Related Articles
Kan Unau a simi Mizoram zong Assam nih ramri an nor/nawr lengmang hna ruangah an buainak a linsa ngaingai i a herh ahcun meithal zong kan puah lai i kahdohnak zong chuah ter ding a si ko cang tiah Minister Lalchamliana nih cun nihhin July 12 ah Media pawl kawmhnak ah a chim.
Mizoram Home Minister Pu Lalchamliana nih cun ” Meithal hmehpuah i kahdohnak a chuah hi ka duhmi thil a si loh. A sikhawh ahcun hmurkaa tein remdaihnak ituah kho sehlaw kan duh bikmi a si ko. Asinain, cubantuk a sikhawh lo i a herh a si ahcun kan kah cang ko hna lai.
Ramri buainak ah tthenkhat politics le buu dang pawl mintthatnak duh ah an rak cawlcangh mi le an biachim te hna hi thil ttha lo taktak an si. Cu nak cun lungrual tak in kan tawlrel tti cio a si ahcun kan hlawhtling ko lai. Cu caah July 14 ah Party Politics hruaitu le buu dangdang hna he ti’n hruaitu vialte itonnak meeting kan ngei lai. Cu tik meeting i kan biachah ning in hmai kan kal thluahmah lai” tiah a chim.
Assam lei nih cun Mizoram ramchung lut in Kuva(kunya) le thlai an cinmi tthenkhat hna cu an hrawh piak hna, cu ahcun Mizoram leiin a rak khamtu hna Vairengte nutung le ngakchia tthenkhat zong faak ngaiin Assam lei nih tlu lakin an rak nam hna.
Hi ti a si tikah mipi tthenkhat nih cun Mizoram cozah cu an mawhchiat ngai hna i a rankhawh chungin cawlcangh i a herh a si ahcun kahdohnak zong phuang ko uh tiah mipi lei nih cun an rak nor/nawr chih ve hna. Ref: Vapualauaw
A Dang Reltthan: Kayah ramtthen Demawso myone Sanpia 6 khua inn pakhat i an ekinn pawng khur chungah chungkua i thahmi ruak cu an char hna tiah PKDF nih nihin July 12 ah ca a chuah.
Sanpia khua inn 3-27 hrawng a si mi ah ralkap pawl nih umhmun an rak khuar bal cang i ralkap pawl umnak pawngkam ahcun rim chia tukmi an theih i an va zohfel tikah mithi tam ngai ruak cu khur chungah an tom hna i rak chiah an si. Mithi ruak pawl cu zohfel an tikah kan hnung buai lio caan i chungkhar in thah a tong mi an si ko tiah PKPF nih cun cathanhnak an chuah.
PKPF nih cun ” Ruak an chiahmi aa rawk dih cangmi kan hmuh mi cu chungkhar i thah a tongmi an si ko lai. Kan zohfel tikah an lu tan piak an si i khur pakaht ahcun an khon/chiah hna. Ruak pawl cu kanmah PKPF nih felfai tein vuinak kan ngeih piak cang hna” tiah an chim.
Kan hnung i Kayah ramtthen linsa ngai in a buai lio caan ah mipi tam ngaite cu ramlak ah an zaam hna i ramlak ah zaam loin khua chung i um mi pawl lak in minung 82 ruak cu khua an kir hnuah char an si. Kahdohnak daih/ngol a si tiah an phuan hnuah mipi cu khua ah kir tthan an si i, nihin tiangah mithi ruak an hmuh rih hi a si.
