Related Articles
A ho dah vawleicung pumpululh chuihmi lakah a rum bik a si hnga? timi biahalnak hi vawleicung pumpi huapin kan thinlungah ruah ciomi le biahalnak kan ngeih cio mi a si lai dah.
Pumpululh(Football/Soccer) lentecelhnak nak hi vawleicung sport vialte lakah mipi(fans) ngei tambikmi le a lar bikmi lentecelhnak pakhat a si cucu chim hau loin kan theih cio mi zong a si fawn. Hi pumpululh lentecelhnak nih player tampi cu vawleicung minthang tiangah a chuahpi hna i rum nak tiang zongah an i hman phah. Khah a ho cu dah a rum bik le phaisa tambik a ngeimi cu a si hnga? Van zoh tuah hna usih. Top 4 lawng kan van langhter chung rih lai.
4. Neymar: Neymar hi vawleicung pumpululh chuihmi lakah a rumbik timi ah aa tel ve mi a si i a thiambik timi chung zongah aa tel fawn. A tu a um nak Club hi PSG ah a si. A nih hi vawleicung Club lian pakhat a si ve mi Barcelona zongah a rak i tel mi a si i Messi, Suarez le ti’n UCL hraipi zong a rak cawipi hna. Cuticun kum 2017, PSG ah $110 million man phu in le $224.20 million fee transfer contract in a rak i tthial hi a si.
Barcelona in PSG ah a rak tthial tan ahcun vawleicung player lakah man faak bik cazin thar siam in $263 million bak cun PSG nih an rak hman. Kum khat ah $43 million nak tam hi a hmuh, a lenglei thil dangdang sponsor a hmuhmi le bonus telh loin. Zeicadah Top 4 hna ah aa tel khawh tiah khuaruah har ding a um lem lo hih. A phaisa dihlak ngeih zat hi $185 million a si.
3. Messi: Ballon d’Or voi 6 tiang a hmu cangmi le European Golden Shoe zong a ngah cangmi Lionel Messi cu vawleicung Club lian pakhat a si ve mi Barcelona ah a hram a thok i a tutiang a um rih. Barca ah hin zarhkhat chungah $1.5 million nak tam a hlawh. Cucu a lenglei in a hmuhmi telh loin a si rih cun tutun 2021 Copa America zong caan saupi hnuah hraipi a cawipi hna i a cawlcangh zong a ttha ngaingai.
A lenglei sponsor a ngeihmi ah hin vawleicung brands ngan bikah aa telmi Dolce & Gabbana le Audemars Piguet he zong hnatlaknak contract an ngei. Cun global ambassador ah brands ngan taktak a si mi hna Gillette, Turkish Airlines, Ooredoo le Tata Motors he zong contract an ngei hna. Messi nih a phaisa dihlak a ngeih zat hi $400 million a si.
2. Ronaldo: Vawleicung lentecelh thiam bik kan ti ahcun kan thinlung ah Messi le Ronaldo hi an lang colh. Kan theih dingmi cu pumpululh celh thiam bik zong si hna hmanhsehlaw a rum bik an si lo ti kha a si. Ronaldo hi a rum bik pahnihnak ah dir i $ 450 million a ngei i Messi hi a pathumnak dirhmun ah a dir ve.
Juventus arfi ngeihchun Ronaldo hi zarhkhat chungah tam ngaite cu hmu hmanhsehlaw a lenglei in a hmuh zong tam lakte an si. Amah brands a si mi CR7 te hna pinah hotels a ngeihmi le thilpuan lei ah contract a ngeihmi tibantuk in ceilak te a hmuh. Cristiano Ronaldo nih hin a phaisa ngeihmi dihlak zat hi $ 500 million a si.
1. Faiq Bolkiah: A tu caan cu a ho dah vawleicung pumpululh chuihmi lakah a rum bik a si timi kan theih cang lai. A min kan langhter hlan kha cu mah hi a si lai tiah ruahdamhawk na thei theng lai lo dah. A nih hi Brunei ram caah a chuih ve mi a si i a min ah Faiq Bolkiah a si, Leicester City ah midfielder hmunhma tlai in a chuih cuahmah lio a si ve. (Senior Team ah aa tel kho rih lo)
Zeitindah a si khawh timi biahalnak a um ko lai. Cucu a nih hi Jefri Bolkiah, Brunei rampi Siangpahrang, fapa a si caah Ronaldo le Messi zong lawnh in a rum bik dirhmun ah a dirnak hi a si. Faig nih a phaisa dihlak a ngeih zat hi $20 billion a si. ( Kan rak langhtermi hna hi pumpululh lentecelhnak in aa din(retire) rih lo mi hna an si).
