Related Articles
Yaw ram humhimtu YDF nih cun nihin July 28 zinglei suimilam 7 hrawngah ralkap mawtaw bomb in an puahhnawh i ralkap 20 renglo an thi tiah cachuah an langhter.
Yaw miphun hi Magwe ramtthen Gangaw peng chungah um mi an si i tutuan ram buainak ah Yaw Defence Force(YDF) timi an dirh ve. Hi Phu an dirh hnuah theihtawk in ralkap cu an doh ve hna. Nihin i ralkap mawtaw bomb an puahnak hmu cu Gangaw le Thelin lampi karlak ah a si timi kongkau zong an tarlangh chih.
YDF nih cun “July 28, zinglei suimilam 7 hrawngah Gangaw le Thelin lam karlak ah YDF thelin nih ralkap mawtaw cu bomb kan puahhnawh i ralkap 20 hrawng an thi. Cu he pehtlai in ralkap lei hliamtuar tam ngai zong an um timi cu fiang tein kan theih. Kan nih YDF lei cu a thi mi le hliamtuar kan um lo” tiah ca an chuah.
A Dang Reltthan: CDF-Mindat le Yaw Defense Force (YDF) cu SAC ralhrang dohnak hmun khat ah rianttuan tti ding in July 26 ah lungtlin biakamnak an ngei, tiah kan theih.
“Kum 56 chung Myanmar rammi hna thisen a kan dawptu SAC ralhrang ahram cat lak in do awk ah CDF-Mindat le YDF cu hmun khat ah rianttuan tti i, pakhat le pakhat i zohkhenh ding in lungtlinnak kan ngei cang,” tiah thawngpang an chuahmi ah an langhter.
YDF hi kiangkap ah a ummi Myiang PDF le Magwe PDF he zong ttangrual ding in biatiamnak a rak ngei cangmi a si. YDF nih Gangaw lamthluan hrawnghrang ah pehzul in SAC ralhrang dohnak an tuah i, nihin July 28 zinglei sml. 7:00 hrawng zong ah Gangaw-Htilin karlak ah SAC ralhrang pawl bomb an puah hnawh hna.
CDF-Mindat le YDF kutsih rianttuan ding in hnatlaknak an ngeimi cathanh cu CDF-Mindat le YDF nih hmun khat ah nihin zaanlei ah an chuah tti hna. Credit: The Chin Journal
