Related Articles
Chin Mi Kan Pa Pakhat A Simi Le CRC Zongin Advisor Arak Ttuan Bal Mi Rev Lai Nou Nih Mual A Kan Liam Tak
Malaysia ah Chin miphun kan pa pakhat asimi le CRC ah kum 2019 lio in ruahnak petu (Advisor) pakhat zong asimi Rev. Lai Nou cu May 10, 2021 ni ah Pantai Hospital, Kuala Lumpur ah Pathian sinah a kan dinh taak. A mah hi Matu Christian Fellowship (MCF) ah caan saupi pastor a kan tuanpiakmi asi. Tantaakmi chungkhar le Khrihfabu member nan dihlak nan ngaihchiatnak kan in hrawmpi hna.
Note: Hi thawng kan laaknak hi Global Chinland in a si i, tlamtlin lo nak tampi a um lai caah a ruahzia nan kan thiam nak lai kan in law hna. Tampi kan i lawm
RELCHAP: Hakha khuapi khua chehvel hmun cheukhat ah SAC ralkap nih bomb an hmanh
=====
Chin State Administration Council ralkap hna nih Hakha khuapi khua chehvel hmun cheukhat lam kam ah Bomb an hmanh tiah khuami hna sin in thawng kan theih.
Hi kong he pehtlai in min langhter duh lo minung pakhat nih, “Bomb an hmanhnak hi hmun thum hrawng ah a si. A hmun hi Innwa Bank hnulei, Hakha University pawngkam hrawng ah a si. Cun, bomb an hmanh mi hi pe 3 dan in an hmanhnak zong a um,” tiah a chim.
Atu bantuk in SAC ralkap nih Hakha khua chehvel ah Bomb an hmanh hi CDF-Hakha he an i kah hnu in an hmanh mi a si.
Credit: The Hakha Post
ThaawngDang Reltthan: Kawl Miphun Hraimtlai Bu Thar “Burma National Army” an Dirh
—————–
SAC ralkap doh awkah Kawl miphun hriamtlai bu Burma National Army (BNA) an dirh, tiah theih a si. “SAC nih sualnak ngei lo Myanmar rammi hna ruru hranghrang thahnawnnak, ningcang loin tlaihkhihnak, tuksum hremnak le tlaih a tongmi nu hna cung ah taksa lei limhang chiatchuah in hremnak an tuahmi vialte lehrul awkah hi BNA hi kan dirh,” tiah nihin May 10 ah thawng an thanh.
BNA ah Kawl miphun lawng si loin tlangcung miphun dangdang zong an i tel hna. Abikin an i tinhmi cu: “Myanmar ah Federal Democracy uknak phung ser ding, Rialdip ralkap uknak ahram chah ding, Phungning loin tlaihmi vialte luatnak hmuh dih ding, SAC ralhrang doh ding le Myanmar rammi hna runven ding” timi hi an si.
Credit: The Chin Journal
A Dang Pakhat: India Rampi Ni 10 Chungah Covid-19 Ruang i A Thi Mi Zat Hi 36,110 Leng A Phan
India rampi ah cawn ni 5 ah khan zawtnak thar an hmuh mi zat cu 4,14,554 an si i, ni hnih chung cu a peh in zawtnak thar hi nuai 4 leng cu hmuh an si.
Ni 10 liam cang mi chungah khan India rampi ah Covid-19 ruang i a thi mi hi 36,110 an um manh i, suimilam pakhat chungah mi 150 tluk hi an thi lai tiah ruahdamh a si. Ni 10 chungah khan zawtnak ruang i a thi mi hi 3,000 leng cu an um peng ti a si. Cawn ni 5 ni ah khan rampi chungah zawtnak ruang i a thi mi hi 3,927 an si cang tiah theih a si.
India rampi nih hin ni 10 chungah Covid-19 ruang i a thi mi zat a tam bik phan in cazin thar cu an siam hi a si. Tuan ah khan cun US nih hin a tambik Cazin dirhmun an phanh lio ah khan ni 10 chungah mi 34,798 bak te an rak thi i, ni 10 chung tho ah khan Brazil rampi ah mi 32,692 an rak thi ve cang tiah World Health Organisation(WHO) nih cun an chim.
Ram chungah zawtnak a ngei mi zat hi minung 36,45,164(ngei cuahmah lio mi) an um cang i, hi zawtnak angei lio mi ah hin arak ngei cang mi chung thawk in 16.96% cu an tling cang i, zawtnak in a dam mi hi 81.95% ah a van tla deuh ve ciammam. Hi zawtnak ai thihpi mi zat hi 1.09% cu an tling ve. India ram chungah Covid-19 zawtnak a kai mi hi kum 2020 August 7 ah khan nuai 20, August 23 ah khan nuai 30, September 5 ah khan nuai 40, September 16 ah khan nuai 50, September 28 ah khan nuai 60, October 11 ah khan nuai 70, October 29 ah khan nuai 80, November 20 ah khan nuai 90 bak phan in December 19 ah khan cun million cu an luan ve. A tu a voihnihnak(second wave) ah hin cun a kai thluahmah i tukum May 4 ah khan zawtnak a ngei mi zat cu 2 million nak tam an phanh hi a si.
ICMR nih cun May 6 tiang Covid-19 test nak hi voi 29,86,01,699 tiang a ngeih cang hna i, cawn ni 5 ni ah khan voi 18,26,490 tiang test nak an tuah tthan hi a si. Union Health Ministry nih an langhter ning ah cun State 10, Andra Pradesh, Maharastra, Uttar Pradesh, Delhi, Karnataka, Kerala, Haryana, West Bengal, Tamil Naduh le Rajasthan ah hin ram chung i zawtnak hi zakat chungah 70% hi cu hmuhchuah thar an si.
