Related Articles
Oxygen for Tahan Nih Bawmhnak Hal Mi Tahan A Phan Cang Kawlram um covid-19 zawtnak a tuar-ing lio mi Zofa hna caah Aizawl Theological College (ATC) Alumni nih “Oxygen for Tahan” tiin bawmhnak a khomh mi chungin a herhbau mi an cawk mi cu a voikhatnak caah Tahan a phan.
Oxygen for Tahan hi ATC Alumni nih Mizo Theological Association (MTA) le Victor Da Scavenger youtube channel bawmhnak in a tuah mi a si i, sing 10 leng an hmuh tiah theih a si. Bawmhnak hi tangka pin ah sii dawr pahnih MF Drug Centre, RTP building Tuikual veng le Jordan Drug Store, Upper bazar hna nih sii le thilri zeimawzat an thawh.
ATC Alumni nihhin Kawlram lei ah a ummi chungtel cheukhat hna he fonh in mi harsa le a herh taktak mi hna sin ah pek dingin Covid test kit, sii le PPE pawl an kuat hna.
A voikhatnak ah test kit le PPE hna kuat than timh a si i, Tahan pin ah Kabaw rawn ah a ummi zofa hna zong pek timh a si. Oxygen a herhmi mizaw hna ca zongah a herh ningin tawlrel dingah timh a si. Credit: The Chin Post
A Dang Reltthan: Nizaan zing, July 23 ah vawlei cung dihlak nih theih in Yangon Insein thonginn chungah duhlonak au khuan thawng thang piin a chuak i dothlennak ah teinak kan co hrimhrim lai timi pinah halmi dang an ngei.
Thonginn chungin duhlonak aukhuan thawng thang tukin a chuah cu ralkap tam taktak nih hriamnam i ken in thonginn an fuh colh i thonginn chungah an lut. Duhlonak ngei pawl cu ralthuam hmangin an daihter hna hnuah an hrem, an vuak, an velh hna i an hrem thahmi zong an um tiah thawngpang tampi a chuak.
Cu thawngpang kongah Myanmar ram chung i thongtla pawl buaipity pawlkomhnak ah lutlai a si mi U Tun Kyi nih cun “Insein thonginn chungah thongtla tthenkhat nih duhlonak an ngei i thil phun 3 in aukhuan nak an ngei. Mah hna cu kan thisen a dai sawhsawh lai lo timi an au, ram buainak ruangah thongtla pawl chuah zalen ding le thonginn chung i damlo pawl an phutawk tein zohkhenhnak pek ding tibantuk pawl a si.
“Thonginn chungah Covid-19 zawtnak a karh taktak i ttha tein zohkhenh an si lo timi cu thil um tuning zoh in aa thei tuk. NLD chungtel U Nyan Win cu Covid-19 zawtnak in a thi phah cang i sihni Kyaw Hu, Han Thar Myint le Min Twin Thit hna zong Covid-19 an ngei/kai cang hna. Cutlukin zohkhenh/tuamhlawm ttha an si lo ruangah an hal aukhuan nak a si. Cu ruangah thonginn ttuanvo ngeitu pawl cu thongtla pawl duhning bantukin tuah piak dingah kan hal i kan tawlrel lai tiah an ti.
“Asinain, zaanlei suimilam 5 hrawngah ralkap mawtaw 7 hrawng cu ralthuam kengin thonginn chungah an lut i duhlonak langhtermi hna an hrem, an velh hna i biahalnak zong an ngeih hna. Hriamnam hmangin an hrem hna tikah hliamtuar faak tuk in a tongmi an um i an thi phah lai tiah ruahmi minung 8 an um. Cu hna pawl cu felfai tein theih dingah kan i zuam cuahmah lio a si” tiah RFA thawngthanhnak ah a chim.
Tu i thawngpang a len ning bantuk a si ko ahcun ralkap i hremnak ruangah mithi 6 in 8 karlak an um tiah thawngpang a darh ngaingai i mah cucu felfai tein theih dingah thongtla buaipitu pawlkomhnak nih cun an i zuam cuahmah lio a si.
