Related Articles
SAC ralkap 100 renglo Sopum khua an phan, khuami zatceo deng an zaam SAC ralkap minung 100 renglo deuh cu June 9, zaanlei 4:00pm in 5:00pm kar ah Thantlang Peng Sopum khua an phan, khuami zatceo tluk an zaam, tiah kan theih.
“An ke in an phan. Ke 12 motor ti mi pakhat nih an thilri le riahcaw pawl a vun phurh. Tar pipi zong an i tel. Ruuksai si loin paiper an i bei hna. Sianginn (Vanzang tlang le Zahnak tlang lampial) ah minung 50 hrawng, Thantlang lei in khualuhka Bethel Thlacamnak hmun ah 50 hrawng tiin hmunhma an khuar,” tiah min langhter lo mi pakhat nih The Hakha Times ah a chim.
Khuami zatceo tluk cu an zaam nain ruahpi a suur tuk ca ah a zaam kho lo mi nunau cu an um. Hi SAC ralkap hna hi zeican dah an um lai, ti cu hngalh a si lo nain an riahcaw cu a thahnem ngai, ti zong min langhter lo mi pakhat nih a chim fawn.
Sopum khua cu Vanzang Tlang khua 6 lak ah Thantlang in hei pal hmasa bik mi khua a si. Zahnak Tlang Lungler khua SAC ralkap sakhaan kalnak lampial zong a si i CNF/A umnak lei pialnak zong a si. Credit: The Hakha Times
The Chin Journal zong nih ti hin a langhter ve “Sopum ah SAC Ralhrang 100 Hrawng an Phan, Khuami Cheuthum-Cheuhnih an Zaam. Nihin zaanlei sml. 3:00 hrawng ah Thanthlang peng, Sopum khua ah SAC ralhrang 100 hrawng an phan i khuami cheuthum-cheuhnih an zaam, tiah thawng kan theih.
Khua upa pakhat nih, “An rak phan lai timi thawngpang kan theih cia i pa upa deuh lawng khua ah an taang. A dang cu an zaam dih. Kan zapi zaam cu kan inn an bauh dih lai ti kan phan caah cheuthum-cheukhat cu khua hngah pah in an taang ko,” tiah The Chin Journal ah a chim.
SAC ralhrang pawl Sopum khua an luh lai ah meithal zun 10 hrawng pehzul in an puah. Khua an luh hnu ah khuachung ah a taangmi khua upa le pastorte cu SAC ralhrang bawi nih a ton hna i biaruahnak a ngeih hna. Tonnak aa telmi khua upa pakhat nih, “Zeihmanh nan thinphang hlah u a kan ti. Nan sattil pawl zong a herh a si ahcun nanmah nih nan khiahmi a man ning tein kan in cawk ko hna lai an ti.
Buaibainak chuahpi awk ah kan ra lo a kan ti. Cun, meithal i ken buin ahohmanh i chok hlah u, ral ah kan i ruah hna lai i kah sual a um kho a kan ti,” tiah a chim. SAC ralhrang pawl cu Sopum ah tu zaan riah an i tim. Zei tik tiang an caam lai theih a si lo.
Sopum cu Thantlang he meng 12 hrawng a hlatnak ah a ummi a si i, ahlan ah a rak ummi SAC ralhrang minung 17 hrawng cu kan hnu thla ah khan Thanthlang lei ah an rak kir. A um ciami pawl an kir hnu ah thazaang tampi in nihin an rak phak tthan hi a si. Credit: The Chin Journal
