Related Articles
Minkin Ah PDF 57 An Hlen Hna I An Tlaih Hna Nizan July 28 ah Sagaing ramthen Minkin peng Panset Tongphyu lei ah hriamtlaibu pakhat nih chawnhbiaknak ngei dingah hriamnam put lo in kan i tong hna lai tiin an hlen hna i, Mikin PDF 57 an kan tlaih tiin Mikin PDF rianngeitu pakhat nih BBC ah a chim.
Nizan zinglei ah PDF le ralhrangbu hna hmun 2 ah an i kap.Khua pakhat cu Minkin PDF hna nih an kulh dih cang. Khatalei nih hriamnam tel loin i chawn dingin an rak sawm hna. Mah cu an in zumh sual i, a kal mi hna cu an tlaih dih hna ralhrangbu meithal a tlai mi dalaan pawl nih an tlaih hna.
An tlaih dih in Minkin ah a um mi rallokap hna cu an va auh hna i set-lawng in an rak tlaih.An zumh lo caah a kal ve duh lo mi 12 belte cu an luat tiah DVB nih a chim. Khatalei ah Minkin peng Panset ah Minkin PDF le ralhrangbu kar i kahnak a chuak i, rallokap 1 a thi, 3 hma an pu tiah Minkin PDF hruaitu pakhat nih a chim.
An tlaih mi hna kong he pehtlaih i an thawngpang zeihmanh theih khawh a si lo caah an chungle hna an thin a phan ngai. Thil sining cu bbc nih ralhrangbu rianngeitu hna sin ah kan hal nain zeihmanh a kan let lo tiah BBC nih a langhter. Credit: The Chin Post
A Dang REltthan: Ralkap nih rampi huapin buainak a ngei lio mi tthenkhat an ngaihthiam mi thongtla 4000 renglo cu July 21 in an thlah zalen hna i thongtla an chuahmi hna dihlak ah 4297 an si timi kongkau cu an rak tarlangh.
Mon ramkulh ah cun ralkap nih buainak ngeimi an ngaihthiam hnuah thonginn in an chuah zalenmi 300 an um i July 22 in July 27 tiang chuah zalen an si. Irrawady ramtthen Pathein khuapi zongah thongtla 187 cu July 27 ah thonginn in chuah zalen an si. Tubantukin Myanmar ram chung hmun kipah thongtla pawl chuah zalen caamcin an si hna.
Myanmar ralkap nih July 20 ah ram chung hmun kipah thongtla tampi an chuah zalen hna lai timi kong an rak chuah. Mah cucu nawlngeihnak an laak hlan ah buainak ngeimi tthenkhat an rak ngaihthiam cang mi hna an si. An ngaihthiam mi pawl hna cu mifir, ram kongah a buaimi, lawngkasa, rithaisii, hriamnam, taksa aa zuarmi,a thli tein thil a tuahmi tibantuk deuh lawngte an si hna.
Pathein myone zung nih cun “ram chung thongtla tthenkhat pawl chuah zalen an si timi cu biadik/ahman mi a si i Pathein zongah a chuakmi tampi an um. Thonginn in chuah zalen an si hlanah anmah puaipitu sihni pawl Court ah kawh an si i an chuah hlanah an buaimi pawl cu felfai tein tuah ta a si. Cu hnu lawngah thlah zalen an si hna” tiah a chim.
Ralkap nih cun an chuah pah hna ah hibantuk in buainak a ngeihmi tthenkhat an ngaihthiam mi hna cu tulio ram chung i a karh taktakmi Covid-19 zawtnak dohnak hrang le Covid-19 zawtnak ruangah Court ah kal khawh a si lo i an buainak pawl cu caan saupi a rauh ding an zaangfah hna ruangah a si timi kong zong an rak tarlangh chih.
