Related Articles
ZRA(Zomi Revolutionary Army) hi Zomi hriamtlai bu pakhat a si ve i 1997 ah dirhmi a rak si, an dirhnak a ruang bik hi tlangcung mi hna Manipur i um Kuki le Paite karlak buainak a rak linsa tuk caah a si. ZRA nih aa timh bikmi cu Zo miphun dihlak hmunkhat te i cawlcangh tti hi a si. Cun ZRA hi ZRO chungah a um mi a si i ZRO(Zomi Revolutionary Organization) hi April 1993 ah dirhmi a si.
Hi ZRA hriamtlai bu nihhin NUG nih ralkap ah a ngeihmi PDF-Tedim hmunhma khuarnak(camp) an kah hi voi khat/hnih lawng si ti lo. Mipi zong kan/an lau cio i zei ruangah dah si hnga tiah biahalnak tete zong a um pinah hi hna pahnih(PDF-Tedim le ZRA) hi cu unau miphun khat bantuk ah ruah cio mi an si fawn tikah khan mipi lungthin a buai ter ngaingai.
ZRA nih hibantukin thil an tuahmi kongah CDF(Chinland Defence Force) zong nih ca an rak chuah cang pinah buu dangdang nih mawhphurh rak pek cio a si. Spring Revolution i aa tel ve mi Zomi buu 5 hna zong nih an ningzahnak kong zong an rak langhter cang fawn.
Tutan zong Tedim mino tthenkhat nih cun ZRA cung i an lungfahnak an rak langhter i ZRA hi Dalaan an si ti tiangin catlang an taar. “Tidim peng Rultlang hram ah Tidim mino nih ZRA cungah an lungfahnak an langhter. ZRA cu “Dalan” tiah an au hnawh cang.” ti’n The Chin Post nih cun a langhter.
A Dang Reltthan: Ralkap nih rampi nawlngeihnak an laak hnuah KNU le ralkap ikahdohnak ah a linsa ngaimi hmun cu Karen ramkulh Phapun peng hi a si. Cu ti a si ruangah KNU nih cun Phapun Ka-ma-maung lampi cu ralkap pawl ei le din thiar kho lo dingin caan saupi an rak phih.
Cu ruangah ei in lei ah ralkap pawl cu harsa ngai in um a si tikah Thailand cozah sinah kut an dawh i a thli te cun ei le din ding fangfaak le thil dangdang hna cu Thailand in laak tawn a si. Thailand cozah hi KNU le ralhrang caah hin zeibantuk lungput dah an ngeih ti ruah awk a har ngai, kaphnih in a cawlcaang tawnmi a si.
KNU nih an rak phih pengmi Phapun lampi cu June 19 khan on hram an thok cu a si, ralkap pawl nih cun an thluak an hman colh ve i ralkap mawtaw si loin mipi mawtaw tu hmangin an ei din ding cu an phurh ttheu tawn, KNU nih cubantuk thawng an theih le cangka lampi cu an bawh i mipi mawtaw in ralkap ei din fangfaak a phurmi mawtaw cu an tlaih colh ve.
An tlaihmi fangfaak tam ngai cu an mah lila zong nih ralzaam caah an herh ngaingai mi a si ve nain, ralkap nih kan fangfaak an kan fir piak timi minchiatnak kha duh loin lam sirah cun an khangh dih, KNU nih fangfaak an khangh cu mipi ruahning a ttha lo ngaingai i ei din ding fangfaak te hna cu an mah ei din dingah i laak hna sehlaw tiah a titu zong an tam.
Asinain, ralzaam hrangah faangfak a rak khangtu rallokap tihraamnak caah a si ko lai ti’n tthenkhat nih cun KNU dirpi mi zong an tam pi. Credit: Vapualauaw
