Related Articles
Yangon ah hram dirh in a cawlcang mi buu pakhat nih hlethlainak (research) an tuah i ramleng in ramchung ah CDM caah bomhnak kan kal ter mi Kawlram tangka in Ting thong tampi a si nain mah chung ahcun CDMers a tuah tak mi hna sin ah 100% chungah 25% tluk hmanh a phan lo tiah an hmuh nak kong le an ngeihchiatnak kong kan theih.
An mah buu zong nih media ah an rak langhter te men lai. Mindat lei an zuan hnawh cuahmah lio hna a si caah caan zong an rauh kho men. CDM caah tangka kuat mi chung in tangka tawlreltu cheukhat hna nih cun motor le motorcycle thatha ai cawk mi zong an um len ti kha an hmuh.
Mah bantuk news hi ramchung lei in a kherhlai kho deuh mi nih rak kan tial piak uh law a tha tuk ko hnga. Ramchung he ramleng he kan lung a fim deuh lai pinah bomh kan duh mi hna sin ah thahnem santlai a si deuh ko hnga. Credit: Sang Hre(FB)
A Dang Reltthan: Keimah Nakin Miphun Na Dawt Deuh Tiah Kan Hnahchuah Ngam Lo Ka U ka dawt Chawn Ṭial “Nangmah le ka nu nakin ka miphun ka dawt deuh hna” tiah na ka ti i hmailei kan tefa hna le Laimi tefa hna nih zalong tein ram chungah an len khawhnak dingah ralhrang doh dingin ram lak na kal lai ahkhan mu keimah nakin miphun na dawt deuh tiah keicu kan rak hnahchuah in kan rak uh ṭanh ngam lo i, a thloh zong kan rak thloh ngam lo. Miphun a dawt deuh caan a um bantukin keimah zong hi a ka dawt deuh caan a um ve te ko lai tiin kan sian lo tuk buin thazaang peknak bia he ram lakah kan rak kal ter.
Ram lak um cu na tlamtling maw kan ti ahkhan na tlamtlin lonak kong chimh na ka duh lo kha mu. Aa nuam tuk bantukin dakaw na ka chimh kha, a lungrethei sual lai ti na ka phan ca zongah a si ko lai nain. Tukum dongh lei cu ram a ṭhat pek ṭhat lo pek ah chungkhar kan dirh cang lai mu na rak ka ti ahkhan hawidang nu cio bang ka duh bikmi pa co lai cu kaa rak ngeih tuk ve cu. Ṭhitumnak thuam tete hna kei ka rak i zoh ve cang cu. Kan i duhdawtnak caan hi tawi hmanh seh law kum tam tukin aa duh daw cangmi bantukin na ka dawt i ka zawn na rak ka ruah. Hakha ah na rak tlun caan i na nu pawng na ih caan hmanhah a thli tein phone kan rak i chawn tawn kha. Na nu ṭhangh na duh lo caah.
Ka hniang, hawidang nu cio bangin dawtmi sinah i hnoh i caan hman te hna ka rak duh tuk ve i dakaw, na rak tlung deng maw kan ti caan i nai rih lo e na ka ti ahkhan a thli tein kan rak uh ṭanh tuk ve si. Kan ngai tuk nain keimah nakin miphun nai thim deuh lio a si caah na sinah vuivai nak bia chim ka rak duh lo cu. Ka hniang hringtu nu le pa cu dawt ding an si na rak ka ti i na nu na dawtnak kha na rak ka chimh i nangmah le keimah cu thluachuah kan hmu hrim hrim ko lai e na rak ka ti kha. Atu ahcun keimah pi lawng pei na ka kal tak ko hi.
Na nunnak a liam an ti lio ahkhan keicu kaa zumh lo. Hakha na rak tlun ahkhan a kir colh dingin na ka ti caah keimah hmanh ton ta manh lo tein na kal diam rua tiah pei ka ruah i ram lakah a um ko tiah ka rak el hna cu. Atu tiang hi keicu kaa zumh rih lo. Na nung rih ko cu. Vei aw ka dawt, thlan khur na tlak thaizing kha dakaw nidang tawn ah nangmah nih thaithawh (breakfast) ei na ka hngah pengmi kha mah ni cu kan hngah peng cu. Phone kan call ca kan kuat len nain na ra ti lo. Hakha na um fawn ko nain na rak ti lo i ei thai loin keizong ka um ve cu. Ka hniang, ngahfah na tuar lio ah khan mu kan domh tlaih manh ve lo i ka ngai thiam. Khuazei dah a fak tiah kan hal manh lo i ka ngai thiam. Ka cungah lungfak in rak um hlah mu.
Nihin tiang hi na nun khawhnak dingah thla ka cam peng, na kal rih lo tiin ka cohlang kho lo. Miphun na dawt i na nunnak na pek bantukin na ka dawt ve caan a cu i nunnak pek loin nun tu ziah na rak i thim ve lo tiah kan mawhchiat ta ko lai mu.
Ka dawt Nunu nih cun mu “Iang, Bawipa nih na thlacamnak hi an leh ko e. Na dawtmi hi a nung ko e a ka ti. A nunnak hmun belte ai dang. Nang hi vawlei ah na nung i a nih hi van ah a nung ve. Van le vawlei cu aa hlat lo. A cung le a tang in kan um. Second ṭem tete in kan naih ko e” tiah a ti bantukin ka hmailei nun hi ka rak peh rih lai i Bawipa nih caan a ka khiah piakmi ka phak tikah van ahkhin sunglawi tein kan i tinhmi ṭhitumnak kan tuah lai mu.
Siaherh ta lo belte in ka kal tak hlah. Na ka dawt tuk ti theih bu tein keizong kan i ton ṭhan hlan tiang. Na dawtmi Na nau.
Note: Chawn Ṭial dawtmi nih an tuanbia a ka ruahmi chirhchan in ka ṭialmi a si i porhmi le chapmi a um lo. True story a si. Chawn Ṭial cu june 5 ah Hakha ah bomh puahnak in a nunnak a liammi a si. Iang nawlonhnak tein a tuanbia le an hmanthlak kan vun tar. Credit: Nunu-NS
