Related Articles
Nizaan July 23 cu miphun pakhat cihmih thlu aa tim timi buainak kong hmangin Gambia ram nih Myanmar ralkap cu ICJ Court ah zohfel ding ni a si i, Gambia ram aiawh le Myanmar ralkap aiawh dingmi hna cu Court ah a lang dingin kawh an si. Asinain Myanmar ralkap lei in a langmi an um lo tiah a hmun i um Myanmar mipi hna nih an chim.
ICJ Court hmai in ralkap pawl a rak hngaktu pakhat Ma Ma San nih cun “ICJ Court ah Myanmar ralkap palai pawl an kal lai timi kan theih i zingka tei kan hngak hna. Ralkap palai pawl an rat tikah arti le hnawmthur chia in kan cheh hna lai tiah timhtuahnak kan rak ngei.
Asinain ralkap palai a hohmanh kan hmu hna lo. Ralkap nih rampi nawlngeihnak an laak i mipi an thahmi hna hi Netherlands i um Myanmar mipi hna zongnih kan cohlang kho lo. Curuangah ralkap duhlonak langhter dingin kan rak hngah hna nain, a hohmanh an rak lang lo” tiah a chim.
Gambia ram nih Myanmar ralkap an rak mawhchiat mi hna cu ICJ Court ah kum 2019 in rel thok a si i, Cu lio ahcun Myanmar ralkap aiawh in Daw Aung San Suh Kyi a rak kal. Tu ahcun Suh Kyi cu a inn ah hreen a si. Ralkap nih cun ICJ Court hrang pawlkawmhnak thar an dirh nain, tutan ah an pawlkawmhnak thar pawl cu ICJ Court ah hmuh an si lo.
ICJ(International Court of Justice) lei in zeibantuk in dah bia an khiah te hnga timi cu Myanmar mipi hna nih hngah peng mi a si.
A Dang Reltthan: Nizaan zing, July 23 ah vawlei cung dihlak nih theih in Yangon Insein thonginn chungah duhlonak au khuan thawng thang piin a chuak i dothlennak ah teinak kan co hrimhrim lai timi pinah halmi dang an ngei.
Thonginn chungin duhlonak aukhuan thawng thang tukin a chuah cu ralkap tam taktak nih hriamnam i ken in thonginn an fuh colh i thonginn chungah an lut. Duhlonak ngei pawl cu ralthuam hmangin an daihter hna hnuah an hrem, an vuak, an velh hna i an hrem thahmi zong an um tiah thawngpang tampi a chuak.
Cu thawngpang kongah Myanmar ram chung i thongtla pawl buaipity pawlkomhnak ah lutlai a si mi U Tun Kyi nih cun “Insein thonginn chungah thongtla tthenkhat nih duhlonak an ngei i thil phun 3 in aukhuan nak an ngei. Mah hna cu kan thisen a dai sawhsawh lai lo timi an au, ram buainak ruangah thongtla pawl chuah zalen ding le thonginn chung i damlo pawl an phutawk tein zohkhenhnak pek ding tibantuk pawl a si.
“Thonginn chungah Covid-19 zawtnak a karh taktak i ttha tein zohkhenh an si lo timi cu thil um tuning zoh in aa thei tuk. NLD chungtel U Nyan Win cu Covid-19 zawtnak in a thi phah cang i sihni Kyaw Hu, Han Thar Myint le Min Twin Thit hna zong Covid-19 an ngei/kai cang hna. Cutlukin zohkhenh/tuamhlawm ttha an si lo ruangah an hal aukhuan nak a si. Cu ruangah thonginn ttuanvo ngeitu pawl cu thongtla pawl duhning bantukin tuah piak dingah kan hal i kan tawlrel lai tiah an ti.
“Asinain, zaanlei suimilam 5 hrawngah ralkap mawtaw 7 hrawng cu ralthuam kengin thonginn chungah an lut i duhlonak langhtermi hna an hrem, an velh hna i biahalnak zong an ngeih hna. Hriamnam hmangin an hrem hna tikah hliamtuar faak tuk in a tongmi an um i an thi phah lai tiah ruahmi minung 8 an um. Cu hna pawl cu felfai tein theih dingah kan i zuam cuahmah lio a si” tiah RFA thawngthanhnak ah a chim.
Tu i thawngpang a len ning bantuk a si ko ahcun ralkap i hremnak ruangah mithi 6 in 8 karlak an um tiah thawngpang a darh ngaingai i mah cucu felfai tein theih dingah thongtla buaipitu pawlkomhnak nih cun an i zuam cuahmah lio a si.
