Related Articles
AA Nih Hramhram In Ralkap Training An Kai Ter Mi Hna Tampi An Zaam Chin ramkulh Paletwa peng Pichawng khuakomh in AA nih training pek dingin an auh mi hna cu training an kainak in an zaam ruangah pawngkam khua hna cu AA nih meithal he khuachungah an kawl hna tiah theih a si.
AA nih Pichawng pawngkam ah a ummi khua hna cu kan hnu thla in khua 1 ah minung 3 training kai dingah hramhram in an auh hna i, ralkap training an pek hna. Training chungah raltam in an chiah hna pin ah an zomhtaih/an nek tuk hna ruangah an celh ti lo i mi tampi an zaam tiah theih a si.
A zaam mi chungah a tel mi nupi ngeicia mi hna cu an va le kawl dingin an nupi le cu meithal he tinh bu in an fial hna.Khua pakhat hna cu a hohmanh leng an chuahter hna lo. Khuachung phone vialte zong AA sin ah pek dih a si tiah a zaam ve mi chungkhat pakhat nih KMG ah a chim.
AA nih Paletwa nitlak lei Pichawng hrawng khuakomh (9), khua 40 hrawng cu kum 2019 hrawngin an control cang mi a si. A hramthawk ahcun khuachung i thithruai ning, uknak lei kan in cawnpiak hna lai ti phunin an auh mi hna a si tiah theih a si. A hramthawk tein kai duh ruangah a kai mi zong an si lo. Atu an kawl cuahmah ko hna. Pehtlaihnak a ngeilo mi hna zong harsatnak an kan pek lai kan phang ngai. Bawmhtu kan herh ngai tiah khuami pakhat nih a chim.
Atu ralkap training a kai mi hi Rakhine ram in Rakhine miphun pawl he minung 300 hrawng an si, August 16 le 17 zaanah a zaam mi hi zei zatdah an si lai ti cu fiang tein ka thei lo, Pakhat le pakhat i hmuh ding zong an si kho lo tiah a zaam mi chungkhat hna sin in theih a si.
Paletwa peng Pichawng hrawngah a um mi khua hna cu lai Chin miphun le Chin khua lawngte an si i, AA nih hramhram in an auh hna ruangah an tih i, a kal mi an si tiah Khumi Media Group nih a tial. Credit: The Chin Post
A Dang Reltthan: Mipi an nunnak le an inn lo kil vennak ding caah ral cu kan do hrim lai i a ni le caan tu cu i ceih in bia kan khiah lai tiah NUG caan karlak president Du Wa Lah Shi nih nihin an tuah mi NUG caan kel meeting (19.20.21) ah a chim.
“NUG nih cun nifatin in thahnawn a tong mi mipi an nunnak le an inn lo pawl kil vennak ding caah ral kan do hrim lai i timhtuahnak zong rian ngeitu hna nih dinh lo in an tawlrel cuahmah nak kong le thok ni cu i ceih in bia khiah hnu ah cabinet ah langhter than hnu ah i bawm in biakhiah than ding kong” caan karlak president Du Wah La Shi nih a chim.
Caan karlak president nih biatawi chimnak a ngeih i a ra laimi September thla ah UN Palai U Kyaw Moe Tun cu pehtlai in a riantuan ter ding kong vawlei pi nih cohlan piak ding kong cu a biapi mi thil a si caah remnak le ruahnak petu phu pawl nih an tawlrel cuahmah nak kong, ASEAN Palai Kawlram a rak phanh tikah NUG he tonbiaruah ding kong zong an ceih dih cang nak kong a chim.
Covid – 19 khamnak kong he pehtlai in Covid – 19 khamtu phu in Dr Zaw Wai Soe hruainak in ram chung phu pawl, ram dang phu pawl hna he i pehtlai in tawlrel an i zuamnak kong, Covid – 19 khamnak ding ah ralhrang pawl i tawlrel ning an dai thlannak,mipi tu kilven lo in an mah ukn k lawng kilven duhnak hna hi Kawlram pi a rawhral ter tu ding a si caah Covid – 19 khamnak ding kong ah cozah vialte he mipi vialte zong i bawm in tawlrel a herh nak kong zong caan karlak President nih a chim. Credit: The Chin Post
