Related Articles
Myanmar ralkap nih rampi nawlngeihnak a laakmi cu thla 5 a tling cang i thla 6 nak chung a luh cuahmah lio a si i Myanmar ram cu thla 5 chung a buai cang. A min in ralkap nih cozah an ttuan ko nain, an nawlngeihnak cu ram chungah an hmang thlu kho lo i, mipi he dohkalhnak a tam ngaingai.
Cubantuk cu mipi chung zongin ramdang lei hnabeiseinak a um rih cuahmah ko i, UN nih Myanmar ram aiawh in ralkap cozah maw, NUG cozah dah a pom lai, si loah mizeihmanh pom lo in a zoh peng rih ko lai maw tibantuk zong an tam. Hi ti dirhmun ah Min Aung Hlaing nih cun mipi nih ramdang hnabeiseinak tampi ngei ko hna hmanhsehlaw zeihmanh aa thleng hlei lai lo tiah Russia thawngthanhnak RIA ah a chim.
Min Aung Hlaing nih cun “Lamzawh in duhlonak langhter mi mipi nih cun Myanmar buainak hi a zual chinchin lai. Mahcu buainak a zual deuhdeuh a si ahcun ralkap lei zong an sual deuhdeuh lai i an cawlcanghnak a rapthlak deuhdeuh ve lai. Cuti dirhmun ahcun ramdang an rak lut lai tiah lamzawh mi pawl nih ruahchannak sangtuk an ngei. Asinain ka chim duh bikmi cu cubantuk thil cu a cang kho lai lo timi hi a si” tiah a chim.
A Dang Reltthan: Zeiruangah dah hitluk lawmmam in Russia le China nih Myanmar ralkap hi an dirpi, an ttuanpi i an ven peng timi kongah vawlei cung Janes Defence thiamsang hawikawmhnak i lubik a si mi Jon Grevatt cu bia hal a si i a tanglei bantukin a chim.
Jon Grevatt nih cun “Russia le Myanmar ralkap pehtlaihnak cu caan saupi a rak si cang. Zeicatiah, Myanmar cu Asia le South East Asia karlak i a ummi ram a si. China le India ramri a si bangin ramchung ah thilttha phunphun a um. A hleice in Gas chuak a ttha tuk. Cu pinah Russia i aa timhbikmi cu US nih ASIA ah ram a laak tukmi cu US teinak caah Russia nih Myanmar lei ttang dingah a duh tuk. Myanmar he an ipehtlaihnak ah ASIA siseh South East ASIA zongah tinco ding tampi an ngei phah lai tiah ruahchannak an ngei ngai.
“Chawlehnak dirhmun zongin Myanmar cu Russia ram in kum tampi chung ralthuam an zuarnak hmun a si. Cu pinah mipi tampi nih theih lemlomi cu Russia nih Myanmar ram chungah Gas cawk khawhnak a ngei ve. Curuangah Myanmar cu Russia caah a biapi ngaingai. US i dirpimi ram le Democracy ram si ding i a zuampimi ram hrimhrim cu Russia nih zeitikhmanhah a lungtling bal lai lo. Myanmar nih Democracy a ngah a si ahcun US he an ipehtlaihnak a ttha lai. Cucu Russia nih a duh bak lomi a si. US dohkalh in ASIA ah China he huham ngeih a duhmi an si. Russia le China nih ASIA ah an rorel nak a felfai ko a si ahcun ASIA ahhin US huham pi hi a tla lai. Cubantuk pawl cu Russia ram caah Myanmar ram hi a biapit tuknak cu a si.
“Myanmar cu China tang i ASIA ah Russia sinah hriamnam caw tambik pahnihnak an si. Myanmar i hriamnam ngeihmi 100 chungah 30 hi cu Russia sinah an cawkmi pawl an si i 50% hi cu hmun neihniam China sinah an cawkmi pawl an si. Sullam cu China nih Russia sinah a rak cawk ve tikah Myanmar i hriamnam cawkmi tam deuh cu Russia siam deuhmi an si hna. Ramdang sinah cawkmi zong tlawmpal cu an ngei ve ko. Asinain, nawlngeihnak an laak hnu ahcun ramdang nih hriamnam an zuarh duh ti hna lo i, Russia le China lawng hi an hriamnam cawknak cu a si cang.
“Cucu Myanmar ralkap caah buainak pakhat a um kho ve. Zeicatiah ram pakhat pahnih lawng sinah hriamnam cawk peng cu an duh ve lo i ram tampi sinah chimfian an duh. Cubantuk cu a tu ah a cang fawn lo, an buai ngaingai ve lai. US le Euro ram tam deuh nih cun Myanmar cu Russia le China kuttang i a tlak ding cu an duh lo tuk ve. Zeicatiah Myanmar cu ASIA ram lakah vawleipi caah a biapi ngaingai ve mi ram pakhat a si. US nih Myanmar hi Democracy ngahter in an mah he dirhmun ttha taktak si dingah an duh ngai nain, cubantuk cu a har ngai lai caah Russia dirhmun a ttha rih.
“Tu ah US le Euro ram tthenkhat nih Myanmar ralkap an hrem mi hna hi ttha tein kan zoh a si ahcun US le Euro ram tthenkhat caah sunghnak faak ngai a si kho ve i China le Russia caah hlawknak taktak a rak si ve fawn. Zeicatiah Myanmar ralkap nih China le Russia lawng hi an panh hna lai i an dirhmun a fek chinchin ding khi a si. Myanmar ralkap nih hriamnam cawknak ding phaisa aa daih lo a si zongah Russia le China nih cun Myanamr ram chung i a chuakmi phunphun in hnatlakpi nak an tuahpi te ko hna lai.
“Cu pinah China le Russia zong an thluak a rak ttha tuk ve, Myanmar ralkap cu phurrit an pe duh hna lo i ram chung an uknak ah phung le an kalpi ningah cuticun, kha tin nan kal lai, nan tuah lai tibantukin an forh ve hna lo, nawl an ngeih pi hna lo. Karlak remnak le hlawknak ding lawng hi a biapi ah an chiahmi cu a si. Cutikah Myanmar ralkap ca zongah buainak zeimaw a um lem lo i an ipehtlaihnak hna a fek tuk phahnak hi a si.” tiah BBC ahcun a chim.
