Related Articles
Khamti Palek Sakhan Ah Covid-19 Mizaw 140 Leng An Hmuh Nihin July 27 ah Sagaing ramthen chaklei Khamti Khanti palek thonginn ah thongtla pakhat cu a damlo caah sii-inn ah kalpi a si hnu ah covid-19 zawtnak in a nunnak a liam.
Thonhtla sin in covid-19 zawtnak an hmuh caah palek le thongtla hna cu zawtnak chek an si tikah palek 40 le thongtla 101 sin in zawtnak an hmuh hi a si. Ralhrangbu nih covid-19 zohkhenhnak le dohnak ah rian a tei lo caah ramchungah a thi mi tampi an um cang.Thonginn zongah covid zawtnak a karh ngai cang tiah theih a si.
ICRC nih ralhrangbu cu thongtla hna an ngandamnak tha tein zohfel ding le zohkhenhnak thapek dingin a nawl nain ralhrangbu nih a tutiang a pom piak lo tiah theih a si. Credit: The Chin Post
A Dang Reltthan: Ralhrangbu Chungtel Covid Zohkhenhnak ah Thleidannak An Ngei Kawlram chung Covid-19 third wave ruangah a thi mi le zawtnak biatak tein a karh caah ralhrangbu chungah tampi a karh i, a thi mi zong an tam nain ralhrangbu nih mipi theih lo in a thuh tiah The Irrawaddy nih a tial.
Ralhrangbu nih covid zawtnak cu a doh khawh lo hlei ah covid zawtnak a ngei mi ralhrangbu rank hniam deuh hna le an chungkhar hna cu sii inn ah zohkhenh lo in barrack le an laikhan hna ah chiah an si i, a zual deuh mi hna lawng sii inn ah chiah an si caah thleidannak in zohkhenh kan si tiin tat-ta cheukhat nih an chim.
Rallokap pakhat nih bu chungah zawtnak a tamtuk cang.Zawtnak ka ngei ve lo nain ka chungle sin ah ka kal lo nak zarh 3 leng a si cang.An caah a tha lo.Kan dirhmun hi a har ngai cang.Tuan duhnak lungthin zong ka ngei ti lo tiah a chim.
Ralhrangbu chung zawtnak a ngei mi hi a tanglei riantuan pawl lawng si lo in Deputy home minister le Palik bawizik duh-bo-chok-kyi Tan Hlaing le a nupi, Adjutant General duh-bo-chok-kyi Myo Zaw Thein nupi le fa le Taing-hmu cheukhat cu sii-inn ah zohkhenh lio an si tiah theih a si.
Kan hnu July 20 ah Pyi varal ah a ummi No. 3 hriamnam sernak sehzung riantuan 300 leng cu zawtnak an ngeih ruangah 9 cu an thi nain mi 2 lawng a thi mi cazin ah khumh a si tiin theih a si. Covid-19 zawtnak in a thi mi Bo-hmu pensen U Myint Oo nih “Ralkap sii-inn 1/1000 ka chawnh nain chawng an har ngai. An ka hro len, July 19 ah swap sample an ka lak lio zong ah an ka hro chih” tiin a thi hlan ah FB ah a tial.
Karen ramkulh ralhrangbu sii inn ah covid-19 zawtnak in sii-inn a kai mi Palik bawi nupi pakhat zong sii-inn nih zohkhenhnak an pek duh lo caah a rak thi bal cang. Mandalay ralhrangbu sii-inn pakhat ahcun Oxygen an i daih lo ruangah ralhrangbu chungkhar hna cu ni fatin mi 10 renglo an thi peng ko tiin bo-kyi pakhat chimh mi cu Myanmar Now nih July 26 ah a tial.
Hi kong he pehtlaih in CDM a lut mi bo-kyi Ngi Tuh Ta nih “ralhrangbu hruaitu hna nih hin mipi le ram an dawt lo lawng a si lo.Anmah duhduh in an fial mi ralkap hna cung zong ah dawtnak an ngei lo.Atu cu a tanglei riantuan hna zong nih an lung a piang thluahmah ve cang.Rahalhrangbu sualnak hi mipi lawng si lo in a tanglei ralkap hna zong nih an tuar mi a si” tiah a chim. Credit: The Chin Post
