Related Articles
Mandalay Ah Mizaw Zohtu An Tlawm Caah Nikhat Ah Minung 50 Leng An Thi Mandalay Ah Covid Mizaw Zohkhenhtu An Tlawm Caah Nikhat Ah Minung 50 Nak Tlawmlo Covid In An Thi
Mandalay ah July 1 in 22 tiang Covid in thi mi hi minung 1000 leng an si tiah a thi mi cazin ning ah theih khawh a si.Cazin ning in zoh ahcun Mandalay ahhin Covid zawtnak ruangah nunnak liam mi hi nikhat ah zatuak in 50 an si tiah theih a si.
“Zatuak in cun nikhat ah minung 50/60 an si,July 20 le 21 ah khan 90 tiang hrawng a kai. Tukar hrawng cu a tuum deuh ko 40/50 hrawng an si kan ruahdamh ning ah “tiah mibawmchantu phu chung in rianngei pakhat nih a chim. Atu lio caan ah runvennak thilri kawl hi a har ngaingai,a hlei in harnak kan ton mi cu oxygen le oxygen dur a um lo caah hin harnak kan tong khun ko.
Atu kar hrawng hi Mandalay( တ.စ.က ) in runvennak thilri cheukhat hna le seh hmanh mi si bawmhnak pek an si tiah kan theih. Mandalay (တ-စ-က) Chiarman U Mawng Ko le reng sang pakhat si mi U Kyaw San hna cu Covid zawtnak an i chawnh caah sizung special room ah thlopbawl lio an si tiah anmah he naihniam mi chimnak in theih a si.
Atu lio ah Myanmar Economic Bank 1 le 3 in riantuan tu tamdeuh hna le sipin lei riantuan hna cu Covid zawtnak a chawnh mi an tam caah zung on than ding ah riantuan an tlawm kho tiah riantuan tu hna nih an chim. Credit: The Chin Post
A Dang Reltthan: SAC ralhrang kuttang i ngandamnak lei tlangbawi zung lei rianttuan tu hna nih ralhrang le an inn chungkhar cungah zeitindah Covid-19 zawtnak hi an tuar ve timi kongah zeihmanh tarlangh a si bal lo nain, a thli tein theih tthiamtthiam an si.
Ralhrang hmunpi Nay Pyi Taw, Mawlamyine, Mandalay le Pin Oo Lwin ah hin ralbawi chungkhar pawl le ralkap sawhsawh pawl zong oxygen hi i daih loin khua an sa cuahmah ve ko hna tiah theih a si. Mah kongkau chim lio ah hin Commander in Chief le Deputy Minister of home Affairs ttuan lio mi Lt-Gen Than Hlaing le a nupi Khin Thida Win zong Nay Pyi Taw i ralkap sizung ICU room ah thaizing kiptuh timi dirhmun ah an dir cuahmah lio an si.
Mon ramkulh i Mawlamyine ralkap hmunpi zong khar a si i a chungah um ralkap le an inn chungtual pawl zeitluk in dah Covid-19 zawtnak nih a phaak ve hna lai ti cu theih khawh tuk a si. An lutlai General Ko Ko Maung le a nupi zong Covid-19 zawtnak tuar in an khua an sa cuahmah ve.
Hi ralbawi nupi nih hin sizung um pawl bawmhnak phaisa a va pek hna hnu caan rau lo teah amah zong khuasik in a va check tik ahcun Covid-19 a ngei tiah hmuh a si. Sii bawi pawl sin in dah aa chawnhmi maw a si hnga si loah a mah nih dah siibawi pawl cu a chonh hna hnga timi theih a si lo caah sizung zong cu an khar colh ve.
Kachin ramkulh i Myitkyina khuapi ralkap hmunpi zongah an lutlai Maj-Gen Myat Thet Oo zong a thli tein thil rim a theih kho ve lo i khuasik pah he cun a rian cu a ttuan tthiamtthiam. A fahnak a va i zohter tikah Covid-19 zawtnak a rak ngei ve. A kuttang i rianttuan pawl zong an i tthial dih, tiah theih a si.
Yangon khuapi in tlawmpal kal hrawng a si mi Bago khua ah hin meithal le hriamnam dang an tuah tawnnak Defence Industry’s Military Factory a um. Cuka i rianttuan ralkap 300 renglo nih Covid-19 zawtnak an ngei ve, tiah July 20 ah khan theih a si. Hi ka i rianttuan mi minung 9 zong Covid-19 in cun an thi cang.
Ralkap officer pakhat nih a chim ning ahcun Mandalay ralkap sizung ah hin ralkap chungkhar 10 hrawng cu an chungkhar chungkhar in Covid-19 zawtnak nih a thah cang hna tiah a chim. Cu hleiah dam lo zualhma deuh hna cu Maymyo le Meiktila leiah an kuat hna i an kuatmi damlo pawl hi hnabeiseinak a um ti lo mi pawl an si hna.
Ralkap siibawi pakhat nih cun ralkap dihlak le an nupi fale ti’n cun zawtnak check cawk an si lo, ngakchia le mino pawl nih cun dam khawh tthannak an ngei ko bu ah kum upa hrang ahcun an dirhmun a ttha lo ngaingai. Ralkap chungkhar dam lo dihlak tiin cun sizung ah kan ih ter dih kho hna lo, an mah le innchung cio ah zohkhenh dingin kan cah hna i oxygen an herhbau ningin kan pek tawn hna.
Yangon khua Mingaladon ralkap Medical Nursing School zong khar rih a si. Zeicatiah an saya le ngakchia pawl Covid-19 nih a tlakbuak ve hna ruangah an dihlak nih cun zawtnak an ngei dih. Zaangfaak zong an si ngainga hna. Cun, Mingaladon i ralkap sizung lian/ngan ngaimi ihkhun 1000 umnak zongah ralkap dam lo pawl nih an luahkhat dih caah zumhlo deuh timi a rak i piahmi pawl zong mah le sakhan ah ni 10 chung i erh dingin an ti sawhsawh cang hna.
Myanmar Now nih cun SAC ralhrang pawl hi zeitluk in dah Covid-19 zawtnak nih a buaihnawh ve hna lai timi le an dirhmun theih duh ah Zaw Min Htun cu chawnh an timh lengmang nain chawnh khawh a si lo timi kongkau zong an tarlangh chih. A leng leiin an theihmi le a chung i rianttuan sin i a zumh ning sawhsawh ahcun ralkap chungkhar lakah hin nichiar Covid-19 zawtnak ruangah minung 30-40 hrawng hi cu an thi ttheu lai tiah zumh a um.
Zawtnak ngeimi hna hi nifatin te an karh lengmang caah chim khawh a si lo tiah an ti. Cu lak lio ah MRTV le MWD nih cun zeihmanh a phuang duh ve lo i Oxygen le arti kongkau bak lawng cu an phuan khawhmi a si.
