Related Articles
Nihin chun Mindat cu thinphang le thlalau in um a si. A tu zong din loin an i kap cuahmah rih ko tiah thawng theih a si i, mipi leiin tlangval no pakhat zong anunnak a liam cang i minung 4 hrawng hi faak ngaiin hliamhma an tuar tiah theih a si.
Cu caah kan nih ramleng/ramchung um mi hna nih biatak tein thlaza kan rak campiak hna aherh tuk lio caan a si. Zeicatiah man ngei lo in nunnak an liam ding mi hi tutan kan boruak ah hin cun a si kho ti lomi thil pakhat a si cang. Pathian khuakhan cu kan thei kho fom lo cu ta, kan thih vaivek ahcun teinak cu hmuh hrim dingin pakhat le pakhat lungrual tein kar kan hlan ahau.
Mipi zong hi lio caan ah kan rak biapi tuk, a bikin ramleng a um mi ko caah hin nan biapit nak a zual khun. Minung cu tuchan ah phaisa lo cun cawlcangh khawh a si ti lo tihi theih cio a si, heh tiah a ramkip in kan i bawmh i kan ttan a si ahcun teinak cu adonghnak ah kan hmu te hrim ko lai. Biatak tein thlacam ko hna usih, Khrihfa kan sinak kha tutan hrimhrim ah hin a takin lang seh.
Nihin (13/May) zong dai loin an i kap peng ko rih, mipi lei hliamhma tam an um ti nak hnga lo biatak tein thlacam bawm hna usih. Nihin Mindat boruak zong video tawi tein lang ter a si. A tanglei ah hin a um lai. Video kan laaknak hi The Chin Journal in a si i, ti hin an rak langhter “Mindat: SAC ralkap nih a lang in Mindat khua miakpi in pehzul in an kah. Meithal kah thawng zong a thang len. A tang video hi nihin Mindat khua sining a si.”
RELCHAP: CDF nih Nizaan ah Inn 3 Bomb an Puahnak Aruang an Langhter
———
May 11 zaanttim ah CDF nih Hakha Khuahlun, Hniarlawn le Hniarlawnthar ah bomb voi 3 puahnak an tuahmi kong he pehtlai in tu zaan cathanh an chuahmi ah aruang an langhter.
(1) Hniarlawn Khua Inn Pakhat Bomb Puahnak ∆ Hniarlawn inn pakhat bomb an puahnak aruang cu inntek hi Chin ramkulh SAC upa hna sin ah CDF cawlcanghnak kong thawngpang a pek hna ruang ah a si, tiah an langhter. (2) Hniarlawnthar Inn Pakhat Bomb Puahnak ∆ SAC nih Hniarlawnthar i inntek hi tangka ting 3 an pek i CDF cawlcanghnak thawng a thanh hna pin ah CDF chungtel pakhat inn an bauh, tiah an langhter.
(3) Hakha Khuahlun Kawlmi Innhmai Bomb Puahnak ∆ Khuahlun ah innhlang in a ummi chungkhar hi Dalan an si, tiah CDF nih an langhter. Na Ta La sianginn lampial pawng innhmai ah bomb a puak. Credit: The Chin Journal
ThawngDang Reltthan: CDF-Mindat in Salai Thang Hung Thang a Nunnak a Liam
————
Nizaan in aa thawkmi Mindat-CDF le SAC ralkap kahdohnak ah Mindat-CDF lei in Salai Thang Hung Thang a nunnak a liam, tiah kan theih.
SAC ralkap nih Mindat he meng 18 hrawng a hlatnak Kyaukhtuh khua in 155 MM miakpi in an kah hna caah Salai Thang Hung Thang hi a nunnak a liam i a dang minung 4 hliamhma an pu hna. Hliamhma a pumi minung 4 hi a zualhma cu an si lo i thinphan awk a um lo. Mindat ah SAC ralkap he hmaitonh ngaingai in an i kap lo i, a lang tu in SAC ralkap nih miakpi in pehzul in an rak kah hna.
SAC ralkap nih an tlaihmi Mindat khuami minung 5 an thlah hna lo caah Mindat-CDF le SAC ralkap karlak biaruahnak cu May 12 ah a rawk i, cu caan thawk cun kahdohnak a hun i thawk tthan hi a si. Credit: The Chin Journal
