Related Articles
Yangon i Daw Thet Thet Khaing Sui Dawr Bomb an Puah Hnawh SAC kut tang ah vuanci rian a ttuanmi PPP party chairman Daw Thet Thet Khaing nih a ngeihmi Yangon khua i sui dawr (ရွှေနန်းတော် စိန်ရွှေရတနာ) cu nihin ah bomb in puah hnawh a tong.
Bomb puahnak ah nu pakhat hliamhma a pu i a dang a thimi le aa khawngmi an um lo. June 17 zong ah khan Daw Thet Thet Khiang nih a ngeihmi Condo innkhaan pakhat bomb in puah hnawh a rak tong cang. Daw Thet Thet Khaing cu NLD in a chuah hnu ah People’s Pioneer Party (PPP) timi a dirh i 2020 thimnak ah an i cuh ve.
Asinain, tthudan pakhat hmanh an hmu lo. SAC nih NLD sin in uknak a chuh hnu ah Daw Thet Thet Khaing cu Ministry of Social Welfare, Relief and Resettlement ah vuanci rian an pek. The Chin Journal
A Dang Reltthan: June 28 in July 2, 2021 ah tuahmi NCCYF le CNN mino Civui pi ah kan pa pakhat a si mi le NUG cozah zongah hruaitu dirhmun ah an kan dir piaktu Dr Lian Hmung Sakhong nih bia a chim mi chungin kan ttial khawh tawk le zeitindah federal army kan ser khawh lai tibantuk siseh NUG le CNF karlak hnatlaknak tuahmi hna zong a chim chih.
A chim mi cu “Tlangcung hriamtlai pawl direct in PDF ah lut dih uh an ti cucu direct in tlangcung hriamtlai pawl PDF ah an luh a si ahcun mah cucu Min Aung Hlaing kuttang i tlangcungmi ralkap va tlak he khin aa lo, ti khan cun Federal army a chuak kho lai lo.
Cu caah federal army a chuah khawhnak ding ahcun kan mah tlangcung mi hna nih kan mah le kan ram cio ah kan ram humhimnak caah ttawan kan laak lai. Kan ram kan zohkhenh lai, timi kha pakhatnak ah kan i tlaih ahau. Pahnihnak ah Kawl pawl ralkap(PDF) le tlangcung hriamtlai ifonh hnu lawngah federal army cu a chuak lai mah cucu kan i fiang tawn lo i tlangcung hriamtlai hna nih an hngahmi zong a si.
Sinain, kan nih CNF nih kan hngak maw, kan hngak lo. Zeiruangah kan hngah lo tiah cun a thei lo mi hna kha kan chimh hna lai i kan mah nih policy kan hruai lai kan ti. Cu caah NUG le CNF kha hnatlaknak(agreement) kan ngei cang.
Kha hnatlaknak kan ngeihmi kha mipi sinah kan phuang duh bal lo, a zapi te cun ka phuang lai lo nain a herhmi pakhat te ka van chim lai. Kha chungah khan bia pahnih aa tel pakhatnak ah Thein Sain cozah ah kan lung a rak tling cia mi Chinland cungah hriamtlai CNF le ralkap cozah lawng a um lai timi kan hna a rak tla. Asinain NUG sin ahcun Chin ram chungah CNF a um timi kha an hna kan tlak pi. Cun Chin ram chung a humhimtu, a zohkhenhtu dingah CNF nih ttawan kan laak kan ti.
Mah kha an lungtling i minthutmi ah aa tel. Midang tlangcung hriamtlai zong nih zeitindah federal army kan ngah khawh lai timi zong an hngalh an theih asinain Kawl pawl nih rak kan sawm hmasa hna seh timi an hngak, mah cucu kan nih CNF nih kan hngak lo.
Kan mah nih kan duhmi kha kan tuahter hna, kan duhmi an tuah ahcun kan i fonh hna lai i kan duhmi an tuah lo ahcun kan kal taak hna lai. Kan duhmi kha kan tuahter hna i an lungtling cu caah kei zong hruaitu dirhmun ka laaknak a si.” tiah a chim.
Note: Hi Civui tuahnak ah biaroling a chim mi tampi a um, hmanhsehlaw a dihlak in kan rak langhter lo i a chim mi chungin tlawmpal kan sikhawh tawkin kan rak ttialmi a si, cu caah mipi lei zong nih palhnak tampi a um mi chungin nan kan theihthiamnak lai kan in nawl hna. Youtube zongah hi a chim mi Video cu zohkhawh a si ko men lai dah. Lawmhnak tampi he.
