Related Articles
Nizaan June 26 le nihin June 27, PDF-Kalay le Ralhrang karlak kahdohnak ah PDF-Kalay leiin thawng an thanhmi zoh tikah PDF Kalay hi an tthawng ngaingai timi a lang. Pathian tunih um pi camcin hna sehlaw thih le lohnak chungin luatnak pe hram ko hna seh.
An thawngthanh ning cu tihin a si, PDF kalay kahdoh nak thawngthanh! 1.Nizan june 26 chun suimilam 1pm hrawng ah Kan Kaw(ဂန္႔ေဂၚ) lei in kalay myo lei ah a ra mi ralhrang motor 20 nak tam cu PDF kalay nih Net Chaung (နတ္ေခ်င္း) le Chaung khuah (ေခ်ာင္းခြ) kar ah an kahdoh hna i ralkap lei in a thi mi an um nain zeizahsat an thi ti cu kan thei kho rih lo.
2.Tuni june27 chun suimilam 1pm hrawng ah kan kaw (ဂန္႔ေဂၚ) in kalay lei ah a ra mi ralkap motor pathum (minung 50 hrawng si mi) cu Khuai Cing(ေခြႀကိမ္)khua le Taan Phu (သံဖို) lhua kar ah PDF kalay nih ram lak in an kah hna i ralkap lei in pakua an thi i hliam tong mi zong an um. PDF kalay lein in hliam tong mi an um lo. 27 jun 2021. Credit: The Chin Post
A Dang Reltthan: Rakhine ramkulh Kyauk-taw myone Mahamu Buddha i umhmun khuar ralkap minung 20 reng lo cu June 26 zahan zaan suimilam 12 hrawngah AA ralkap pawl nih an kulh hna i an ralthuam le hriamnam an lak piak dih hna hnuah zeihmanh tuah loin an zaam ter hna tiah khua mipi nih cun Myanmar Now thawngthanhnak ah an chim.
Ralkap 20 hrawng cu Mahamu Buddha ah umhmun khuar in an um i an sinah AA pawl nih an luhhnawh hna lai timi ruahnak pakhat hmanh an ngei lo, an ralthuam le hriamnam hna cu thingkuang le bek(bag) tibantuk ah an chiah dih hna. Zaan suimilam 12 hrawngah AA nih cun an kulh dih hna i zeihmanh cawlcaang manh lo in an sunghkhan colh i AA nih cun an ralthuam le hriamnam dihlak cu an laak piak hna tiah khua mipi pawl nih cun an chim. Cu thawng cu AA palai pakhat a si mi zong nih a cang taktakmi a si tiah a chim ve nain, remtthannak an ngei tthan tiah a peh.
Khua i um mi Ko Zaw Zin nih cun “Khua mipi in siseh keimah ruahdamhnak zong in siseh Mahamu Buddha i ralthuam le hriamnam he umhmun khuar ralkap pawl cu AA nih hin nun an chimh hna in a lang” tiah a ti. Thil a cangmi he pehtlai in AA lei biaphuangtu Khaing Thukha cu bia an hal i, a chim mi cu “Mino karlak ah buainak hi a tam ngai, Asinain ralkap lei he relfelnak kan tuah cang. Tu ahcun Mahamu Buddha pawngkam hrawng cu buainak um ti loin a dai ve cang” tiah a chim.
AA nih ralkap sinah hriamnam an laakmi cu ralkap sinah peek tthan a si maw si lo timi bel theih a si lo i, ralkap pawl nih Mahamu Buddha hmun an chuahtaak le chuahtak lo zong fiangfai in theih a si rih lo. Nihin June 27 ahcun Mahamu Buddha pawngah ralkap mawtaw 7 le ralkap dang zong an phan chap tiah khua mipi nih cun an chim.
Rakhine ralkap AA le ralkap hi nikum November thla ah khan ikahdohnak hi a um ti lo i, nikum November thla hnuah tutan hi an karlak buai hmasabik tan a si. Thla 8 chung a hohmanh i kaap loin dai tein an um hnuah tubantuk thil a can cu an buainak hrampi hna a si hnga maw, remnak felfai an ngei colh timi zong theih a si rih lo.
