Related Articles
Mizoram, Champhai district chungah Mizoram Legistration Assembly Constituency 5 lakah East Tuipui area hi Thantlang le Falam peng Zahautlang leiin Mizoram a lut cemnak lam a si bantukin February 1 kan ram buainak a chuah hnuin mi tampi an rak zaamnak area zong a si.
Tu thla June 10 ah Hakha le Thantlang pengah Chin mipi ralkap le ralhrangbu kar ah i kahnak a chuah hnuah mi tampi cu Mizoram East Tuipui area ah an rak zaam hna. A tutiang theih khawhmi ah a rak zaam mi hi 1000 leng an si cang tiah theih a si.
Atu ah ralzaam hna hi East Tuipui area chung Chawngtui E ah 152, Farkawn ah 183, Khawbung ah 68, Thekte ah 35 le Vaphai ah 535 an lut cang. Umnak ding a daih rih lo caah a rak lut kho rih lo mi Tio kam ah 480 an um rih tiah theih a si.
Ralzaam hna kong he pehtlaihin Mizoram Chief Minister Pu Zoramthanga nih tha tein kan zoh hna lai tiah a chim cang nain, a rak lut chap mi an um lengmang caah le Mizoram lei Covid-19 vennak kongah lockdown an kalpi lio a si caah Mizoram leiin a buaipi tu hna zong harsatnak tampi an tong.
Hi kong he pehtlaihin East Tuipui hruaitu MLA Pu Ramthanmawia nih ralzaam hna cohlan ding kongah CM Zoramthanga sinah a nawl bantukin ralzaam hna ei le din ah harsatnak an tomlo nak dingah a nawl tiah theih a si. Ralzaam a rak lut mi hna SYMA champhai, Tuipui ral YMA group le MLA tawlrelnak in a si khawh chungin zohkhenh le buaipi an si pin ah MZP le NGO dang dang zong nih an si khawh chungin bawmhnak zong an pek ve hna.
Ralzaam hna umnak ding caah Mizoram cozah nih a ti mi Zawlsei khua mi zong ralzaam hna umnak hmun sak in ni fatin tlangrian an tuan cuahmah tiah theih a si. Credit: The Chin Post
A Dang Reltthan: Hakha ah Haa siibawi le siangcachim Sayama pahnih tel in minung 4 SAC ralkap nih an tlaih hna June 19, Hakha ah Haa siibawi (Dentist) le siangcachim Sayama pahnih tel in a tlawm bik minung 4 cu zaanlei 6:00 pm hrawng ah SAC ralkap nih an tlaih hna, tiah kan theih.
“Haa siibawi hi aho a si kan hngal kho rih lo. No. 3 sianginn ah ca a chim mi Sayama Dawt Tial le a naunu Sayama Par Tha Dim cu an inn luhhnawh in an tlaih hna. Haa siibawi an tlaih lio ah hin khuami pakhat zong an tlaihchih. Cheukhat nih mi dangdang zong an tlaihchih hna, an ti ca ah a tlawm bik minung 4 cu an tlaih ko hna,” tiah min langhter lo mi pakhat nih The Hakha Times ah a chim.
Atu siangcachim an tlaih mi hna hi Hakha Gangaw lam sang ah a um mi an si. Haa siibawi le khuami an tlaih mi hna tu cu fiang in theih a si rih lo. SAC ralkap nih June 19, zaanlei 5:50 pm hrawng ah an inn luhhnawh in an tlaih hna i an kalpi hna, tiah kan theih. The Hakha Times, June 19. Credit: The Hakha Times
