Related Articles
Tu lio Kawlram boruak cu zoh tikah ral pahnih kan ngei mah cucu Kawl Ralkap le Covid-19 hi a si. Kawlram mipi caah cun tu lio hi khua ci a muih siling lio te a si i lungrethei le vansangau in an um cuahmah lio caan a si.
Nifatin tein a thi mi an um i, Chin miphun chung zongin mithi ngeih lengmang a si ve. Cutikah Kawlram zong biatak tein kan i ralrin a herh i kan i zohkhenh a herh ngaingai. Nihin zong Kalay ah mi thi minung 20 an um tiah theih a si tthan.
Kalay myo chung lawng bakah hin a thi mi milu zat hi 400 deng an phan cang. Cu chungah Lai(Chin) miphun tam lak kan i tel hna i pinah Rev tibantuk le bochan deuhmi tibantuk zong a thi mi an tlawm ti lo. Cu caah a ramkip in Chin miphun hna nih thlacamnak ah kan hrelh lo hna a ttha.
Ti hin The Chin Post nih cun a langhter “Nihin Kalaymyo ah minung 20 an nunnak a liam. Khrihfa thlanhmun ah minung 9 vui an si i,cu chungah RC Father pakhat le Sister pakhat an i tel. July 1 minung 26,July 2 minung 23, July 3 minung 33, July 4 minung 27, July 5 minung 27, July 6 minung 42, July 7 minung 29, July 8 minung 22, July 9 minung 25, July 10 minung 33, July 11 minung 24, July 12 minung 13, July 13 minung 13, July 14 minung 28, July 15 minung 20. Nunnak liammi an dihlak 379” ti’ an rak langhter ning cu a si.
A Dang Reltthan:A Dang Reltthan: 𝗧𝘂𝗹𝗶𝗼 𝗮𝗵𝗵𝗶𝗻 𝗮𝗵𝗼𝗱𝗮𝗵 𝗮 𝘁𝗵𝗶𝗹 𝗿𝗶𝘁𝗯𝗶𝗸 𝗵𝗻𝗴𝗮? 𝗔𝗵𝗼𝗱𝗮𝗵 𝗮 𝗿𝗲 𝘁𝗵𝗲𝗶𝗯𝗶𝗸 𝗵𝗻𝗴𝗮? Uknak ṭha lo ruang ruang ah tonmi tlaihkhih le thahnawn a tongmi hna maw, Kuvid mizaw le an chungle dah? Kan sining hoih cio in ai dang lengluang hna lai. Asinain an tahchunh Nau-ngan fah bantuk in kan miphun nih fahnak le harnak kan ton cuahmah lio a si.
Mah caan ahhin zeitindah kan i hnemh hna lai, cun zeitindah thazaang kan i pek hna lai le kan i bawmh la? Kut a samh khomi hna nan bansau chin ko seh, law thluachuah tu dong camcin ko uh. Zumtu kan si bantuk in mi a bawm peng khomi ah Pathian nih thlua in chuah chinchin ko hna seh ti hi kan thlacamnak a si.
Cuti a si ne ah, santlai lo mihar le neihchiah a nei be lomi hna, khua chuahtak nakding zong a nei lomi hna le paracetamol te hmanh ai cawk kho ve lomi hna teh zeitindah an si ne la? Oxygin cawknak a nei ko nain cawk ding a um lo tikah teh, zeitin a si ne la? Nu le pa, u le nau hna chawnbia manh lo in an liam tikah teh?
Kan tonmi ai dang cio hna la. Sihmanhsehlaw, ka ngakchiat lio i a rak lar tukmi atu ah cun an chim ka theih tuk ti lo nain zeitik hmanh ah ai thleng lomi Jesuh biate hin thazaang lak ṭhan hna u sih; «Rethei le thilrit mi vialte hna, ka sinah ra tuah u, dinhnak kan pek hna lai.»
(Matthai 11:28) Mah bia hi biaknak dang pathian hna nih cun an chim ka thei ballo. Ca ka rel khawh hnu, vawleicung IT ṭhancho lio ah a ṭhanglianmi ka si le hi bia cu Jesuh lawng nih a chim ka theih. Bawipa cung ah lawm lo in ka um kho lo. Cucaah ka lungthin re a theih caan le ka tonmi thil a rih tuk tikah Bawipa cu ka fuh le ka thilrit kha a chawn hrimhrim ko ti hi tehte khan ding tampi ka nei.
Bawipa kan fuh a si ahcun kan thilrit a kan chawn lawng si loin duhdim nun a kan pek. A um lomi kha a umter. Abraham nih «Bawipa nih a khan ko.» a ti le cu a fapa Pathian sin pek ding ah a timhnak tlang cu nihin tiang, «Bawipa tlang ah cun Bawipa nih khan ko, an ti tawn.»
(Gen. 22). Pathian nih hin zeibantuk dirhmun kan phanh hmanh ah Ka sin ah ra hna seh ti a duh. Cun kan sining le dirhmun a theih ko nain a sin i thlacam le Amah fuhpanh kha a hngak peng ko. Kanmah nih Amah kan hngahmi nakin Amah tu nih zeitik ahdah ka fale hi lungtak le thinlung dihlak in ka sin an fuh lai le ka khamh hna lai, ka bawmh hna lai le ka hlawm hna lai ti kha a hngak (ka rak ṭial cang kha sau nawn in cabia pakhat ah).
Ihkhun cung ah maw, ihkhun pawng ah maw, ramtang in maw, ram dangdang in maw, atu ahhin na retheihnak le na thilrit vialte cu Bawipa Jesuh chim law lungdaihnak le hnangamnak an pek la, na thilrit vialte an chawn la timi hi Jesuh bia a si. Harnak le lungretheihnak kan ton lio ah Pathian fa ka si ti philh loin Bawipa duhnak kha kawl ahcun khuaruahhar thil kan hmuh tawn. Daihnak nan cung um cio ko seh. Jesuh min in thilrit kan i chawng. Pathian thangṭhat si ko seh. Si Bawimang Lian
