Related Articles
Ralkap nih May 7 zaan ah an tlaih mi minung 6 chung in, pa 5 an thlah than cang hna tiah kan theih. Nain, Than Hrang bel an thlah rih lo tiah theih a si.
An tlaih mi hna hi, Hakhathar sang ah a um mi deuh an si. May 7 ah an tlaih hna hnu ah, Hakha palek zung/thonginn ah an kalpi hna hnu ah a thaizing May 8 ah an thlah than hna tiah kan theih. Ralkap nih an thlah than mi hna cu; Pu Ca Kung le an innchungnu Pi Ram Iang, Bawi Hram (Mino), Pu Ram Ceu le Nu Ni Tin Thluai an si.
Kan hnu May 6 zong ah, Ralkap nih Hakhathar sang ah minung 12 an tlaih hna i, 10 lawng a thaizing ah an thlah hna tiah kan theih, nihin tiang Thang Ha le Ceu Thang bel an chuah le chuah rihlo theih a si lo. Feb. 1 thawk in, Ralkap nih hramhram in Nawlngeihnak an lak hnu in nihin tiang ah Chin miphun 270 tluk tlaih khih an tong cang tiah Chin Human Rights Organization (CHRO) khawmhsuat mi in kan theih. Nain, tam deuh cu an chuah than cang hna.
Chin miphun tlaih khih mi vialte chung ah Hakha ah a tam bik a si. Cu chung ah, [Hakha lawng ah] tazacuai Zung chuah pi cang mi hi 44 an si i, chuah pi ding mi hi 4 an um rih. An dih lak ah, Nu 8 le Pa 40 don 48 (tulio hren thar mi 3) an si tiah kan theih.
Credit: The Chinland Post
RELCHAP: India Rampi Ni 10 Chungah Covid-19 Ruang i A Thi Mi Zat Hi 36,110 Leng A Phan
India rampi ah cawn ni 5 ah khan zawtnak thar an hmuh mi zat cu 4,14,554 an si i, ni hnih chung cu a peh in zawtnak thar hi nuai 4 leng cu hmuh an si.
Ni 10 liam cang mi chungah khan India rampi ah Covid-19 ruang i a thi mi hi 36,110 an um manh i, suimilam pakhat chungah mi 150 tluk hi an thi lai tiah ruahdamh a si. Ni 10 chungah khan zawtnak ruang i a thi mi hi 3,000 leng cu an um peng ti a si. Cawn ni 5 ni ah khan rampi chungah zawtnak ruang i a thi mi hi 3,927 an si cang tiah theih a si.
India rampi nih hin ni 10 chungah Covid-19 ruang i a thi mi zat a tam bik phan in cazin thar cu an siam hi a si. Tuan ah khan cun US nih hin a tambik Cazin dirhmun an phanh lio ah khan ni 10 chungah mi 34,798 bak te an rak thi i, ni 10 chung tho ah khan Brazil rampi ah mi 32,692 an rak thi ve cang tiah World Health Organisation(WHO) nih cun an chim.
Ram chungah zawtnak a ngei mi zat hi minung 36,45,164(ngei cuahmah lio mi) an um cang i, hi zawtnak angei lio mi ah hin arak ngei cang mi chung thawk in 16.96% cu an tling cang i, zawtnak in a dam mi hi 81.95% ah a van tla deuh ve ciammam. Hi zawtnak ai thihpi mi zat hi 1.09% cu an tling ve. India ram chungah Covid-19 zawtnak a kai mi hi kum 2020 August 7 ah khan nuai 20, August 23 ah khan nuai 30, September 5 ah khan nuai 40, September 16 ah khan nuai 50, September 28 ah khan nuai 60, October 11 ah khan nuai 70, October 29 ah khan nuai 80, November 20 ah khan nuai 90 bak phan in December 19 ah khan cun million cu an luan ve. A tu a voihnihnak(second wave) ah hin cun a kai thluahmah i tukum May 4 ah khan zawtnak a ngei mi zat cu 2 million nak tam an phanh hi a si.
ICMR nih cun May 6 tiang Covid-19 test nak hi voi 29,86,01,699 tiang a ngeih cang hna i, cawn ni 5 ni ah khan voi 18,26,490 tiang test nak an tuah tthan hi a si. Union Health Ministry nih an langhter ning ah cun State 10, Andra Pradesh, Maharastra, Uttar Pradesh, Delhi, Karnataka, Kerala, Haryana, West Bengal, Tamil Naduh le Rajasthan ah hin ram chung i zawtnak hi zakat chungah 70% hi cu hmuhchuah thar an si.
Thawng Dang Reltthan: CDF-Kanpetlet nih SAC Ralkap le Palik Pawl Ralrin Peknak Ca Chuah
———-
May 8 ah CDF-Kanpetlet nih SAC ralkap le palik pawl ralrin peknak ca an chuah i SAC nih an zulh lo ahcun kan kah hna lai, tiah ralrin peknak an ttial.
(1) Mipi thinphang le thalau in umter ding in khuachung ah ralhriam he i chawhvah lo ding. (2) Zaan ah lamkham le minung zalennak hnahnawh i checknak tuah lo ding. (3) CDM ah aa telmi zung rianttuan pawl hnahnawh, tlerhkhawn le tlaihkhihnak tuah lo ding, tiah CDF-Kanpetlet nih an langhter.
Credit: The Chin Journal
Note: Thawngpang a kenkip kan khawmhsuat tawn i Careltu zong nih a tam tuk ti’n vuivai lo tein rak kan rel piak ulaw, Laimi nih cun zei tluk in dah ca kan rel tam a herh timi kha biatak tein kan i tleih chih ahau ngaingai mi a si. Ca na kan rel piak mi cungah le Angei tu hna cung zongah lawmhnak tampi kan ngei. Share zong in rak kan bawm tthan rih.
