Related Articles
Delhi Website Catialtu Hna Nih CNF/CDF Sinah Kyats 2 Million Bawmhnak An Pek
Delhi um Chin miphun Website ah thawngpang (news) a tial lengmangtu hna nih kan ram dothlennak ca i a cawlcang cuahmahmi CNF le CDF sinah Kyats 2 Million (nuai 2) bawmhnak an pek tiah theih a si. India tangka (Rupee) cun Rs. 106760 a si.
Bawmhnak tangka cu Farkawn i CNF ralbawi Pu Kap Thang kut ah an chanh i amah nih CNF Spokesperson Salai Htet Ni sinah tlamtling tein a pek chin cang. Delhi ahhin Hakha holh in Website ah thawngpang a tialtu 35 hrawng an um i cu hna nih cun Delhi Chin Media timi an dirh.
Tutan bawmhnak hi DCM hruainak in tawlrelmi a si. Tutan ahhin DCM chungtel a si lo nain a thawh vemi zong an i tel.Atulio i DCM hruaitu Salai Tha C Lian (Saikah) nih cun “An tha a tho tuk hna i Kawlram tangka in a ting a thawhmi an um len. Mahca cun kan i ruahmi leng piin a chuak i Kyats 2 million tiang bawmhnak kan pek khawhmi hi a si” tiah a chim.
Delhi lei website catialtu hna hi soisel le doh an tong ngaingai tawn. Asinain DCM an dirh hnu cun Laica tialning, media zulhphung kong le IT lei i cawnpiaknak tete an tuah lengmang tikah hmasa i soiselnak le dohnak zeimawzat hna cu an um ti lo. Atu ah cun “rianrang tukin thawngpang nan tial/thlah, a dik lomi nan thlah, tangka duh ruangah lih le hrokhrawl nan tial” tiin soisel an si.
Hi kong he pehtlai in DCM hruaitu Salai Tha C Lian nih cun “Thawngpang tialtu hna nih hin media zulhphung tha tein an theih cang caah a dik ko, tial ding aa tlak ko an timi an tial khi a si ko. Careltu lei zong hi vun ti pah ve ko hna ning, kan catialmi a ni thla hmanh rel lo, a tlangtar lawng zoh duak i a chung rel tung loin soisel an hmang tuk. Ruahnak cheuh phun in si loin soisel le doh lei lawngte in bia kan chim i kan palhnak i remh zong a harh ngai” tiah a chim.
Atu bantukin kan ram dothlennak caah tiin Delhi Website catialtu hna nih CNF/CDF sinah bawmhnak an pekmi cu lawmh a um taktak. Tutan bawmhnak ah tangka a thawhtu vialte Bawipa nih a letza in thluachuah in pe ko hna seh. Credit: The Chin Post
A Dang Reltthan: India ah Kuvid in 4.7million hrawng hi January 2020 in June 2021 kar ah an thi tiah an tuak. Tu kum January in June tiang minung tamtuk a nawngtu Delta-variant nih minung sing li a thah tiah Cozah nih a thanh nain a let hra deng in a si tiah an tuak.
A ruang cu India hi minung 1.4 billion hrawng an si le mithi kha Register an rak i tuah tuk lem lo, a bikin Kuvid in thimi. Million pa khat hrawng umnak khua i ni khat ah minung 3000+ te hna an van i khangh cu a tam ko. Mah cu Delta-variant cu Kawlram a phanmi a si i ram tampi a phan cang ti a si.
Yangoon hi a luancia ni hnih/thum kha ni khat ah 1000+ lengmang an thi an ti, nain cu nak zong cun a tam khomi a si le Rampi huap cun thong-sawm in zarh khat ah an thi la tiah ka ruah. Atu hi hriamtlai phu pawl an Camp tete zong ah an zaw ngai hna ti a si.
Mah zawtnak hi pakhatnak ah i ven ding, NUG siseh hriamtlai phu hna nih nawl an ngeihnak hmun ah Stay Home/ Lockdown an chuah ahcun a tha ngaimi a si. Mah lo ahcun Laimi tamtuk kan thi lai. Nawl zong rak ngai u, sang kip le khuakip chuahmi phung zulh rak i zuam cio u. Pathian nih in umpi cio ko hna seh. Credit: Si Bawimang Lian
