Related Articles
UK Parliament nih Myanmar phungning cozah ah NUG theihpi ding in le SAC hi official cozah bantuk in siter lo ding in UK cozah sin ah forhfialnak a tuah, tiah VOA nih nihin zaanlei ah a ttial.
UK parliament nih NUG theihpi ding in a halnak kong cu UK ramleng vuanci zung nih cathanh a chuah i, “Myanmar ramchung miphun vialte buaktlak covo tinco ding timi NUG dirhmun kan hmuh caah atu bantuk in kan forhfialnak a si,” tiah a langhter.
Cu lawng si loin “NUG hi hmailei Myanmar ram cozah ah ruah buin pehtlai a herh bantuk in uknak a ramhtu ralbawi pawl kan dirpi hna nakhnga lo abiapi tuk,” tiah cathanh ah an langhter chih. Cun, Myanmar innpa ASEAN ram pawl he kutsih in rianttuan tik ah Myanmar ramchung i ramkhel thongtla pawl thlah an si nakhnga kan chimrel zong a hau tiah an ttial chap.
Myanmar ralkap ralhriam cawk/zuarh phihkham khawh a si nakhnga UK nih a hruaimi ralhraim phitkhamtu bu ser ding zong in UK cozah sin ah forhfialnak an tuah.
SAC nih NLD kut cung in uknak an chuh hnu ah UK nih Myanmar ralbawi tampi dantatnak a pek cang hna i kanhnu July 6 zong ah khan Min Aung Hlaing le Soe Win dantatnak a rak pek chap hna.
A Dang Reltthan: Ralkap nih rampi nawlngeihnak an laak hnuah ralkap cozah i nawlngeitu sangbik Min Aung Hlaing nih cun nihin July 15 ah Daw Aung San Suh Kyi a ton tiah ralbawi pakhat nih cun Myanmar Pressphoto Agency thawngthanhnak ah a chim.
Zei caah dah Min Aung Hlaing nih Daw Suh Kyi a ton timi belte theih a si lo i zeibantuk kong dah an ceih timi zong ralbawi nih cun a theih ve lo nak kong cu a chim. Hibantuk thawng a um le cangka Daw Suh Kyi i sihni cu phone hmangin thil kongkau cu hal a si colh, a nih nihcun Court ni lawngah Daw Suh hi ka ton khawh tiah a rak leh hna.
Sihni Daw San Mar La Nyunt nih cun “Daw Suh le kan nih sihni hna cu Court ni lawngah kan i chawn kho. Tubantuk thawng a chuakmi nan ka halmi ralbawi nih Daw Suh Kyi a ton timi kongah hin kannih zong nih felfai in kan theih mi a um rih lo” tiah Myanmar Pressphoto Agency a chim.
A mak ngaimi cu American ramdang vuanci nih ASEAN palai pawl online in a chawnh hna lio ah Myanmar ram aiawh in ramdang vuanci U Wunna Maung aa tel ve i an biachimrelmi cu ralkap lei nih mipi theihternak an tuah rih lo tiah theih a si.
