Related Articles
Sagaing ramtthen Yinmarin District Kani myone mipi humhimtu PDF nih cun ralkap hi voi 30 an kahdoh cang hna i an mah mipi humhimtu lei in minung 27 nih an nunnak an pek timi thawng cu nihin July 1 ah cathanh an chuah.
Kani mipi humhimtu PDF nih cun “Tutan ram buai caan ah ralkap pawl hi April thla thok in Kani myone ah an rak luh hi a si. April 4 le June 6 ah ralkap pawl cu Kani khuapi veng 3 le khua 51 ah an lut i sui, tangka, bike le thildang phunphun pinah zuatmi satil tiang an laak piak hna i mipi ngeihchiah hna cu an hrawh piak dih hna. Cu zong ahcun dai tein a um ko mi mipi 42 cu kut an thlak hna i an hrem hna i minung 39 an tlaihmi hna lakah minung 4 cu an rak thah beh hna. Cubantuk a si ruangah Kani myone chingin mipi thong 50 cu khua an chuahtaak i ramtang ah an zaam hna kum 9 ngakchia pa pakhat zong ramlakah kiktlaih nak in a nunnak a liam beh.
“Ralkap pawl hi Democracy uknak a duhmi dihlak ttangrualnak in kan ngeihchun hriamnam dihlak hmangin mah le mah humhimnak caah kan doh ve hna. Kani myone chungah ralkap he voi 30 tluk kan i do cang i, kanmah mipi humhimtu PDF lei in minung 27 nih ram le miphun caah an nunnak an pek. Ralkap nih duh paoh in mipi dehcawh le an ngeihmi thilri duh paoh in laak piak an si mi cu NUG cozah cachuahnak bantukin mah le mah humhimnak caah Democracy kan ngah hlan tiang kan doh peng hna lai tiah theihternak kan tuah.
“Tu zong ikahdohnak hi a zual chinchin lai i a hramthok zong a si i mipi lei zong ei le din ah siseh a herhmi zeizong teah i tawlrel dingin kan himnak caah timhcia tein nan um cio nak lai kan theihter duh fawn hna. Khua kip le veng kip ah biathli phuangtu(Dalaan) an chiah dih hna i, ralkap siseh an ttuanpi Pyu Saw Htee hna i an cawlcangh ning cu kan palai pawl sinah thawngthangh peng dingin kan in sawm hna.
Mipi humhimtu lei an himnak caah fuh le panh nan si ahcun rak fimtawl hna dingin kan in sawm fawn hna. Hriamnam rinhngelhmi le a puak kho ding thil nan hmuh a si ahcun PDF lei thanh khawh i zuam ulaw, ralkap uknak cu kan sikhawh tawk cio in dohkalh i tel dingah kan in sawm hna” tiah an langhter. Vapualauaw
