Related Articles
Tuzaan lei Hakha bomb puahnak kong he pehtlaiin a thi mi an um tiah The Chin Journal zong nih thawngthanhnak a rak tuah cang bantukin a tu ahcun a thi minung cu theih fiang a si cang.
Ti hin The Chin Journal nih a thanh ning cu a si “Khuathar Bomb Puahnak ah Minung Pakhat a Nunnak a Liam. Nihin zaanlei sml. 4:25 hrawng ah Hakha Khuathar, GTI phakhlan ah bomb puahnak a chuak i minung pakhat a nunnak a liam, tiah thawng kan theih. A nunnak a liammi hi ahodah a si timi fiang in kan thei lo.
Khuathar bomb a puah lio ah Pa-La-Ka sang uknak zung hmai zong ah bomb voi khat a puak ve. Nihin zaanlei bomb puah kong ah Hakha khuasa mi tampi nih a thawngpang a thang tuk, ttihnung tuk a si, tiah an chim.” ti’n an rak langhter ning cu a si.
Caan tlawmpal ah a tubantuk thawng, bomb puahnak ah a thimi cu tlangval Phun Sang Zathang a si tiah theih a si, amah hi mino te mi ziattha le mi fel te a si tiah chim zong a si i a hawipa sining(chene) belte hi fiang in theih a si rih lo. Tantakmi chungkhar Bawipa nih in hnem hna sehlaw arauh hlanah hi Uico uknak hin Pathian nih teinak kan pe hramm ko cang seh.
A Dang Reltthan: Hakha peng, Surkhua ah SAC ralhrang pawl an rak luh caah khuami an zaam dih i, a zaam kho lomi kum upa tar minung 20 in 30 karlak hrawng lawng khuachung an taang, tiah thawng kan theih. SAC ralhrang pawl Surkhua an phak hnu ah khuachung ah meithal an puah hnawh len hna caah khuami an um ngam ti lo i an zaam dih hi a si.
Minung pakhat nih, “SAC ralhrang pawl an rak phan i zaan ah khuacung ah voi tam ngaite meithal puah sawh in an puah len. Khuami pawl an um ngam ti lo caah an zaam dih hna. A zaam kho lomi tarnu tarpa pawl cu biaknak lei rianttuantu hna nih an zohkhenh hna,” tiah a chim.
SAC ralhrang an phak hnu ah Surkhua a zaamtakmi hi an zapi in 1,700 in 1,800 karlak hrawng an si lai, tiah a cunglei minung nih a chim chap.
June 1-2 tiang SAC ralhrang pawl cu Surkhua meithat zung ah hmunhma an khuar nain June 4 ah cun Surkhua ah an um ti lo, tiah khuami pakhat nih a chim. Loklung khua in a zaammi hna zong atu tiang khua an hlam kho rih hna lo, tiah thawng kan theih. Credit: The Chin Journal
