Related Articles
UFC 264 ah voihnih a rak i thawng cangmi Conor le Poirer cu July 11 ah an voithumnak an i thawngh cu a si. Round 1 a dih lai te ah Conor cu a ke kiah caah referee nih puai a dih ter i Dustin Poirer nih teinak a hmuh.
Round 1 nak an vun thok le cangka Conor nih cun a ke in a vun zuanhnawh colh i, a kehlei ke in voihnih thum hrawng Poirer phei ahcun a chuih. Poirer hi tengh le thongh a thiam ngaimi a si ve caah Dustin nih cun a vun tengh i cuticun Poirer nih cunglei in a kiu he a kuttum he cun a tthuat chih i Conor zong nih tanglei in a si khawhtawk in a rak lamh chih ve.
Round 1 dih lai hrawngah Conor cu a hung dir kho i, caan dih lai second 5 hrawng aa duh hrawngah Conor nih a zuanhnawhnak ah a kehlei ke cu kiak lakin amah le mah aa lamh sual i Conor zong cu a tthu/to colh ve, Poirer nih cun a vun nam len ko nain caan nih a dih tak hna.
Hmanhsehlaw Conor a ke cu Doctor te nih a vun zoh piak tikah aa thong kho ding phun si ti lo i, referee nih cun caan cu a dih ter i Dustin Poirer cu TKO in teinak a pek. Cu he pehpar in biahalnak ah Dustin nih cun a ka chuih ahhin a ke ah zeimaw cu a cang ko cu caah keimah hrim nih ka hliamhmi a si ko ti’n a chim. Hmanhsehlaw Conor nih cun duh ve naisai lo i an boruak a hung linsa dengmang.
Conor zong aa thong kho tthan te lai maw timi zong theihfian a si rih lo i zeitik tiang dah a rauh te hnga. Cun Conor hi boxer Mayweather he an i thongh hnu in voikhat te lawng UFC ah teinak a hmu kho voihnih Poirer nih a tei cang i tutan zong hi Conor ca ahcun idinh thai zong a fawi.
