Related Articles
Ralhrang rallokap doh dingin RSO nih a thanh Mipi nawlngaihnak ala mi ralhrang rallokap cu RSO nih doh dingin RSO Tongmangno Kyaw Myint Tun nih video aw in a thanh. Credit: The Chin Post
A Dang Reltthan: Naite i Syria cozah thimnak ah president Assad nih 90% hrawng in a tei. An lawmh zan cu an ram ralthawh lio ko a hluan. Biahalnak pakhat cu Assad te chungkhar duh lo ruang in kum sarih leng an ram ralthawh i ISIS ṭih an nun tuk i rampi uk dih an timh lio ah zeitindah Assad nih uknak an tlaih khawh rih?
Mah biahalnak hi a biapi ngaimi a si. Ralkap nih ramkomh bu Myanmar uknak an lak le cucu duh loin daihnak tein lamzawh le rian chuahtak a si. A hnu ah thinhun i sum khawh loin hriamtlaih a van si le cozah le mipi i dohnak a chuak cuahmah. Ramchung ral, “civil war” ti khawh zong a si cang nain a luancia mipi thim cozah lio zong ah atu tluk hrawng hi cu ramchung ah ral a rak tho ko. Biahalnak cu ramchung ral hi ralkap uknak huat men in kan tho lai maw, ramkomh bu ah lungsi lo ngaiin ai paih pengmi Chin le a dang miphun hna? Cun, a phu lai maw?
Syria ramchung ral an sunghnak a ruang tampi kho men nain a biapibik le Assad nih tei ai thawknak hi zoh usih law, tutan kan dirhmun ah ruah a phu ngai kho men. ISIS biatak tein an van thawh hlante in Syria ramchung ral hi mipi/ Assad dotu hna nih an rak tei cuahmah nain IsIs kha a rak ṭhawng. UN ah siseh USA zong Syria kong ah a rak buai khim ve. Assad cozah thlak ding an rak duh i mipi an rak bawmh ngai hna. Asinain ram a rawk cikcek deng. Minung millions in ralzam an chuak. A million deng an thi.
Asinain Assad nih a tei ṭhan hna le tu cu kum 10 a liam cang. Syria khualipi an phak nakding ah ni tlawmte lawng a rak i duh. IsIs le mipi ralkap nih uknak an lak cang lai tiah ruah a rak si liote ah Assad cu Russia ah a thli hmanh si lo, zapi theih in a zuang. An ram zamtak tiah mi tampi nih an rak ruah. A si lo ai. Russia bawmh a va hal. Na ka chanh ahcun ka ram chung hmunhma ṭha na duhmi paoh na ralkap chiahnak caah na hman lai, kan rili zong na hman lai a rak ti. A fawinak cun an ram a zuar.
Mah cu zarh ah cun Russia nih Syria ah vanlawng in hehchat bomb an thlak i an ram cheu thum cheu hnih ti ngacha cu vuncam ah a chuah. Mah cun mipi nih an celh lo, ral an sung. Khatlei ah IsIs ral an rak celh hoi lo. Mah ti cun Syria ramchung ral nih unau, nu le pa, fale hna le hawikom a ṭhenhmal dih hna. A nung in ai ṭhen nale thihṭian in a ṭian nale in an si. Assad nih kum hra hnu ah thimnak a tei ṭhan.
Syria ralzam tampi ka ton hna kan khua miphun kip fonh i tonnak ah siseh rian zong ah a si. Mah ramchung ral kha a phu maw tiah ka hal hna. Tei u sih law a phu ko lai, a titu an um i cheukhat cu politics ceih ka zuamti lo an ka ti tam ngai.
Min Aung Hlaing le kum 70 chung a fek cangmi ralkap bu nih a luancia kum 60 chung ramchung chuak thilri vialte, ngakchia le nu hna an zuar dih cang hna. Kan ram ah hin US te hna le EU nih an duhmi thil hi an ralkap le thazang hmang in lak an duhmi a um huaha ti lo. Asinain Russia le Tuluk caah cun kan ram khi an mitthi tuk rih. MAH nih a zuar khawh ding a tam tuk rih, a nunnak himnak ding caah.
Atu ramkomh bu Myanmar i ramchung ral timi bia hi cu tangcheu hrawng level lawng a si rih. Tam tuk ai duh rih. Civil War timi ramchung ralpi hi hrial khawh chung hrial ding a si nain kan hrial kho lai lo kan ti a si ahcun Laimi cu kan cimit khomi a si vekvek caah Independent lawlaw thanh ding a si. Cucu kan thanh ṭung lo ahcun firkhut, hrawkhrol le pumpak ca cawlcangh sawh a si.
Rohingya hna i cohlan ding le Gay minister hei ti pawl International Attention le bawmhnak duh men ah Pathian biami miphun hna nih khua ruat ko uh. Hei chim sawh bia. Credit: Si Bawimang Lian
