Related Articles
Karen hriamnam tlai phu 4 hna cu an mah le mah kahdoh ti lo dingin tonbiaruahnak an rak ngei i idoh ti lo dingin hnatlaknak an ngei nain, July 17 ah pakhat le khat karlakah idohnak a um tthan tiah KNU lei nih thawng an chuah.
Karen hriamnam tlai phu 4 hna cu KNU, DKBA, KNLA-PC le BGF hna hi an si. An lakah hin BGF hi Karen hriamtlai ngei tambik an si i Kawl ralkap he zong remnak ngeimi le ralkap kuttangah ramri hriangkam i rianttuanmi an si. Cuti a si ruangah anmah duh ning paoh in an um kho lo i meeting an ngeih hnuah KNU lei a dohtu an si tthan.
Cu kongah KNU kuttang i um KNLA ralkap phu hruaitu pakhat ralbawi Saw Soe Myint nih cun “July 17, zaan suimilam 10 hrawngah BGF he kan i do hna. Kan idohnak a ruang bik cu BGF lei mawtaw 2 khat in kan um nak ah an rak kan fuh i an i hrocer. Cuti a si ruangah kan i dohnak hna a si. An mah lei nih rak kan ti buai hna hlah sehlaw kan nih lei nih cun kan va tibuai hna nak ding a sullam um lo. Kan nih cu kan pawngkap i an rak i hrocer a si ahcun kan um nak hmun humhim ding cu kan rian a si” tiah a chim.
BGF ralbawi Saw Tin Win nih cun “kan theih ning ahcun lamhla pi khin an va kah sawhsawh mi hna khi a si, kahdohnak linsa cu a si lo. Hi ti a si ruangah pakhat le pakhat i tonbiaruahnak kan ngei lengmang ve ko. Kan dihlak hin hriamnam tlai kan si ruangah buainak neuhneuh cu a um awk si ve ko. Cu ti a si ko zongah remnak a um khawhnak hnga kan tawlrel ding cu kan ttuanvo a si” tiah a chim ve.
A Dang Reltthan: Myanmar COVID-19 Kong ah UN Cawlcangh Hram a Thawk [WHO, European Commission le France cozah i bawm in an serchuahmi COVID-19 runvennak sii COVAX hi Myanmar rammi hna ca ah tlamtling in hmuh khawh ding in an i zuam].
Khulrang tuk in a karhmi Myanmar ramchung COVID-19 zawtnak dohnak rian ah Myanmar hrambunh UN Country Team pawl cawlcangh hram an thawk cang, tiah July 19 ah thawng an thanh. July 17 ah Myanmar ramchung ah COVID-19 zawtnak checkmi minung 15,000 dengmang lak ah minung 550 hrawng sin ah COVID-19 zawtnak hmuh a si i, aluancia zarh hnih nakin COVID-19 zawtnak a ngeimi 7% in an karh.
Cu lawng si loin December 2020 ah India ram ah ahmasa bik an rak hmuhmi COVID-19 (Delta Variant) zawtnak phun zong Myanmar ah hmuh a hun si ve. Myanmar ramchung peng 70 ah Stay at Home tuah a si i, July 17-25 tiang zung khar tiah SAC nih thawng a thanh ve. UN Country Team nih ahmasa bik ah aa zuammi cu Oxygen tlamtling in hmuh khawh nakding hi a si.
Oxygen tlamtling in hmuh khawh nakding ah UN Country Team nih ramchung le ramleng i zumhtlak Oxygen sehzung pawl pehtlaih aa zuam hna. WHO, UNICEF le a dangdang bu hna zong nih Myanmar ram ca ah COVID-19 runvennak si hmuh khawh ding in an i zuam cuahmah. Abikin, WHO, European Commission le France cozah i bawm in an serchuahmi COVID-19 runvennak sii COVAX hi Myanmar rammi hna ca ah tlamtling in hmuh khawh ding in an i zuam hna.
Tu kum 2021 chung ah Myanmar rammi milu zapi chung in 20% nih COVAX an i chun kho lai, tiah UN nih timhlamhnak a ngei. Atulio Myanmar ramchung ah COVID-19 testnak hi ni khat ah milu 12,000 in 15,000 karlak tiang lawng tuah khawh a si rih. Cucaah, test center a thar in ser a si nakhnga rian an ttuan cuahmah cang.
COVID-19 zawtnak nih Myanmar rammi ngandamnak le sipuazi fak tuk in a chuahchuah lai caah ningcang thar hmang in COVID-19 hi doh a hau, tiah UN Country Team nih an langhter. “Myanmar ramchung ngandamnak rianttuantu pawl zalong tein le nunhim tein rian an ttuan khawh nakhnga tawlrelpiak zong an herh,” tiah an langhter chap. The Chin Journal | July 20, 2021
