Related Articles
Kan theih cio bantukin nihin Thantlang i ralkap an thlah ning hna zoh tikah thin a phang ngaingai, zeicatiah nihin an thlahmi hna cu an tam ngaingai. Voidang tawnah a um theng bal lo mi a si. Zei ruangah dah CNF caah cun ttih a nun khun lai tiah cun Thantlang lei cu CNF camp he aa neih mi a si cang pinah nai hrawng Hakha le Thantlang boruak a hman ti lo.
Cun nai teah CNF le NUG rianttuan tti dingin minsenthutnak zong an rak ngei, cu ruang zongah ralkap nih hin Thantlang, CNF camp aa neih biknak khua ah ralkap an chap zong hi a si kho. Ruah lo piin Victoria Camp zong hi an zuanhnawh khawhmi hna zong a si. Cucaah CNF siseh mipi hna zong zei thil a can paoh ah zuang kho colh dingin timhtuahnak ttha tein kan rak ngeih cio a hau.
The Chin Journal zong nih nithaizing ah ti hin an rak langhter i kan hmuh cio ttheu lai dah “Thantlang in Khualhringtlang lei ah SAC Ralhrang an Kal. Nihin zinglei ah Hakha in Thantlang lei ah SAC ralhrang minung 50 hrawng an i thawh i, Khualhringtlang lei ah an lan, tiah thawng kan theih.
Thantlang khuami pakhat nih, Nihin zinglei Lo in ka tlun pah ah Buva ah ka ton hna i ka thilri an ka check dih. Cun, Thlantlang khualuh lai ah bu khat he kan i tong tthan, tiah a chim. Ralkap bu 2 an si i, kee bak in Khulahringtlang lei ah an kal hna. Khuafo lonh Arcirh an phan cang, tiah a chim chap.
Atu SAC ralhrang pawl an kalnak Khualhringtlang lei hi CNF Camp a umnak he cun a lampi aa ralkah deuh ngai i, zei ruang ah dah Khualhringtlang lei an kal timi fiang in theih a si lo.” ti’n an rak langhter ning cu a si. Cun The Chin Post zongnih tihin an rak langhter ve “Thantlang Ah Rallokap Mawtaw 4 In An Phan Than. Hakha in Thantlang ah rallokap khat in a phor mi mawtaw 4 cu nihin zaanlei ah an phan than tiah thawng theih a si. Tu zingka zong ah Thantlang in Rih ramri lei kalnak lam ah rallokap 50 hrawng ke in an kal.
CNF le NUG hmunkhat ah rian an tuan ti hnu in rallokap phu hna nih CNF umhmun lei Thantlang ah rallokap thazaang an chap nak a si tiah Zalen nih a langhter.” tin an rak langhter i Zalen thawnglatu le bang nih cun CNF le NUG nih rianttuan tti dingin hmalaknak an ngeih caah hi tihin ralkap an chapnak a si tiah an rak langher bak.
Media ngan pahnih nih an rak thanh bantukin zing ah khan cun ke bakin an kal tiah an rak langher cang i zaanlei deuh khan cu rallokap khat in Mawtaw 4 he bak Thantlang leiah an panh/choi hoi tiah theih a si tthan. Cu caah kan chim voi 10 bang CNF le rallokap karlakah hin kahdohnak fak tuk a chuak kho mi a si cang i a chuahsual ahcun mipi nih a kenkipin kan cawlcangh a hau ve lai.
