Related Articles
Paw nuamh lo, tu le tu ek inn ah kal lengmang le ek ding i van kal zongah ti lawng tein a chuakmi kan chung lei nuamh lonak a fawinak cun chungthlet kan ti lai cu. Cu nih cun minung kan sinak ah harsa ngai in a chia tawntu dam lo nak pakhat a si ve cu tikah fawi tein i zohkhenh khawhnak lam tampi a um cu lakah tlawmpal kan rak langhter lai, zei tin dah naa zohkhenh lai tiah a herh mi tete tampi lakah tlawmpal te a tanglei bantuk hin a si lai.
1. Ti Hal In Um Lo Ding: Chungthlet ahhin kan ton bikmi pakhat cu kan chungah ti a tlawm caah hin a si tawn, cu nih cun thil ttihnung ngai ah a hruai khawh. Cu caah ti kha tam piin din ding, ti lawng si loin ti in a um mi theihang te hna kha chungthlet nak nih an tlunh ahcun chun nitlak diin lo bakin na din piak ah a ttha. Tampi na din khawh lo hmanhah tlawmpal te na dinmi hmanh nih khan tam tuk te na pum caah tthatnak a chuahpi khawh i na chungthlet nak zong zialmal tein a dam ter lai. Ti a ngeimi theihang kan ti tikah tthenkhat hna nih cun Apple in a chuak mi ti(hang) hi a ttha lo ngai tiah an ti ve. Cu i suimilam 12 chung na ti le theihang din mi nih an tthat ter hlei lo i, luak chuak in suimilam 24 chung na um ko rih a si ahcun a rannak in na pawngkam um mi Doctor sinah na vai i zohter zawkzawk lai. Ngakchia chungthlet mi an si ahcun theihang le thlitu a ngeimi ti(hang) zeihmanh nan pe hna lai lo. Hnuk ding lio an si ahcun hnuk dinh kha a poinak um lo.
2. Fawi te Cawk Khawhmi Chungthlet Damnak Sii(Medicine): Fawite cawk khawhmi kan ti tikah Doctor te nih ca ttial piak a herh lomi sii, pawngkam sii dawr i mah nih cawk khawh mi. Chungthlet tikah ah, cu sii i an hman deuhmi cu loperamide(Imodiam A-D) a si loah bismuth subsalicylate(Pepto-Bismol) ti a si i Laiholh cun van lehawk a har deuh caah mah ti khan kan van langhter, mah sii hi an hman ngaimi cu a si i inn pawngkam sii dawr ah cawk awk a um dih ko lai. Nain mah sii(medicine) hi ngakchia hna caah cun hman bak lo ding Doctor le nih peknak nawl a um lawngah ei/din ter hna ding. Khat leiah hi sii kan rak langhter mi hi paw lei ah dam lonak/fahnak(hrik a um mi) hna caah cun a ttha tuk lem lo. Na ei/din i tthat lei na panh hlei lo a si ahcun doctor te panh kha a sualnak um bak lo.
3. Hman Ning Cang Ttha Tein Aa Ttialmi Fahnak athatmi Sii(painkillers): Chungthlat tikah tthenkhat hna cu paw zong biatak tein a fak chih tawn, tuar khawh a si tawn lo cu tikah taksa a hrawk kho lomi fahnak a dam/chawng tu Sii din piak ah a poi lem lo cucu anti-inflammatories a si loah NSAIDs an ti i taksat caan siseh pawfah tibantuk ah an hman ngaingaimi sii a si i a fawinak in ibuprofen le naproxen ti khawh zong a si. Hmanhsehlaw hi sii hna hi tam tuk din/ei piak a ttha lo zeicatiah paw caah um nuam lo in a tuah khawh pinah paw caah rawhnak a chuahpi khawh, na cawk tik zongah ttha tein a mah sii ah hman ning cang aa ttialmi kha cawk khawh naa zuam lai. Doctor le nih sii dang an in pek a si ahcun doctor le nih pekmi sii kha din piak ah a ttha bik, kal le lunglei fahnak na ngeih ahcun din/ei piak duh hlah. Ulcers hna na ngeih a si ahcun doctor te i zohter ah a ttha fawn. Cun kum tling lo(kum 18 si rih lomi) nih cun doctor le panh kha a ttha zeicatiah sii zong hi a tthatnak tampi ko buah kum tling lo hrang ahcun hmailei nunnak ca tiang rawhralnak a chuahpi kho tu a si caah i ralrin paoh kha a ttha mi si.
4. Tam piin Dinh Piak: Hibantuk chungthlet siseh a dang dang damlonak ah a ttha ngaimi thil pakhat cu thadam te le tam piin dinh piak, dinh kan ti tikah taksa cawlcangh ter lo a fawinak cun dai tein ih ziar i zei hmanh tuah piak lo. Tam piin na ih piak lai, lum tein naa tuah lai i na taksa kha na dinh piak hrimhrim lai. Cu ti na tuah ahcun na chungthlet siseh a dang dang dam lonak zong a dam ter khawh i taksa ciankuan lonak tiang zongin damnak a chuah pi khawh ti a si.
