungah 4.5% nih cun teinak kan hmuh khawh kan zum lo tiah an rak leh ve hna i, 11.1% nih cun teinak kan hmuh ding le hmuh lo ding kan chim kho lo tiah an rak leh ve hna. Teinak kan hmu lai tiah a timi pawl sin ahcun zei tin dah/zei ruang ah dah teinak cu kan hmu khawh ning a si lai tiah hal nak an ngeih chih hna. An leh ning hna cu a tanglei bantuk hin a si.
Zakhat chungin 42.2% nih cun mipi lei nawrnak ruangah teinak kan hmuh lai tiah an ti i, zakhat chungah 18.8% nih cun teiduhnak thinlung kan ngeih ruangah teinak kan hmuh lai an ti ve. Zakhat chungin 13.3% nih cun CDM a tuahmi pawl ruangah teinak kan hmuh lai an ti i zakhat chungin 11.8% pawl nih cun CRPH rianttuannak ruangah teinak kan hmuh lai an ti ve. Zakhat chungin 8.4% nih cun ralkap pawl hi ramleng cozah hna nih an cohlan hna lo ruangah teinak kan hmuh lai an ti ve i zakhat chungin 6% nih cun ramleng pawl i rianttuannak thawngin teinak kan hmuh lai ti a si ve.
Zakhat cungin 4.6% nih cun mino pawl izuamnak le cawlcanghnak ruangah teinak kan hmuh lai ti a si i zakhat chungin 3.6% nih cun tlangcung hriamtlai pawl cawlcanghnak thawngin a si lai an ti ve. Zakhat chungin 3.1% nih cun diknak ruangah teinak kan hmuh lai ti si ve i zakhat chungin 2% nih cun media pawl ruangah teinak kan hmuh lai ti si ve, zakhat chungin 1.2% nih cun ralkap an derthawm ruangah teinak kan hmuh an ti bak ve.
Nangteh tutan Myanmar ram buainak ah hin mipi nih teinak kan hmu lai tiah na zum maw? Na zumh a si ahcun zei ruangah dah? Na zumh lo zong si le a ruang, van chim cio ve uh.
Credit: Vapualauaw
RELCHAP: Pu Ngun Hup te Tangka Ting 10 MMK le Thilri Dangdang SAC Ralkap nih an Lakpiak Hna
————
Nihin chun Hakhathar ah SAC ralkap nih luh hnawhnak an tuah lio ah Pu Ngun Hup te chungkhar tangka ting 10 MMK le thilri dangdang an lakpiak hna, tiah kan theih.
Pu Ngun Hup te inn an bauh i tangka ting 10 MMK, an fapa nupi tthit lio i laksawng thilri bizu khat, Laithil an fimnak thirkuang kuang 2 le 125 Motorcycle pakhat an lakpiak hna. Cun, inn dang an bauhmi zong a um rih i, thilri pawl an i kalpi, tiah khuami pakhat nih a chim.
Nihin chun Hakhathar an luh hnawh lio ah Hniarlawnthar Gospel Khrihfabu pastor saya Sang Awi telh in pa pasarih an tlaih hna, tiah thawng kan theih.
Credit: The Chin Journal
ThawngDang Reltthan: Donald Trump nih a duh mi a chim khawhnak ding website thar an tuah piak
US President hlun Donald Trump hi Twitter nih account hman an sianh lo pinah Facebook le Youtube zong nih tukum January thla Capitol buainak ruangah a ccount cu an phih piak hna.
Mahtin a si caah Trump nih hin a ruahnak le a chim duh mi cu Press Release lawngin a chim tawn caah a tu bantukin a duhmi a chim khawhnak dingah Website donaldjtrump.com cu an tuah piak hi a si. Mah website ah hin Facebook le Twitter bantukin mi nih Like le Share zong tuah khawh a si te lai.
Trump Senoir Advisor Jason Miller nihcun “Trum caah kan tuah dingmi Social Media Platform cu a turu bak lai tiah a rak chim nain, an ruah hnuah Website bantukin an kalpi than mi a si” tiah a chim. Facebook Oversight board nihcun Trump cu an phih piak zungzal ding le ding lo kongah biachahnak an tuah ve lai tiah theih a si. Zungzal caah an phih piak lo ding a si ahcun Trump Facebook Account cu ni 7 chungah an nun ter tthan te lai.
Youtube zong nih Trump Account cu thazaang thumh in i thihphaihnak a niam tikah kan nun ter than lai tiah an chim. US President hlun Donald Trump nih follower 88 million a ngeihnak Twitter belte nih Trump Twitter account a zungzal caah a khar piak cang.
Mah Website hi Campaign Nucleus, Digital Service Company, Trump Campaign Manager hlun Brad Pasrcale Company tuah mi a si.
Credit: The Chin Post
Note: Thawngpang a kenkip kan khuamhsuat tawn i Careltu zong nih a tam tuk ti’n vuivai lo tein rak kan rel piak ulaw, Laimi nih cun zei tluk in dah ca kan rel tam a herh timi kha biatak tein kan i tleih chih ahau ngaingai mi a si. Ca na kan rel piak mi cungah le Angei tu hna cung zongah lawmhnak tampi kan ngei. Share zong in rak kan bawm tthan rih.
