Related Articles
Chin ramkulh Paletwa peng, Bangladesh ramri, Pichaung auhsuh i um mi khua 30 hna cu AA ruangah an buai ngaingai i kan hnung thla ah khan AA nih raldoh ah hriamnam tlai dingin khua khat minung 3 an rak hal hna. Khua mipi nih an el hna tikah nan khua kan khangh lai a si loah khua nan chuahtaak lai tibantuk in an hrocer hna.
Khuami pakhat nih cun “kan hnung ah AA pawl cu kan khua ah an rak phan hna i ULA timi ralkap bur din dingin minung an rak kawl hi a si. Cutikah kannih nih kan khua cu minung kan tlawm tuk tiah kan rak el hna nain, minung nan thawh sian lo a si ahcun khua in chuak uh, hika cu Chin ram a si lo i Rakhine ram chung a si tiah an kan ti. Cutin, khua chungin minung 2 cu an duh lo tuk buin an hruai hna.” tiah a chim.
Khua dangin mi pakhat nih cun “Kannih khua in minung 3 cu kan hnungah an hruai cang hna. Khua pakhat nih minung 3 cio AA ralkap dingah nan thawh a herh tiah an duh lo bu zongah hramhram in an hruai hna. Nan duh lo a si ahcun nan khua kan in khangh piak dih hn alai, kan in hrawhpiak dih hna lai tiah an hrocer hna.” tiah a chim ve.
Rakhine ralkap AA pawl hi 2019 kum in Chin ramkulh Paletwa peng picuang auhsuh ah um an rak i thok i Paletwa peng chung hmun tam ngai cu laak an timh cuahmah tiah khua mipi pawl nih cun CW ah an chim hi a si. Ref: Vapualauaw
A Dang Reltthan: Ram 7 Nih Biatung An Chuahpimi Cu An Sungh Caah UNHRC Meeting Ah Myanmar Buainak An Ceih Than Lai, SAC Cu Sawm An Si Ve Lo.
A voi 47 nak Uniter Nations Human Rights Council (UNHRC) meeting pi ah ralhrangbu (SAC) cu kainak nawl an pek hna lo caah SAC dirkamhtu ram cheukhat nih Myanmar buainak kong ceih lo dingin biatung an chuahpi. Asinain ram tam deuh nih ceih dingin an lungtlin caah UNHRC meeting ah Myanmar buainak kong an ceih than lai tiah theih a si.
UN tangah a ummi bu WHO, WFP le ILO hna nih SAC thlahmi palai cu chungtel ah an cohlang lo. Atu UNHRC zong nih a cohlang lo. Tukum September thla ah UN chungtel cohlannak ceihkhangtu Credential Committee nih ahote hi dah chungtel ah kan cohlan hna lai ti an khiah te lai.
UNHRC ahhin chungtel ram 47 an um. Hi chungah ram 26 nih Myanmar buainak kong ceih an duh, ram 7 nih an duh lo, ram 14 cu karlak ah an um. Chungtel ram tam deuh nih an duh caah UN nih Myanmar nuhrin covo hlathlainak tuanvo a pekmi Mr. Tom Andrew le Ms. Micelle Bachelet nih an chuahpimi cathluan an rel lai i cu cungah i hngat in an ceih lai.
UNHRC ah Myanmar buainak kong ceih a duh lomi ram hna cu China, Russia le Cuba hna an i tel i ceih a duhmi ram 26 chungah ASEAN in Indonesia le Philipine an i tel. Credit: The Chin Post
